Jeremias 4:30 - Manobo Western Bukidnon OT

³⁰ He Jerusalem he midezeetan, hengkey is baal nu? Maan is midsul-ub ka te mekempet he visti wey menge elahas? Maan is mibpintalan nu is menge mata nu? Is kebpemekempet nu ne wazè din en pulus. Is mibmahal nu he kezapig nu he menge nasyun midselikwey en kenikew ne egkesuatan ke zan en te edhimatey.

Jeremias 4:30 ပူးပေါင်းရင်းမြစ်များ

2 Hadì 9:30

Ne midhendiyà si Jehu te Jezreel. Ne hein netuenan haazà ni Jezebel mibpeguwapa sikandin ne midsulew ziyà te sulawà duen te turuǥan.

Erubasa 6:25

Kenè ka petintal tenged te kekempet din. Kenè ka peuwit te mekevivihag he menge mata zin.

Erubasa 7:10

Ne midsinuǥung sikandin te vahi he mibivisti te iring te visti te vahi he ebelegyà te zengeg din, ne zuen din mezaat he pelanu.

Isaias 10:3

Hengkey is ebeelan niw zutun te andew he edsilutan kew? Hengkey is ed-ul-ulahan niw emun ebpekeuma is kezeetan he ebpuun te meziyù? Hentei is ebuyuan niw te tavang? Wey hendei niw id-eles is ketiǥeyunan niw?

Isaias 20:6

Ne emun egkehitavù en heini, egkaǥi is menge Filistihanen te, ‘Ahàa niw man is nehitavù te menge nasyun he midseriǥan tew wey mibuyuan tew te tavang su para melibri kiw te kedeezeti kenitew te hadì te Asiria. Ne ebmenumenu kiw en buwa wey kiw mekelikey?’ ”

Isaias 33:14

Mibpengerker tenged te kekahandek is menge mekesasalà diyà te Zion. Egkaǥi sikandan te, “Is Megbevayà, iring te edriyubriyub he hapuy he kenà egkeuvukan. Hentei man kenitew is ebpekeubpà diyà te etuvangan te Megbevayà?”

Jeremias 13:21

Kenè be ibmesakit te ǥehinawa nu ke egkezizalem ka te ǥehem te nasyun he kunaan nu ke kezapig nu? Kenè ke ve vuwa egkesekitan iring te vahi he ed-anak?

Jeremias 22:23

Sikiyu is ebpemen-ubpà diyà te turuǥan he mibeelan pinaaǥi te menge kayu he sidru he ebpuun diyà te Lebanon, ebpekezag-es kew emun egkeumahan kew en te kemeresayan, iring te kedag-es te vahi he ebeliliten.

Jeremias 30:14

Midlipatan kew en te kezapig niw he menge nasyun; wazè kew zan en seǥipaa. Midsurung ku sikiyu iring te kedsurung te kuntada niw. Mibpurungan ku sikiyu siluti su utew en meveǥat is menge salè niw wey utew en heini mahabet.

Jeremias 5:31

Is menge ebpeneuven tarù is tagnè dan. Is menge memumuhat kandan he keǥehem is egemiten dan te kedumala zan. Ne nekaangey kayi is menge etew ku. Piru hengkey vuwa is ebeelan dan emun egkeume en is ketepusan he timpu?”

Penhulùhulù 1:19

Mibuyù a te tavang diyà te menge zumezapig kedì piru midluivan e zan. Nemematey is menge memumuhat ku wey menge perezumala te inged dutun te ebpen-ahà sikandan te egkekaan dan su wey zan pezem meuyag-uyag.

Penhulùhulù 1:2

Neiring sikandin te vahi he egkeiinek te tivuuk he kezukileman; is menge luhè din ebpenudà diyà te enaping din. Wazà minsan sevaha zuen te menge mibmahal zin he midlangan kandin. Pudu midluib kandin is menge emiǥu zin, ne nehimu sikandan he menge kuntada zin.

Penhulùhulù 4:17

Ebmerusirem en is ked-ehè dey te kedtaǥad te tavang te kezapig dey he menge nasyun, piru wazà sikandan medtavang kenami. Ebantey key ziyà te menge turi zey te kebpekeuma te ebpuun diyà te nasyun he kenà daan ebpekelibri kenami.

Ezekiel 28:13

Diyè ke zengan te Eden, he pemuleey te Megbevayà. Mideyzeyanan ka te nekedseselekawà he kelasi te mahalen he menge vatu: rubi, tupasyu, ismiralda, krisulitu, uniks, haspi, sapiru, turkisu, wey biril. Mideyzeyanan ka zaan te vulawan he in-andam en dutun te andew te kedlimbaǥa kenikew.

Ezekiel 28:9

Ne ed-ahaan ta ke ebpekekaǥi ke pa ǥihapun diyà te etuvangan te menge edhimatey kenikew te Megbevayè ka. Etew zà is ked-isipa zan kenikew ne kenà Megbevayà.

Obadias 1:7

Edlimbungan kew te kezapig niw he menge nasyun. Heini is menge etew he ebpekid-emiǥu keniyu ne iyan ded daan edsurung keniyu, ne edsegseǥen kew zan puun te inged niw. Heini sikandan is egkaan duma keniyu ne iyan ded daan edhingutel keniyu he kenè niw egketukawan.