Jeremias 22:3 - Manobo Western Bukidnon OT

³ Migkaǥi is Nengazen te: Baal kew te hustu wey metazeng. Tevangi niw is menge mibpenekawan; libriya niw sikandan puun te gehem te midrasey kandan. Kenè niw dèdaaǥa wey pesipelahi is kenà menge Israilihanen, is menge ilu, wey is menge valu. Kenè kew zaan himatey te wazà mekesalà.

Jeremias 22:3 ပူးပေါင်းရင်းမြစ်များ

2 Samuel 23:3

Is Megbevayà he iyan is endilungà he vatu te Israel, migkaǥi sikandin kedì, ke sikandin te, ‘Is etew he metazeng is kedumala wey zuen din kegkehandek te Megbevayà,

2 Hadì 24:4

ragkes en is kebpenhimetayi zin te menge etew he kenà ereg he edhimetayan. Impetiǥis din is lengesa zan diyà te Jerusalem, ne kenà heini egkepesaylu te Nengazen.

Job 22:9

Emun ebpekitavang diyà te kenikew is balu he menge vahi, ibpeulì nu sikandan he wazè dan uwiten. Wey elin daan is menge ilu wazè nu purungi etura.

Job 24:9

“Emun ebpekeutang is balu wey pubri he vahi, anak din is ibpevayad kandin te lalung he menge etew.

Salmo 68:5

Is Megbevayà he ziyà ed-ubpà te segradu he valey zin, ed-elimahan din is menge ilu ne edlevanan din is menge valu he vahi.

Salmo 82:4

Luwasa is menge utew egkengeey-eyuwi wey is menge pubri ziyà te ǥehem te menge mezaat he etew!

Salmo 94:21

Nesevaha zan te kebpekidkuntada te menge metazeng, ne midhukuman dan te kemetayen is wazè dan menge salà.

Salmo 94:6

Mibpenhimetayan dan is menge valu he vahi, is menge ilu, wey is menge lumelengyawà.

Exodus 22:21

“Kenè niw luplupiǥa is lumelengyawà; kenè niw pesipelahi su nehimu kew zaan he lumelengyawà diyà te Ehipto.

Exodus 22:22

“Kenè niw dèdaaǥa is balu he vahi etawa ilu he vatà.

Erubasa 23:10

Kenè nu eǥawa is tanà te menge ilu pinaaǥi te kedhelina te menge kezaan he menge simintu kayi.

Erubasa 6:17

is menge gelbuwen, is menge teruen, is menge memumunù,

Isaias 1:23

Is menge pengulu nu ne mibpekidsukulà wey miduma te menge tekawen. Egkesuat dan he layun edsipsip, wey ebuyù sikandan te menge gasa. Wazè dan levani is ketenged dutun te menge ilu wey wazè dan pemineǥa is riklamu te valu he menge vahi.

Isaias 58:6

Is kelasi te puasa he egkesuatan ku iyan is puasa he egkezumahan te metazeng he ulaula: Engkezi niw is kebpendaagdaag wey kebpepirisu te menge wazà mekesalà, wey libriya niw is menge edèdaaǥen.

Isaias 58:7

Beǥayi niw te keenen is egkengevitil, ipeubpè niw ziyà te menge valey niw is menge wazà egkeubpaan, bistiyi niw is menge wazà bisti, wey tevangi niw is menge kezuzumahi niw he ebpenginahanglan.

Jeremias 19:4

Umbe ebeelan ku heini, su inselikwey a te menge etew ku, ne heini he suǥud-suǥud midhimu zan he pemuhatà te menge pemuhat he edtutungen he para te zuma he menge ed-ezapen. Menge ed-ezapen he wazè dan ganì mekilala wey minsan is menge kepuun dan wey is menge hadì diyà te Juda ne wazà mekekilala. Ne ebpenhimatey pa sikandan te wazè pa hanew he menge vatà kayi he lugar.

Jeremias 22:17

Ne sikew mulà, wazè duma he tinguhè nu, kekenà, iyan dà is kebpenlimbung, kebpemenhimatey te menge wazà mekesalà, kebpendaagdaag, wey kebpenhukhuk.

Jeremias 26:16

Ne migkeǥiyan te menge upisyal wey te langun he menge etew zutun is menge memumuhat wey menge ebpeneuven te, “Kenà sikandin ereg he edhukuman te silut he kemetayen, su migkaǥi sikandin diyà te kenitew pinaaǥi te ngazan te Nengazen he Megbevayè tew.”

Jeremias 5:28

Midlambù dan wey mibmeupiya is lawa zan. Kenè en edtaman is kebaal zan te mezaat. Wazè dan beǥayi te hustu he kukuman is menge ilu, wazè dan depiǥi is ketenged te menge pubri he menge etew.

Jeremias 7:23

kekenà, midsuǥù ku zaan sikandan he ke siak te: ‘Pezumdumahi a keniyu, ne egkehimu a he Megbevayè niw ne egkehimu kew he menge etew ku. Pengungubpaan kew te sungkad te menge paaǥi he insuǥù ku keniyu su wey mebmeupiya is kebpekesavuk niw.’

Jeremias 9:24

Iyan ereg he ibpegalbu zin is kegkesevuta zin wey kegkekilelaa zin kedì he iyan a Nengazen he mepinelenggaan; iyan a ebaal te hustu wey metazeng kayi te kelibutan su iyan heini ebpekelipey kediey.”

Penhulùhulù 3:36

Kenà daan egkesuatan te Nengazen he edtuisen is hustu he kukuman diyà te hukmanan. Neehè din heini is langun.

Ezekiel 18:12

Edèdaaǥen din is menge pubri wey is menge egkaayuayu. Tekawen sikandin, wey kenè din id-ulì is insandà te menge nekeutang diyà te kandin. Ed-azap sikandin te zuma he menge ed-ezapen, wey ebaal te utew mezaat he menge vaal.

Ezekiel 18:7

Wazà sikandin mebpendaagdaag, wey in-ulì din is insandà te mid-utang diyà te kandin. Wazà sikandin mebpenakew, kekenà, impekaan din is egkengevitil wey mibeǥayan din te visti is menge wazà bisti.

Ezekiel 22:7

Keniyan te lugar nu wazè en tehuza is menge ǥinikanan. Is kenà menge Israilihanen he ed-ubpà diyà te kenikew ebpenepian, ne edèdaaǥen is menge ilu wey menge valu.

Ezekiel 45:9

Su iyan a is Nengazen he MEGBEVAYÀ, migkaǥi: Sikiyu is menge pengulu te Israel, subre en is mibeelan niw! Engkezi niw en is kebpenggulpi niw wey kebpendaagdaag, ne veeli niw is metazeng wey hustu. Kenè niw en eǥawi te tanà is menge etew ku.

Joel 3:19

“Is Ehipto egkehimu he mekevulungbulung, ne is Edom egkehimu he disirtu su midsurung dan is menge etew ziyà te Juda; mibpenhimetayan dan is kenà ereg he edhimetayan.

Leviticus 19:15

Kinahanglan he meketezenganen wey hustu is kedhukum niw ziyà te hukmanan; kinahanglan he wazè niw ibpelavi, sepian etawa pubri.

Amos 5:15

Senggilahi niw is mezaat ne veeli niw is meupiya, ne hukum kew te hustu ziyà te hukmanan. Su kela ke mehizuwi kew zed te Nengazen he Megbevayà he Mekeǥeǥehem is nengesamà keniyu te menge kevuwazan ni Jose.

Amos 5:24

Piru ipeehè niw is hustu he kukuman ne veeli niw is metazeng; kenè niw heini engkezi iring te wahig he kenà ed-engked he edtudà.

Micas 3:11

Emun edhukum kew ebpeburan niw is ebeǥey te sipsip diyà te keniyu. Ne sikiyu is menge memumuhat, ebpenurù kew su ǥeina te ebeyazan kew. Ne sikiyu zaan is menge ebpeneuven, ebpenagnè kew tenged dà te selapì. Edsarig kew pa he edtevangan kew te Nengazen, su egkaǥi kew te, ‘Zuma zey is Nengazen. Umbe wazà mezaat he egkehitavù kenami.’

Micas 6:8

Midtavak si Micas te, “Mibpenurù kiw en te Nengazen ke hengkey is meupiya. Ne iyan heini egkesuatan din he tumana tew: Ebeelan tew ke hengkey is metazeng, ibpelavi tew is kegkehizu te zuma, wey edsunud kiw te Megbevayè tew duma is kenà kebpelavew.”

Malakias 3:5

Migkaǥi is Nengazen he Mekeǥeǥehem te, “Edhendiyà a te keniyu su edhukum a. Segugunè ku ibpetueni is menge salà te menge veyilan, menge mengungumpadi, menge ebpenistiǥus te tarù, menge egalen he ebpenlimbung, menge ebpemintahà te menge valu he vahi wey menge ilu, wey menge lumelengyawà, wey is menge wazè dan kedtahud kedì.”

Deuteronomio 10:18

Edlevanan din is menge ilu wey is menge valu he vahi. Ebmahalen din is menge lumelengyawà ne ebeǥayan din sikandan te keenen wey menge visti.

Deuteronomio 24:17

“Beǥayi niw te hustu he kukuman is menge ilu wey is kenà menge Israilihanen he zuma niw he meǥinged. Kenè niw pesendai te valu he vahi is utang din te samput din.

Deuteronomio 24:7

“Ke zuen egkezekepan he migebpaan din is duma zin he Israilihanen ne mid-uripen din haazà etawa imbelegyè din, kinahanglan he edhimetayan haazà is nemenggebpà. Kinahanglan he id-awè niw heini he mezaat he vaal ziyà te keniyu.

Deuteronomio 25:1

“Penenglitan duen egketebekaayan te zezuwa he etew ne haazà he kasu mid-uwit dan diyà te kurti, ne midhukum is menge datù ke hentei kandan is nekesalà wey ke hentei is wazà mekesalà.

Deuteronomio 27:19

“Rinewakan is etew he kenà ebeǥey te hustu he kukuman diyà te kenà menge Israilihanen, diyà te menge ilu wey menge valu he vahi.” Ne edtavak is langun te, “Amen!”