Jeremias 4:28 - Manobo Western Bukidnon OT

²⁸ Egkeseeng is kelibutan ne ebmerusirem is langit, su nekaǥi ku en is silut, ne kenè ku en ebelvelewanan is nekaǥi ku. Nekedisisyun ad ne kenè en egkahalin is isip ku.”

Jeremias 4:28 ပူးပေါင်းရင်းမြစ်များ

Isaias 24:4

Egkemezahan wey ebadtik is tanà. Ebmeluya is menge etew te tivuuk he kelibutan, ragkes en is dungganen he menge etew kayi te kelibutan.

Isaias 34:4

Egketunew is langun he ziyà te langit, ne egkelulun is langit iring te papil. Egkengeulug is menge vituen iring te neǥangu he menge zahun te paras wey higus he egketaktak.

Isaias 5:30

Dutun te kedsurunga zan te Israel, ebpengulahì dan te iring te deǥurus te zaǥat. Ne emun edtengtengan te etew is tanà te Israel, iyan egkeehè din is kerusirem wey kelised. Is kereyag ebmerusirem su edtembunan te mekepal he menge ǥapun.

Isaias 50:3

Egkehimu ku zaan te ebpekerusirem is langit he iring keitem te visti he ibivisti te edlalew.”

Jeremias 12:11

Midhimu zan heini he lugar he wazè din en pulus diyà te etuvangan ku. Ne nehimu heini he sibsivayan su wazè en edseǥipà kayi.

Jeremias 12:4

Keenu egkeengked is kebmemaza te tanà wey kegkeǥangu te menge sagbet diyà te langun he menge vevesukà? Nemematey is menge langgam wey menge tagbis tenged te kelelalung te menge etew he ed-ubpà keniyan he tanà. Migkaǥi pa sikandan te, “Wazè mebpekilavet is Megbevayà te egkepeveyaan tew.”

Jeremias 14:2

“Egkeseeng utew is Juda; is menge inged kayi ebpengguyaan. Ebpemekepimpinuu is menge meǥinged kayi he tanà is egkengeseeng, ne egkezineg is ebpemenineǥew ziyà te Jerusalem.

Jeremias 23:10

Nepenù en is tanà te menge etew he ed-azap te tarù he menge megbevayà, su mibaal te mezaat is menge ebpeneuven wey mezaat is kegemita zan te ǥehem dan. Ne tenged kayi midrewakan te Nengazen is tanà, umbe mibmemaza heini ne nengeǥangu is menge pinemula.

Jeremias 23:20

Kenà iyan egkaawà is pauk ku taman te egkeveelan ku is egkesuatan ku te ebaal. Ne ziyà te huziyan he timpu egkepurung niw zed egkesavut heini.

Jeremias 30:24

Ne kenà egkaawà is utew ku kegkepauk emun kenè ku pa egkeveelan is egkesuatan ku te ebaal. Ne ziyà te huziyan he menge andew egkesavut niw zed heini.”

Jeremias 51:12

Ivayew niw is bendirà niw he tuus te kedsurung niw ziyà te Babilonia. Umani niw pa is menge vantey ne ipepelastar sikandan peliǥuy te inged! Ne ibpepurung ibpepengandam para te tebek su timpu en heini he ebeelan te Nengazen is pelanu zin te kedezaat te menge etew ziyà te Babilonia.”

Jeremias 7:16

“Umbe sikew, Jeremias, kenè ka ampù para kayi he menge etew. Kenè ka pehizuhizu wey hangyù kayi te kedì para kandan, su kenè ku sikew ebpemineǥen.

Penhulùhulù 2:17

Mibeelan te Nengazen is mibpelenuwan din te ebaal. Midtuman din is nekaǥi zin dengan. Wazà sikandin mehizu is edezaat keniyu. Midlipey zin is menge kuntada niw tenged te kegkezeeti niw, ne intuǥut din he ikepahambug dan is kebpekegaga zan.

Ezekiel 24:14

Iyan a is Nengazen migkaǥi he neume en is timpu he iyan ad edwaleng te kedsilut, ne wazà ebpekeeǥen kediey. Kenè ku sikiyu egkehizuwan, ne kenè en egkahalin is isip ku. Edhukuman kew tenged te vetasan niw wey menge vaal niw. Iyan a, is Nengazen he MEGBEVAYÀ, is migkaǥi kayi.’ ”

Hoseas 13:14

Edlibriyen ku ve sikiyu te kemetayen? Kenà! Egkeǥiyan ku pa ganì is kemetayen te, ‘He kemetayen, pekevisa ke en. Ne dezeeti nu en sikandan. Kenè ku sikiyu egkehizuwan.’

Hoseas 4:3

Tenged kayi mibmemaza is tanè niw ne ebpematey is langun he meǥinged duen, ragkes is langun he uyaǥen he edhipanew, edlayang, wey edlayewlayew.

Joel 1:10

Egkengezeetan is menge pemuleey he henduen be te etew he edlalew. Egkengezeetan is menge trigu ne egkeǥangu is menge paras wey is menge kayu he ulibu.

Zacarias 8:14

Migkaǥi pa is Nengazen he Mekeǥeǥehem, “Hein midhimu te menge kepuun niw he mepauk a, nekehukum a he edsilutan ku sikandan wey kenè ku egkehizuwan.

Numero 23:19

Is Megbevayà kenà iring te etew he edtarùtarù; kenà egkahalin is isip din. Duen be nekaǥi zin he ebeelan din he wazè din beeli? Duen be saad din he wazè din tumana?

1 Samuel 15:29

Is Megbevayà utew lavew he ebentuǥen te Israel ne kenà teruen ne kenà daan egkehalin is isip din, su kenè man iring te etew he egkahalinhalin is isip.”