Jeremias 30:3 - Manobo Western Bukidnon OT

³ Su egkeuma is timpu he ibpeuli ku is nengevihag he menge etew ku he menge tig-Israel wey menge tig-Juda ziyà te tanè dan. Uya, ibpeuli ku sikandan diyà te tanà he imbeǥey ku ziyè te menge kepuun dan wey zan meengken. Iyan a, is Nengazen, is migkaǥi kayi.”

Jeremias 30:3 ပူးပေါင်းရင်းမြစ်များ

Ezra 3:1

Ne hein neume en is pitu he vulan te ked-ubpà te menge Israilihanen diyà te menge inged dan, midtiǥum sikandan is langun diyà te Jerusalem he zuen dan kegkesevaha.

Ezra 3:12

Mahabet dutun is meǥurang en he menge memumuhat, menge Levihanen, wey menge pengulu te menge pemilya he nekeehè pa zuen te nehuna he valey te Nengazen. Ne utew sikandan nekesineǥew hein neehè dan is pundasyun te veǥu he valey te Nengazen. Piru mahabet he menge etew zutun is nemengulahì tenged te kegkelipey zan.

Ezra 3:8

Mibpuunan is kebenguna zuen te valey te Nengazen te ikezuwa he vulan te ikezuwa he tuig puun te kebpekeulì te menge Israilihanen diyà te Jerusalem. Mibpeug-uǥupà he edterebahu is langun he mid-ulì diyà te Jerusalem puun te kegkevihag, ragkes en ensi Zerubabel he anak ni Shealtiel, Jeshua he anak ni Jozadak wey is duma zin he menge memumuhat, wey menge Levihanen. Is midseriǥan te kedumala te kebenguna zuen te valey te Nengazen iyan is menge Levihanen he 20 he tuig is keǥurang dan pehendiyà te metikang.

Salmo 126:4

Nengazen, ilikù nu is meupiya he kebpekesavuk dey iring te nemezahan he wahig he newehiǥan en maan.

Salmo 53:6

Deyzey ke ebpekeume en is edlibri te Israel he ebpuun diyà te Zion. Utew ebmelipayen is menge tig-Israel he menge etew te Megbevayà, emun idlikù din en is meupiya he kebpekesavuk dan.

Jeremias 16:15

Kekenà, egkaǥi zan te, ‘Ebpenangdù a pinaaǥi te uuyag he Nengazen he mibpeǥawas te menge Israilihanen diyà te menge nasyun diyà te zizaya wey ziyà te langun he menge lugar he zutun din sikandan ipeyapat.’ Su idlikù ku sikandan diyà te tanà he imbeǥey ku ziyà te menge kepuun dan.

Jeremias 23:5

Migkaǥi pa is Nengazen te, “Egkeuma is timpu he ibpahadì ku is sevaha he metazeng he hadì he kevuwazan ni David. Edhadì sikandin he zuen din ketau, ne edhimuwen din is metazeng wey hustu para kayi he tanà.

Jeremias 27:11

Piru is menge etew ziyà te nasyun he ebpesakup wey ebpenilbi te hadì te Babilonia, idtugut ku he kenà egkengaawà sikandan diyà te keugelingen dan he tanà. Dutun dan egkeuyag-uyag wey ed-ubpà. Iyan a, is Nengazen, is migkaǥi kayi.’ ”

Jeremias 29:10

Iyan a, is Nengazen, migkaǥi he emun egketapus en is 70 he tuig he kebpensakup te Babilonia, ne edlikuan ku sikiyu ne edtumanen ku is insaad ku he idlikù ku sikiyu ziyà te keniyu he lugar.

Jeremias 29:14

Uya, edtevangan ku sikiyu, ne idlikù ku ziyà te keniyu is ketiǥeyunan niw. Edtiǥumen ku sikiyu puun te nekedseselekawà he menge nasyun he zutun ku sikiyu ipeyapat, ne idlikù kew ziyà te keugelingen niw he lugar. Iyan a, is Nengazen, is migkaǥi kayi.

Jeremias 3:18

Dutun he timpu, is menge tig-Juda wey menge tig-Israel ebpezumahà te ked-ulì is ebpuun te kegkevihaǥa kandan diyà te zizaya; diyà sikandan ebpevayà te tanà he imbeǥey ku te menge kepuun dan para egkepengevilin dan.

Jeremias 30:10

“Umbe kenè kew mahandek wey mesuǥey is menge kevuwazan ni Jacob he menge suluǥuen ku. Iyan a is Nengazen migkaǥi te egkuwaan ku sikiyu ziyà te meziyù he lugar he zutun kew uwita te mibihag keniyu. Ne ed-ubpè kew he zuen kelinew. Wazè en igkehandek niw wey wazè en ebpekezezaat keniyu.

Jeremias 30:18

Migkaǥi pa is Nengazen te, “Idlikù ku is menge ketiǥeyunan diyà te menge inged te menge kevuwazan ni Jacob, ne egkehizuwan ku sikandan. Ed-umanan dan ebenguna is inged wey is turuǥan diyè mismu te lugar he zutun dan heini tukuza hein aney.

Jeremias 30:4

Mid-uman pa megkaǥi is Nengazen mehitenged te Israel wey Juda: “Egkezineg is kedlelendag te menge etew, kenà tenged te kegkelipey, kekenà, tenged te utew kegkahandek.

Jeremias 31:16

Piru guntaan migkaǥi is Nengazen te, “Kenè ke en meiinek su edsuhulan ku sikew tenged te menge vaal nu. Ed-ulì is menge anak nu puun te tanà te menge kuntada zan.

Jeremias 31:23

Migkaǥi is Nengazen he Mekeǥeǥehem, he Megbevayà te Israel te, “Emun igkepelikù ku en is menge etew ziyà te Juda ziyà te tanè dan, ne egkaǥi en maan sikandan te, ‘Berakat he tuvazi te Nengazen is segradu he vuntud he iyan is Jerusalem, he iyan ubpeey zin.’

Jeremias 31:27

Midpedayun megkaǥi is Nengazen te, “Egkeuma is timpu he utew ku ibpemahabet is menge etew ziyà te Israel wey Juda ragkes is menge uyaǥen dan.

Jeremias 31:31

Mibpedayun pa keǥiya te Nengazen is menge lalag din te, “Egkeuma is timpu he zutun edhimu a te veǥu he kebpekid-uyun ku te menge tig-Israel wey menge tig-Juda.

Jeremias 31:38

Mibpedayun megkaǥi is Nengazen te, “Egkeuma is timpu he ed-umanan ebenguna is Jerusalem puun te Turi ni Hananel pehendiyà te Pultahan diyà te Suyuk.

Jeremias 32:37

edtiǥumen ku is menge etew ku puun te langun he lugar he zutun ku sikandan ipeyapat tenged te utew ku kegkepeuki kandan. Ed-umanan ku sikandan ed-uwita kayi he lugar ne ebpekepengungubpaan dan he melinawen.

Jeremias 32:44

“Uya, egkehitavù ded is kebeyazi te menge etew te pelata te menge vevesukà. Ebaal sikandan te kesebutan. Ebpirmahan, edtetakan is menge pepilis, ne edtistiǥusan. Egkeulaula heini ziyà te menge tanà ni Benjamin, wey ziyà te zezeisey he menge inged he nekeliǥuy te Jerusalem, malù dezekelà he menge inged diyà te Juda, wey te menge inged diyà te menge vuvungan, diyà te inged te menge mibuntud-buntud diyà te edsenlepan, wey ziyà te inged he Negev. Ibpelikù ku is menge etew ku wey ibpeuswag ku sikandan ibpeuman. Iyan a, is Nengazen, is migkaǥi kayi.”

Jeremias 33:26

kenà daan egkahalin is kebpekid-uyun ku te menge kevuwazan ni Jacob wey ki David he suluǥuen ku. Ebpilì a puun diyà te menge kevuwazan ni David te edhadì te menge kevuwazan ni Abraham, ki Isaac, wey ki Jacob. Egkehizuwan ku is menge etew ku ne idlikù ku sikandan diyà te tanè dan wey ziyà te meupiya he kebpekesavuk dan.”

Jeremias 51:60

Insurat ni Jeremias diyà te linulun he velesahan is langun he kezeetan he edhimuwen diyà te Babilonia, wey is minsan hengkey he egkehitavù diyà te Babilonia.

Ezekiel 20:42

Ne emun egkeuwit ku en sikiyu ziyà te tanà te Israel he insaad ku ziyà te menge kepuun niw, egketuenan niw he iyan a Nengazen.

Ezekiel 34:13

Egkuwaan ku sikandan puun te nekedseselekawà he menge nasyun, ne ed-uwiten ku ziyà te keugelingen dan he tanà. Ibpepenabtab ku sikandan diyà te menge vuvungan te Israel, diyà te kilid te menge wahig, wey ziyà te langun he lugar he ed-ubpaan te menge etew.

Ezekiel 36:24

Su egkuwaan ku sikiyu puun diyà te nekedseselekawà he menge nasyun ne ed-uwiten ku sikiyu ziyà te keugelingen niw he tanà.

Ezekiel 47:14

Kinahanglan he ped-iiringa niw te ebahin is tanà, su nenangdù a ziyà te menge kepuun niw he ibeǥey ku heini kandan ne egkehimu heini he kevilin niw.

Joel 3:1

Migkaǥi is Nengazen te, “Dutun te timpu te edlikù ku is meupiya he kebpekesavuk diyà te Juda wey Jerusalem,

Zefanias 2:7

Is tanè niw ed-engkenen te egkesamà he menge etew te Juda. Dutun sikandan ebpemepenabtab te menge uyaǥen dan, ne emun mezukilem diyè dan edhizeǥà te menge valey ziyà te Ashkelon. Edtentenuzan sikandan te Nengazen he Megbevayè dan ne idlikù din is meupiya he kebpekesavuk dan.”

Zefanias 3:20

Uya, edtiǥumen ku sikiyu zutun he timpu, ne ibpeulì ku sikiyu ziyà te tanè niw. Ebeǥayan ku sikiyu te zengeg wey edhimuwen ku he mevantug kew kayi te tivuuk he kelibutan. Egkeulaula heini zutun te timpu te kebpelikua ku te meupiya he kebpekesavuk niw, ne egkeehè niw mismu. Iyan, a is Nengazen, is migkaǥi kayi.’ ”

Deuteronomio 30:3

egkehizuwan kew te Nengazen he Megbevayè niw. Edtiǥumen kew zin puun te langun he menge nasyun he zutun kew zin ipevihag, ne zutun idlikù din is meupiya he kebpekesavuk niw.

Deuteronomio 30:5

Ne ibpelikù kew zin diyà te tanà he ǥaked te menge kepuun niw, ne ed-umanan niw heini ed-engkena. Subra pa is kebpeuswaǥa wey kebpekehebeta zin keniyu te kebpeuswaǥa wey kebpekehebeta zin te menge kepuun niw.