Jeremias 39:8 - Manobo Western Bukidnon OT

⁸ Ne elin daan nehitavù is, mibinsulan te menge tig-Babilonia is menge valey ziyà te Jerusalem ragkes en is turuǥan te hadì, ne mibpemengkag dan is menge verengbeng.

Jeremias 39:8 ပူးပေါင်းရင်းမြစ်များ

2 Hadì 25:8

Ne hein ikepitu he andew te ikelima he vulan dutun te ike-19 he tuig te kedhadì ni Nebucadnezar ziyà te Babilonia, midhendiyà te Jerusalem is peremandar te menge vantey te Babilonia he si Nebuzaradan.

2 Cronica 36:19

Mibinsulan dan is baley te Megbevayà wey mibengkag dan is berengbeng te Jerusalem. Mibinsulan dan daan is langun he melig-en he vahin dutun te inged, ne migevè dan is langun he mahalen he menge azen.

Nehemias 1:3

Midtavak dan te, “Ebpemenlised is menge nemenlikù diyà te Juda, ne ebpeel-elezan sikandan te menge etew ziyà te peliǥuy zan. Ne taman en guntaan wazè pa mepurungi is berengbeng te Jerusalem wey neepur is menge pultahan din.”

Salmo 79:7

Su mibpenhimetayan dan is menge etew nu ne midezeetan dan is nasyun te menge etew nu.

Isaias 5:9

Nezineg ku he migkaǥi is Nengazen he Mekeǥeǥehem te, “Heeyan is dezekelà wey mekempet he menge valey, kenè en egkeubpaan.

Jeremias 17:27

Iyan, emun kenè kew edsunud kediey su kenè niw ed-isipen he segradu he andew is Andew te Kedhimeley, kekenà, ed-uwit kew te menge velegyè niw ziyà te menge pultahan te Jerusalem dutun he andew, ebinsulan ku is menge pultahan te Jerusalem ragkes is melig-en he menge vahin kayi he inged, ne wazà ebpekeevuk kayi he hapuy.’ ”

Jeremias 21:10

Nekehukum ad he ibpaaǥi ku kayi te inged is kezeetan ne kenà keupiyaanan. Ibeǥey ku heini ziyà te hadì te Babilonia ne ebinsulan din heini.’

Jeremias 32:29

Edselezan dan heini he inged ne ebinsulan. Elin daan ebinsulan dan is menge valey he zutun te atep dan edtutungen is beyewà para ki Baal. Ne zutun daan edhalad dan te idhalad he menge inumen para te zuma he menge ed-ezapen he utew ku ingkeepes.

Jeremias 34:22

edsuǥuen ku sikandan te ked-uman kedsurung diyà te inged niw. Edsurung dan kayi ne ed-eǥawen dan heini, ne ebinsulan dan. Edhimuwen ku he mekevulungbulung is menge inged diyà te Juda ne wazè en ed-ubpè kayi. Iyan a, is Nengazen, is migkaǥi kayi.”

Jeremias 37:10

Minsan egkezaag niw pa is langun he menge sundaru he edsurung keniyu, ne iyan dà egkesamà kandan is menge teǥepalì he ziyà te menge tulda zan, edsurung gihapun sikandan kayi te inged, ne ebinsulan dan heini.’ ”

Jeremias 38:18

Iyan, emun kenè ka edsurindir, ne ibeǥey heini he inged diyà te menge tig-Babilonia, ne ebinsulan dan heini ne kenè ka ebpekelikey.”

Jeremias 5:10

“Sikiyu is menge kuntada te menge Israilihanen, dèdeeti niw is menge pemuleey te paras dan, piru kenè niw emina. Penempeza niw is menge subpang kayi, su kenè ku en gaked heini he menge etew.

Jeremias 7:20

Ne iyan a, is Nengazen he Megbevayà, migkaǥi kayi: Ibpeǥezaman ku is utew ku kegkepauk kayi te lugar, ziyà te menge etew, ziyà te menge uyaǥen, diyà te menge kayu, wey menge abut te tanà. Is pauk ku iring te hapuy he kenà egkeevukan.”

Penhulùhulù 1:10

Mibpenguwa te kuntada is langun he ketiǥeyunan din. Neehè din he midseled diyà te valey te Nengazen is kenà menge Israilihanen–heini he menge etew, kenà edtuǥutan te Nengazen te kedseled diyà te baley zin.

Penhulùhulù 2:2

Wazè en sikandin mehizu hein midezeetan din is langun he menge valey te menge kevuwazan ni Jacob. Tenged te pauk din midwaǥey zin is binerengbeng he menge inged diyà te Juda. Impekevavè din wey mibpeel-elezan din heini he ginhedian wey is menge pengulu kayi.

Penhulùhulù 2:7

Inselikwey te Nengazen is pemuhatà he zutun sikandin ebpemuhata wey is baley zin. Impewaǥey zin te menge kuntada is menge verengbeng diyà te melig-en he menge vahin te Jerusalem. Nemengulahì heini he menge kuntada ziyà te valey te Nengazen he henduen be te edsilibra zan te pista.

Ezekiel 16:41

Ebinsulan dan is menge valey nu ne edsilutan ke zan diyà te etuvangan te mezakel he menge vahi. Ebpeengkezan ku kenikew is kebpelelevag nu wey is kebayad nu ziyà te menge kumpadi nu.

Ezekiel 23:47

ebpenuleng heini kandan te vatu wey edhimatey kandan pinaaǥi te ispada. Ebpenhimetayan daan is menge anak dan wey ebinsulan is menge valey zan.

Ezekiel 33:21

Hein ikelima he andew te ikesepulù he vulan, dutun te ike-12 he tuig te kegkevihaǥa kenami, duen sevaha he etew he nekepelaǥuy puun te Jerusalem he midhendiyà te kedì, ne ke sikandin te, “Nezeetan en is inged he Jerusalem!”

Amos 2:5

Umbe, ebinsulan ku is Juda ragkes is melig-en he menge vahin te Jerusalem.”

Micas 3:12

Umbe, tenged keniyu edezeetan is Zion he iyan is inged he Jerusalem. Egkeiring heini te mid-eradu he bevesukà, ne egkehimu heini he egketembuan te menge nengeǥevà. Ne egkehimu heini he ketelunan is buvungan he nevengunan te valey te Nengazen.”