Jeremias 22:28 - Manobo Western Bukidnon OT

²⁸ Jehoyakin, neiring ka te nerupet he ziniyun he intimbag su wazè din en pulus. Iyan heeyan hinungdan ke maan is idtimbag ku sikew wey is menge anak nu ziyà te inged he wazè niw zuen hanew.”

Jeremias 22:28 ပူးပေါင်းရင်းမြစ်များ

2 Samuel 5:21

Ne mid-ewaan te menge Filistihanen is menge ed-ezapen dan dutun, ne mibpen-uwit ni David wey te menge sakup din.

2 Cronica 21:20

Mibpenuiǥen si Jehoram te 32 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te walu he tuig. Dutun te kebpatey zin ne wazà neseeng kandin. Diyè ded ileveng te Inged ni David; piru wazà dutun te edlevengan te menge hadì.

Salmo 31:12

In-iring e zan en te minatey su edlipatan e zan en. Iyan ked-isipa zan kedì he iring a te ziniyun he nerupet he wazè din en pulus.

Jeremias 14:18

Emun edhendiyà a te menge vevesukà wey menge inged, egkeehè ku is mibpematey te tebek wey vitil. Is menge ebpeneuven wey is menge memumuhat mibpedayun te vuluhaten dan, piru wazè dan metueni ke hengkey is mibeelan dan.’ ”

Jeremias 15:1

Migkaǥi is Nengazen kayi te kedì te, “Minsan si Moises pa wey si Samuel is ebpehizuhizu kediey para kayi he menge etew, ne kenè ku sikandan egkehizuwan. Umbe ipekeziyù sikandan kayi te etuvangan ku. Ipawè niw en sikandan!

Jeremias 16:12

Ne sikiyu edhuna kew pa he lalung kenà te menge kepuun niw. Wazè kew mebpezumazuma kedì, kekenà, iyan niw mibpezumdumahan is kenà mepezumdumahan he mezaat he gehinawa niw.

Jeremias 17:4

Egkaawà diyà te keniyu is tanà he imbeǥey ku keniyu. Ibpeuripen ku sikiyu te menge kuntada niw ziyà te tanà he wazè niw zuen hanew, su midhimu niw he mepauk a te pauk he zekelà su henduen be te edriyubriyub he hapuy he kenà egkeevukan.”

Jeremias 22:27

Kenè kew en ebpekelikù diyà te tanà he iyan pezem suat niw he mekelikù kew zutun.

Jeremias 22:30

Su iyan heini migkaǥi zin, “Idsurat he heini si Jehoyakin wazè din anak, su wazà minsan sevaha zuen te menge anak din he ebpekepengevilin te kedhedii ni David te Juda. Heini he etew ebpengungubpaan he kenà ebmeuswaǥen.”

Jeremias 24:1

Duen impelewasan kedì te Nengazen hein mibihag en ni Hadì Nebucadnezar he hadì te Babilonia si Hadì Jehoyakin he hadì te Juda, he anak ni Jehoyakim. Mid-uwit si Jehoyakin diyà te Babilonia ragkes is menge upisyal zin wey is memetau he menge pandey wey menge terebahanti. Hein neipus heini he hitavù ne zuen impelewasan te Nengazen kedì. Dutun te nelewasan ku neehè ku is dezuwa he vaskit he veǥas te higus he ziyà te egkesineruwan duen te valey te Nengazen.

Jeremias 27:20

Heini he menge gelemiten wazà uwita ni Hadì Nebucadnezar ziyà te Babilonia hein mibihag din puun te Jerusalem si Hadì Jehoyakin he hadì te Juda, he anak ni Jehoyakim, duma te menge upisyal ziyà te Juda wey Jerusalem.

Jeremias 37:1

Midhimu ni Hadì Nebucadnezar he hadì te Babilonia si Zedekia he anak ni Josia he hadì te Juda he ilis ki Jehoyakin he anak ni Jehoyakim.

Jeremias 48:38

Nemen-erang is menge etew ziyà te atep te menge valey zan wey ziyà te menge pelasa, su midezeetan ku is Moab ne neiring heini te umuy he nerupet he wazè en seǥipaa.

Hoseas 13:15

Minsan edhuna kew he meuswaǥen kenà te menge kezuzumahi niw, edezeetan ku sikiyu. Ibpaaǥi ku is meinit he keramag he ebpuun diyà te disirtu he zapit te edsilaan ne egkengemezahan is menge serebseb wey menge kalut niw. Ne ed-eǥawen is mahalen he menge azen niw.

Hoseas 8:8

Is Israel henduen be te mid-emeluk te zuma he menge nasyun. Ne ǥuntaan te nekidsevaha en heini kandan ne neiring heini te ǥelemiten he wazè din pulus.