Jeremias 25:3 - Manobo Western Bukidnon OT

³ Seled te 23 he tuig–puun te ike-13 he tuig te kedhadì ni Josia ziyà te Juda, he anak ni Amon ne taman en guntaan is kebpekidlalag te Nengazen kedì. Ne edtulungan ku en edtudtula ziyà te keniyu is menge lalag din, piru wazè kew iyan mebpemineg.

Jeremias 25:3 ပူးပေါင်းရင်းမြစ်များ

Genesis 22:3

Umbe, zutun te utew pa meselem te sunud he andew, midselem med-enew si Abraham ne midsilyahan din is asnu zin. Mibpengayu pa sikandin te idtavun dutun te pemuhat he edtutungen ne miduma zin is dezuwa he suluǥuen din wey is anak din he si Isaac ne migenat dan pehendiyà te vuvungan he migkaǥi te Megbevayà.

1 Hadì 22:3

Migkeǥiyan ni Ahab is menge upisyal zin te, “Netuenan niw he kenitew is Ramot Gilead. Piru maan is wazè kiw medhimu te paaǥi he mahawì tew heini ziyà te hadì te Aram?”

2 Hadì 17:13

Layun ebpetizeeni te Nengazen is Israel wey Juda pinaaǥi te menge ebpeneuven din wey menge menenagnà he edhenduen: “Engkezi niw en is mezaat he menge vaal niw. Tumana niw is menge suǥù ku wey menge sulunuzen he ziyà te tivuuk he Kesuǥuan he impetuman ku te menge kepuun niw ne imbeǥey ku ziyà te keniyu pinaaǥi te menge suluǥuen ku he mibpenaub ku.”

2 Cronica 24:19

Mibpevayaan te Nengazen te menge ebpeneuven din is menge etew su wey zan mekelikù diyà te kandin. Ne minsan mibpetizeenan sikandan te menge ebpeneuven, ne wazè dan mebpemineg.

2 Cronica 34:1

Mibpenuiǥen si Josia te walu he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 31 he tuig.

2 Cronica 34:3

Dutun te ikewalu he tuig te kedhadì din he vatè pa sikandin, mibpuun en sikandin medangep diyà te Megbevayà te kepuun din he si David. Ne hein ike12 he tuig te kedhadì din, mibpuunan din lumpiyuwi is Juda wey Jerusalem pinaaǥi te kebpependezeeti zin te menge simbahan diyà te metikang he menge lugar, te menge tukud he simbulu te vahi he ed-ezapen he si Ashera, zuma he menge ed-ezapen wey menge ledawan.

2 Cronica 34:8

Hein ike-18 he tuig te kedhadì ni Josia, dutun te nelumpiyuwan din en is tanà wey is baley te Nengazen, midisisyun sikandin he ebpurungan sikan is baley te Nengazen he Megbevayè din. Insarig din heini he terebahu ziyà te ki Shafan he anak ni Azalia, diyà te gubirnedur te Juda he si Maasea, wey ziyà te edumala te menge libru te ginhedian dan he si Joa, he anak ni Joahaz.

2 Cronica 36:15

Layun ebpekidlalag kandan is Nengazen, he Megbevayà te menge kepuun dan, pinaaǥi te menge ebpeneuven din, su egkehizuwan din sikandan wey egkenuǥunan din sikan is baley zin.

Salmo 81:13

Emun pezem ebpemineg kew kedì wey edtumanen niw is menge paaǥi ku,

Exodus 8:20

Ne migkaǥi is Nengazen diyà te ki Moises te, “Sayu ka enew keeselem ne veyai nu kes hadì te kedhendiyà din te wahig. Ne keǥiyi nu sikandin he iyan heini migkaǥi ku: ‘Tuǥuti nu is menge etew ku te kegenat su wey zan mekaazap kedì.

Isaias 55:2

Maan is egastu kew te selapì niw te kenà egkekaan? Maan is egestuwen niw is menge suwildu niw te kenà ebpekahantey keniyu? Pemineg kew kediey, ne ebpekekaan kew te metaam he menge keenen ne egkahantey kew.

Jeremias 1:2

Impahayag te Nengazen is menge lalag he ibpekaǥi zin ki Jeremias hein ike-13 he tuig te kedhadì ni Josia diyà te Juda. Heini si Josia anak ni Amon.

Jeremias 11:7

Puun pa te timpu te kebpeǥewasa ku te menge kepuun niw ziyà te Ehipto ne taman en guntaan, edsiguduwan ku en sikandan ebpetizeeni he pezumdumahi e zan.

Jeremias 19:15

“Pemineg kew, su iyan heini migkaǥi te Nengazen he Mekeǥeǥehem, he Megbevayà te Israel: Ibpaaǥi ku kayi he inged wey ziyà te menge inged he nekeelingkus kayi is kezeetan he nekaǥi ku he idezaat kandan, geina te utew sikandan mesinupaken ne wazè dan mebpemineg te menge lalag ku.”

Jeremias 22:21

Mibpetizeenan ku sikiyu hein meupiya pa is kebpekesavuk niw, piru wazè kew mebpemineg. Iyan en iyan heeyan betasan niw puun pa te kegkevatè niw; wazè kew mebpezumazuma kedì.

Jeremias 25:4

Ne minsan layun edsuǥù is Nengazen te menge suluǥuen din he menge ebpeneuven diyà te keniyu, wazè kew ǥihapun medseǥipà wey mebpemineg.

Jeremias 26:5

wey emun kenè niw ebpemineǥen is mibpengaǥi te menge suluǥuen ku he menge mibpenaub ku, he layun ku ibpehendiyà te keniyu piru wazè niw gihapun pemineǥa,

Jeremias 29:19

Su wazà sikandan mebpemineg te menge lalag ku he layun ku ibpetudtul ziyà te kandan pinaaǥi te menge suluǥuen ku he menge ebpeneuven ku, wey minsan sikiyu is nevihag en wazè kew ǥihapun mebpemineg.”

Jeremias 32:33

Mid-iniyuǥan e zan minsan layun ku sikandan ebpenurùa. Kenè dan ebpemineg wey kenè dan egkesuat he ebpenuruen.

Jeremias 35:14

Si Jonadab he anak ni Recab mibmandù te menge kevuwazan din he kenè dan med-inum te vinu ne midtuman dan heini. Ne taman en guntaan wazè dan med-inum te vinu su midtuman dan is suǥù te kepuun dan. Piru sikiyu mulà wazà a keniyu pezumdumahi minsan edsubsublien ku en is kegkeǥiyi ku keniyu

Jeremias 35:15

pinaaǥi te menge ebpeneuven he menge suluǥuen ku. Migkeǥiyan kew zan te, ‘Engkezi niw en is mezaat he menge kineiya niw, ne veǥuwa niw en is menge vetasan niw, ne kenè kew en azap wey penilbi te zuma he menge ed-ezapen. Ne pengungubpaan kew ziyà te tanà he imbeǥey ku keniyu wey te menge kepuun niw.’ Wazè kew iyan mebpezumazuma wey mebpemineg kedì.

Jeremias 36:1

Hein ikeepat he tuig te kedhadì ni Jehoyakim he anak ni Josia diyà te Juda, migkaǥi is Nengazen diyà te ki Jeremias te,

Jeremias 36:2

“Kuwa ka te linulun he suratà ne isurat nu is langun he migkaǥi ku kenikew vahin te Israel, Juda, wey langun he menge nasyun. Isurat nu is langun he migkaǥi ku puun te puunà te kebpekidlalag ku kenikew (hein si Josia pa is hadì diyà te Juda) taman en guntaan.

Jeremias 44:4

Layun a edsuǥù diyà te kandan te menge ebpeneuven he menge suluǥuen ku te kegkaǥi ziyà te kandan he kenè dan beeli heini is utew mezaat he vaal he igkeepes ku,

Jeremias 7:13

Dutun te kebeeli niw kayi te mezaat he menge vaal, edtulungan ku en sikiyu ebpetizeeni, piru wazè kew mebpemineg. Mid-umew ku sikiyu piru wazè kew medtavak.

Jeremias 7:25

Puun pa te ked-awà te menge kepuun niw ziyà te Ehipto ne taman en guntaan edsigudu ad edsuǥù diyà te keniyu te menge suluǥuen ku he ebpeneuven ku.

Ezekiel 33:4

Is minsan hentei he ebpekezineg duen te trumpita piru kenè din edseǥipaan, ne ebpatey sikandin dutun te kedsurunga kandan, ne ziyà mismu igkevasul te kandin is kemetayen din.

Zacarias 1:4

Kenè niw iringi is mibeelan te menge kepuun niw. Impekeǥiyan ku sikandan dengan te menge ebpeneuven he iniyuǥi zan en is mezaat he menge vaal zan, piru wazà sikandan medtuu. Wazà sikandan mebpezumazuma kedì.