Jeremias 23:6 - Manobo Western Bukidnon OT

⁶ Iyan heini ngazan he igngazan kandin: ‘Is Nengazen iyan Mibeǥey Kenitew te Ketazeng.’ Dutun he timpu egkelibri is Juda wey ebpekaangken te kelinew is Israel.

Jeremias 23:6 ပူးပေါင်းရင်းမြစ်များ

1 Hadì 4:25

Umbe, zutun te uuyag pa si Solomon, duen kelinew ziyà te Juda wey Israel puun te Dan taman te Beersheba. Is kada etew, edsihung diyà te pinemula zin he paras wey kayu he higus he zuen din kelinew.

Salmo 45:5

Pelii nu te meǥarang he menge vala te panè nu is menge pusung te menge kuntada nu. Ebpesakup kenikew is menge nasyun.

Exodus 9:26

Iyan dà wazà duen giyew is tanà he Goshen he zutun ed-ubpà is menge Israilihanen.

Isaias 2:4

Ne pinaaǥi te kesuǥuan din, edhusayen din is menge kebikilan te mahabet he menge nasyun. Umbe kenè ne ebpetebtebekà is menge etew ziyà te menge nasyun, wey kenè dan en mebpenurù te menge etew te para te kebpekidtebek. Ebeelan dan dà maan he punta te menge eradu is menge ispada zan, wey ebeelan dan dà he para te igkamet is menge vangkew zan.

Isaias 32:1

Duen keuzemà hadì he metazeng, ne is menge upisyal zin, wazà egkevintahaan diyà te kedumala zan.

Isaias 32:18

Sikiyu is menge etew te Megbevayà, ebpekeubpè kew ziyà te melinawen he menge ubpeey, he meziyù te vangkit, ne wazà edsamuk keniyu.

Isaias 33:22

Ebeelan heini te Nengazen su iyan sikandin perehukum tew, perevaal te kesuǥuan tew, wey edhadì kenitew. Ne iyan sikandin edlibri kenitew.

Isaias 33:5

Is Nengazen, lavew te langun! Su ziyà sikandin ed-ubpà te langit. Kenè din id-awà diyà te Jerusalem is hustu he kukuman wey ketazeng.

Isaias 35:9

Wazà menge erimaung wey minsan hengkey he kelasi te zumezaas he menge langgam he ebpekevayà dutun. Iyan dà ebpekeikul zutun is menge etew he midlibri te Nengazen.

Isaias 42:6

Migkaǥi sikandin diyà te suluǥuen din te, “Iyan a, is Nengazen, midtawag kenikew su ibpeehè ku is ketazeng ku. Edtevangan ku wey ebpengelangan ku sikew ne pinaaǥi kenikew ebaal a te kebpekid-uyun ku te menge etew. Edhimuwen ku sikew he iring te sulù he ebpeketeyew te menge nasyun,

Isaias 45:17

Piru edlibriyen nu mulà, Nengazen, is Israel, ne wazà pidtemanan te kelibriyanan dan. Kenè en sikandan egkepeel-elezan taman te taman.

Isaias 54:17

Is kada ǥumaan he mibeelan su igkuntra kenikew ne kenà ebpekekaid kenikew, ne egketavak nu is menge ibpesangil kenikew. Is egkepengevilin te menge suluǥuen ku, iyan is kezeeǥan duma is ketazeng. Iyan a, is Nengazen, is migkaǥi kayi.”

Isaias 7:14

Umbe iyan mismu is Nengazen ebeǥey keniyu te tuus. Ne iyan heini tuus: Ebmeǥingey is betan-en he vahi ne ed-anak te maama. Ne egngezanan din haazà is batà te ‘Emmanuel.’

Isaias 9:6

Egkelipey pa zaan sikandan su id-anak is batà he maama ne edhedian key zin. Egngezanan sikandin te, “Egkein-inuwan he Sumesambag, Mekeǥeǥehem he Megbevayà, Wazà Pidtemanan he Emey, wey Pengulu he Ebpekeveǥey te Kelinew!”

Jeremias 29:11

Netuenan ku ke ebmenmenuwen ku te edtuman is pelanu ku para keniyu, pelanu te kebpeuswag keniyu ne kenà kedrasey, pelanu te kebeǥey keniyu te perateng he zuen meupiya ziyà te egkeumahan niw he timpu.

Jeremias 30:10

“Umbe kenè kew mahandek wey mesuǥey is menge kevuwazan ni Jacob he menge suluǥuen ku. Iyan a is Nengazen migkaǥi te egkuwaan ku sikiyu ziyà te meziyù he lugar he zutun kew uwita te mibihag keniyu. Ne ed-ubpè kew he zuen kelinew. Wazè en igkehandek niw wey wazè en ebpekezezaat keniyu.

Jeremias 31:23

Migkaǥi is Nengazen he Mekeǥeǥehem, he Megbevayà te Israel te, “Emun igkepelikù ku en is menge etew ziyà te Juda ziyà te tanè dan, ne egkaǥi en maan sikandan te, ‘Berakat he tuvazi te Nengazen is segradu he vuntud he iyan is Jerusalem, he iyan ubpeey zin.’

Jeremias 32:37

edtiǥumen ku is menge etew ku puun te langun he lugar he zutun ku sikandan ipeyapat tenged te utew ku kegkepeuki kandan. Ed-umanan ku sikandan ed-uwita kayi he lugar ne ebpekepengungubpaan dan he melinawen.

Jeremias 33:15

Dutun he timpu iyan ku ibpezumala is metazeng he hadì he kevuwazan ni David. Ne ebeelan din is metazeng wey hustu kayi te tivuuk he tanà.

Jeremias 33:16

Dutun daan he timpu egkelibri is menge tig-Juda ne ebpengungubpaan he melinawen is menge tig-Jerusalem. Is Jerusalem egngezanan te, ‘Nengazen is Mibeǥey Kenitew te Ketazeng.’ ”

Ezekiel 21:27

Edezeetan ku is Jerusalem! Ne kenè en heini egkeuman egketukud taman te kebpekelepew te pinilì ku he iyan edhukum kayi he inged; su insarig ku heini kandin.

Ezekiel 28:26

Ebpekeubpè dan dutun he melinawen. Ebangun sikandan te menge valey wey ebpemula te menge paras. Wazè en edsamuk kandan emun edsilutan ku en is menge etew ziyà te langun he menge avey zan he nasyun he mid-undaunda kandan. Ne egketuenan dan he iyan a Nengazen he Megbevayè dan.”

Ezekiel 38:14

“Umbe, sikew is etew, keǥiyi nu si Gog he siak, is Nengazen he MEGBEVAYÀ, migkaǥi a te, ‘Emun ebpengungubpaan en he melinawen is menge etew ku he Israilihanen, ne egketuenan nu heini.

Ezekiel 48:35

Umbe is tivuuk he keleyatan duen te verengbeng, ne 9,000 he mitrus, ne puun dutun he timpu haazà is inged egngezanan he “Keniyan is Nengazen!”

Daniel 9:24

“Midtelaan en te Megbevayà is 490 he tuig he para zuen te segradu he inged wey te menge zuma nu, su zutun he timpu egkeengked is kebpekidsukulè dan te Megbevayà, ne egkevelukasan sikandan te kegkeuripena kandan te salà, ne ebpeketezengen sikandan te Megbevayà te ketazeng he ebpedayun taman te taman, su para metuman sikan is nelewasan wey kes netagnà, wey para ikeuman ikepehinungud diyà te Megbevayà is baley zin.

Daniel 9:7

“Metazeng ka, Nengazen, iyan, sikami mulà mekeeled-eled is menge vaal zey minsan guntaan. Tutuu heini ziyà te langun he menge meǥinged diyà te Juda wey Jerusalem, wey ziyà te langun he menge Israilihanen he impedsusuwey nu ziyà te uvey wey meziyù he menge lugar tenged te kedsupak dan kenikew.

Hoseas 1:11

Egkeuman egkesevaha is menge etew te Israel wey Juda, ne ebpilì dan te sevaha he pengulu. Ed-uman dan ed-uswag dutun te tanè dan. Ne utew heeyan melipayen he timpu para te inged he Jezreel.

Hoseas 1:7

Piru egkehizuwan ku mulà is menge etew te Juda. Iyan a, is Nengazen he Megbevayè dan, edlibri kandan pinaaǥi te ǥehem ku ne kenà pinaaǥi te kebpekidtebek he egemiten is panà, ispada, menge kudà etawa pereuntud te kudà.”

Hoseas 2:18

Dutun he timpu ebaal a te kesebutan diyà te langun he menge langgam he kenè kew zan menuwa. Id-awè ku ziyà te tanà he Israel is menge ǥumaan te kebpekidtebek iring te panà wey ispada. Ne ǥeina te wazè en tebek, ne ebpekelipezeng kew he wazè niw igkahandek he kezeetan.

Obadias 1:17

“Piru zuen egkesamà he menge Israilihanen diyà te Buvungan te Zion, ne egkeuman heini egkehimu he segradu he lugar. Ne egkeuman egkaangken te kevuwazan ni Jacob is menge tanà he kandan dengan.

Obadias 1:21

Edtekezeg is menge menluluwas te Israel ziyà te Buvungan he Zion, su edumelahan dan is menge etew he menge meǥinged diyà te Buvungan ni Esau. Ne siak, is Nengazen, iyan a edhadì.”

Zefanias 3:13

Heini sikandan is egkesamà he menge Israilihanen ne kenà ebaal te mezaat; kenè dan edtarùtarù wey ebpenlimbung. Egkaan dan wey edlipezeng ne wazà ebpekepelihandek kandan.’ ”

Zacarias 10:6

“Edlig-enan ku is menge etew te Juda ne edlibriyen ku is menge etew te Israel. Ibpelikù ku sikandan diyà te kandan he lugar su nehizuwan ku sikandan. Wey tenged te iyan a Nengazen he Megbevayè dan, edtevaken ku is menge ked-ampù dan. Umbe iring ded te wazè ku sikandan iselikwey.

Zacarias 3:10

Dutun he timpu ed-ubpè kew he melinawen. Is kada sevaha keniyu, ebpengimbita te siringan din te kebpinuu ziyà te lempek te paras din wey kayu zin he higus. Iyan a, is Nengazen he Mekeǥeǥehem, is migkaǥi kayi.”