Jeremias 2:20 - Manobo Western Bukidnon OT

²⁰ “Hein menge uripen kew pa, iring kew te vaka he mid-eyuǥuwan wey pinirisu he migkedinahan, piru hein midlibri ku en sikiyu, kenè kew ebpenilbi kedì. Mid-azap kew hinuun te zuma he menge ed-ezapen diyà te kada metikang he vuvungan wey ziyà te sihung te kada merapung he kayu. Iring kew te vahi he ebelegyà te zengeg din.

Jeremias 2:20 ပူးပေါင်းရင်းမြစ်များ

1 Hadì 12:32

Midtukud daan sikandin te pista emun ike-15 he andew te ikewalu he vulan te iring te pista ziyà te Juda. Dutun he andew, ebpemuhat sikandin diyà te Betel te menge pemuhat diyà te pemuhatà he para zuen te menge vulawan he vaka he impeveelan din. Ne mibpilì sikandin te menge memumuhat he idsavuk din diyà te menge simbahan he mibpeveelan din diyà te metikang he menge lugar.

1 Hadì 14:23

Mibaal zaan sikandan te menge pemuhatà diyà te metikang he menge lugar wey te tedeman he menge vatu, wey mibpehitindeg sikandan te tukud he simbulu te vahi he ed-ezapen he si Ashera ziyà te puntur te kada vuvungan wey ziyà te sihung te kada merapung he kayu.

Salmo 107:14

Mibpemidtew zin is ingkedina kandan, ne in-awè din sikandan dutun te utew merusirem he menge pirisuwan.

Salmo 2:3

Ke sikandan te, “Kinahanglan he kenè kiw ebpevayàbayà wey ebpesakup kandan.”

Salmo 78:58

Midhimu zan he mepauk wey mebpengelikud kandan is Megbevayà pinaaǥi te kebangun dan te menge simbahan diyà te metikang he menge lugar wey te ked-azap dan te zuma he menge ed-ezapen.

Exodus 19:8

Mid-uyun haazà is langun he menge Israilihanen te migkaǥi kandan ni Moises ne ke sikandan te, “Edtumanen dey is langun he insuǥù kenami te Nengazen.” Ne midtudtul ni Moises diyà te Nengazen is tavak te menge etew.

Exodus 24:3

Ne hein nekelikù sikandin diyà te menge etew migkaǥi zin kandan is langun he menge lalag wey menge velaud te Nengazen, ne mibperedredseey sikandan is edtavak te, “Ebeelan dey is minsan hengkey he nekaǥi te Nengazen.”

Exodus 3:8

Ne umbe mibulus a su edlibriyen ku sikandan te menge pesipala kandan te menge tig-Ehipto, wey ibpaawè ku sikandan diyà te Ehipto ne ziyè ku sikandan ibpeubpà te tanà he meupiya wey meluag, tanà he egkeerubasa he ebpuunan te edtudà he ǥatas wey teneb he iyan ed-ubpaan te menge Canaanhen, Hitihanen, Amorihanen, Pirisihanen, Hivihanen wey Jebusihanen.

Isaias 1:21

Ahàa niw man is inged he Jerusalem. Hein aney metinumanen is menge meǥinged kayi, piru ǥuntaan neiring en sikandan te vahi he ebelegyà te zengeg din. Hein aney metazeng he menge etew is ebpemen-ubpà diyà te Jerusalem, piru ǥuntaan menge teremunù.

Isaias 10:27

Dutun he andew, ibpeǥawas ku sikiyu puun te ǥehem te Asiria he henduen be te meveǥat he uwiten he midtiang niw wey iring te eyuǥu he nekeveǥat te tengel niw. Ebpekeǥawas kew puun te ǥehem din su egkehimu kew he gemhanan.”

Isaias 14:25

Edezeetan ku is menge tig-Asiria emun diyà sikandan te Israel he tanè ku. Edtekutakan ku sikandan diyà te menge vuvungan ku. Ne kenè dan en uripen is menge etew ku.

Isaias 9:4

Su ibpekeziyù nu sikandan diyà te midlupiglupig kandan. Iring sikandan te uyaǥen he ebedtien nu is id-eyuǥu zuen wey is tuked he idlagkut duen. Is ebeelan nu kandan iring te mibeelan nu zengan hein midaag nu is menge Midianhen.

Jeremias 13:27

Neehè ku is utew mezaat he menge vaal niw he iyan is ked-azap niw te zuma he menge ed-ezapen diyà te menge vuvungan wey menge vevesukà. Neiring kew te vahi he mengungumpadi he utew subra is kegkeeriǥi zin, wey te mekeeled-eled he vahi he ebelegyà te zengeg din. Mekehizuhizu kew is menge tig-Jerusalem! Keenu vuwa egkaawà is keremerik niw?

Jeremias 17:2

Minsan is menge anak niw ed-azap diyà te menge pemuhatè niw wey te menge tukud he simbulu te vahi he ed-ezapen he si Ashera diyà te sihung te merapung he kayu wey ziyà te puntur te menge vuntud,

Jeremias 2:31

“Sikiyu is menge etew kayi he lapis te kevuwazan, pemineǥa niw is egkeǥiyen ku. Neiring e ve te disirtu ziyà te Israel etawa neiring a te utew merusirem he lugar? Maan is migkaǥi kew te, ‘Ebeelan dey en is minsan hengkey he egkesuatan dey te ebaal. Ne kenè key en ed-uvey ziyà te Megbevayà.’

Jeremias 3:13

Engkena nu zà he nekesalè ka pinaaǥi te kebpekidsukulè nu te Nengazen he Megbevayè nu, wey midsunud ka te zuma he menge ed-ezapen pinaaǥi te ked-ezapa nu kandan diyà te sihung te kada merapung he kayu. Engkena nu he wazè ka mebpezumazuma kediey. Iyan a is Nengazen, is migkaǥi kayi.”

Jeremias 30:8

Iyan a, is Nengazen he Mekeǥeǥehem, migkaǥi he zutun he timpu, kenè dan en uripen te menge lumelengyawà. Iring te mibadtì ku en is eyuǥu ziyà te tengel zan wey midtangtang ku en is ingkedina kandan.

Jeremias 5:5

Umbe, midhendiyà a te menge pengulu zan su wey ku sikandan melelaǥi. Siguradu he netuenan dan is menge paaǥi te Nengazen he Megbevayè dan he ibpetuman kandan.” Piru minsan sikandan, inselikwey zan daan is menge ibpetuman te Megbevayà.

Ezekiel 16:28

“ ‘Mibpelelevag ke zaan diyà te menge tig-Asiria su wazè ke pa meperahi. Ne hein nepasad haazà wazè ke pa iyan meperahi.

Ezekiel 16:31

Mibpehitindeg ka te menge simbahan diyà te menge suyuk te menge zalan wey menge pelasa he para te menge ed-ezapen nu. Tuwas pa he mezaat is baal nu te vaal te vahi he ebelegyà te zengeg dan su wazè ka mulà mebpevayad te nekidhilavet kenikew.

Ezekiel 16:41

Ebinsulan dan is menge valey nu ne edsilutan ke zan diyà te etuvangan te mezakel he menge vahi. Ebpeengkezan ku kenikew is kebpelelevag nu wey is kebayad nu ziyà te menge kumpadi nu.

Ezekiel 20:28

Su hein mid-uwit ku sikandan diyà te tanà he insaad ku he ibeǥey ziyà te kandan, mibpemuhat dan te menge pemuhat, menge veyewà, wey menge inumen diyà te metikang he menge lugar wey ziyà te merapung he menge kayu he egkeehè dan. Umbe utew ku sikandan nepeuki.

Ezekiel 23:5

“Minsan esawa ku en si Ohola, mibpedayun gihapun sikandin mebelegyà te zengeg din, ne edteltelukunan din en is menge kumpadi zin he menge tig-Asiria he siringan din.

Hoseas 1:2

Is nehuna he migkaǥi te Nengazen diyà te ki Hoseas ne iyan heini: “Pengesawa ka te vahi he mengungumpadi, ne is menge anak niw ed-isipen he menge anak dutun te vahi he mengungumpadi. Su ebpaahà heini he is menge etew ku, iring te nengumpadi sikandan pinaaǥi te kedselikwaya zan te Nengazen wey ked-azap dan te zuma he menge ed-ezapen.”

Hoseas 3:3

Ne migkeǥiyan ku sikandin te, “Ubpè ka zuma kediey seled te meluǥayad he timpu. Ne kenè ke en pekidhulid te sengememaama. Minsan pa te kenà a zep-a ebpekidhulid kenikew.”

Hoseas 4:13

Nemuhat kew ziyà te puntur te menge vuntud, diyà te sihung te metawis wey merapung he menge kayu, su meupiya heini he edhelungan. Umbe mibpehilavet is menge anak niw he raǥa ne is menge ambey niw nengumpadi zaan.

Hoseas 9:1

Migkaǥi si Hoseas te, “Sikiyu is menge tig-Israel, engkezi niw is kedlipeylipey niw he iring te ebeelan te menge etew ziyà te zuma he menge nasyun. Su mid-azap kew te zuma he menge ed-ezapen ne mibpekeziyuan niw is Megbevayè niw. Diyà te minsan hendei he gunasà te menge pungu ingkelipey niw is menge abut niw he mid-isip niw he imbayad diyà te keniyu te zuma he menge ed-ezapen tenged te ked-ezapa niw kandan.

Leviticus 26:13

Iyan a kes Nengazen he Megbevayè niw he mibpeǥawas keniyu puun te Ehipto su wey kew kenè en meuripen te menge Ehiptohanen. Mibeǥayan ku en sikiyu te vayàbayà umbe wazè en ereg he igkeeled niw.

Nahum 1:13

Su ǥuntaan egeuzen ku en sikiyu puun te ǥehem te menge tig-Asiria.”

Deuteronomio 12:2

Emun edsegseǥen niw en is menge etew he ebpen-ubpà dutun, purungi niw pemengkaǥa is langun he menge lugar he zutun dan ed-ezapa is ebpen-ezapen dan he tarù he menge megbevayà he ziyà te metikang wey mevavà he menge vuntud wey sihung te merapung he menge kayu.

Deuteronomio 15:15

Tentenuzi niw he menge uripen kew zengan diyà te Ehipto ne impeǥawas kew te Nengazen he Megbevayè niw. Iyan heeyan hinungdan ke maan is ibeǥey ku heini keniyu he suǥù guntaan.

Deuteronomio 26:17

Impahayag niw ǥuntaan he iyan is Nengazen Megbevayè niw ne ebpengungubpaan kew te sungkad te menge paaǥi zin, wey edtumanen niw is menge suǥù din wey is imbeǥey zin he menge sulunuzen, ne edsunuzen niw sikandin.

Deuteronomio 4:20

Tentenuzi niw he midlibri kew te Nengazen su utew mepait is ked-antus niw zutun, iring te ziyè kew te edriyubriyub he rapug. Neulaula heini su para mehimu kew he menge etew zin, umbe menge etew kew zin en guntaan.

Deuteronomio 4:34

Duen be selakew en he Megbevayà he migkuwa zin is grupu te menge etew puun te sevaha he nasyun pinaaǥi te penggezam, egkengein-inuwan he menge hitavù, tebek, dekelà he ǥehem, wey mekeǥeǥehem he menge vaal para maangken din? Wazà! Piru iyan heeyan mibeelan te Nengazen he Megbevayè niw ziyà te Ehipto, ne neseksiyan niw heeyan.

Deuteronomio 5:27

Iyan ke zà uvey ziyà te Nengazen he Megbevayè tew ne pemineǥa nu is langun he egkeǥiyen din. Ne tudtula nu ziyà te kenami is langun he egkeǥiyen din, su ebpemineǥen dey wey edtumanen dey heini.’

Josue 1:16

Ne midtavak dan si Josue te, “Ebeelan dey is langun he migkaǥi nu, ne edhendiyè key te minsan hendei he ebpeveyaan nu kenami.

Josue 24:24

Midtavak is menge etew te, “Edsilbiyan dey is Nengazen he Megbevayè dey, ne edtumanen dey is menge suǥù din,”

Josue 24:26

Insurat din heini ziyà te Libru te Kesuǥuan te Megbevayà. Ne migkuwa sikandin te zekelà he vatu ne impelastar zin diyà te lempek te kayu he ulayan he uvey te segradu he lugar te Nengazen.

Zatù 10:6

Mid-uman en maan mebaal is menge Israilihanen te mezaat he igkepauk te Nengazen. Mid-iniyuǥan dan is Nengazen su iyan dan mid-azap is menge ledawan te ed-ezapen he si Baal wey si Ashtoret, wey is menge ed-ezapen diyà te Aram, Sidon, Moab, Ammon, wey Filistia.

Zatù 2:11

Mibaal te mezaat diyà te etuvangan te Nengazen is menge Israilihanen wey mid-azap dan is ledawan te ed-ezapen he si Baal.

Zatù 2:13

Su mid-iniyuǥan dan sikandin ne nenilbi zan ki Baal wey ki Ashtarot.

1 Samuel 12:10

Mibuyù dan te tavang diyà te Nengazen. Ke sikandan te, ‘Nekesalè key, Nengazen. Mibelaǥad dey sikew su iyan mid-azap dey is ledawan ni Baal wey ni Ashtoret. Piru ǥuntaan, luwasa key puun te gehem te menge kuntada zey, ne ed-ezapen dey sikew.’