Jeremias 17:25 - Manobo Western Bukidnon OT

²⁵ ne layun duen egkahadì kayi te Jerusalem he kevuwazan ni David. Ed-untud is hadì wey menge upisyal zin te menge kerwahi wey menge kudà ne ebparid sikandan pinaaǥi te kedselang te menge pultahan te inged, duma te menge etew te Juda wey Jerusalem. Ne heini is inged he Jerusalem egkeubpaan taman te taman.

Jeremias 17:25 ပူးပေါင်းရင်းမြစ်များ

2 Samuel 7:16

Ebpedayun te wazà pidtemanan is kenikew he ginhedian, ne is menge kevuwazan nu taman te taman is kedhadì dan.’ ”

2 Samuel 8:4

Naaǥew eni David is 1,000 he menge kerwahi zan, 7,000 he ebpemen-untud te kerwahi, wey 20,000 he menge sundaru. Mibpemiangan eni David haazà is menge kudà he eguyud te kerwahi gawas te 100 he insamè din su egemiten din.

Exodus 12:14

“Ne heini he andew, ne tentenuzi niw heini minsan keenu. Silibraha niw heini kada tuig he iyan pista te kebeǥayi niw kedì te zengeg. Heini he sulunuzen, ne kinahanglan he edtumanen niw taman te peleebuten he menge lapis te kevuwazan.

Isaias 9:7

Wazà pidtemanan is ked-uswag te kedumala zin, ne layun dà melinawen heini. Ebpengevilinen din is ginhedian ni David. Ibpemelig-en din heini ne edhedian din he zuen hustu he kukuman wey ketazeng he wazà pidtemanan. Edsigureduwen te Nengazen he Mekeǥeǥehem he metuman heini.

Jeremias 13:13

Keǥiyi nu sikandan he iyan heini ibpesavut ku: Edsilutan ku is langun he meǥinged kayi he tanà ragkes is menge hadì, he menge kevuwazan ni David, menge memumuhat, menge ebpeneuven wey is langun he meǥinged te Jerusalem. Edhimuwen ku sikandan he iring te egkengelangut.

Jeremias 22:2

‘He hadì te Juda, he kevuwazan ni David, pemineǥa nu heini is menge lalag te Nengazen. Ipepemineg nu is menge upisyal nu wey is menge etew nu he kayi ebayà te menge ǥemawan te turuǥan.

Jeremias 22:30

Su iyan heini migkaǥi zin, “Idsurat he heini si Jehoyakin wazè din anak, su wazà minsan sevaha zuen te menge anak din he ebpekepengevilin te kedhedii ni David te Juda. Heini he etew ebpengungubpaan he kenà ebmeuswaǥen.”

Jeremias 22:4

Su emun edtumanen niw heini he menge suǥù, ne layun duen egkahadì kayi te Jerusalem he kevuwazan ni David. Ed-untud is hadì te menge kerwahi wey menge kudà, ne ebparid pinaaǥi te kedselang te menge pultahan kayi te turuǥan, duma te menge upisyal wey menge etew zin.

Jeremias 25:5

Migkaǥi is Nengazen pinaaǥi te menge ebpeneuven din te, “Engkezi niw en is mezaat he menge vetasan niw wey menge ulaula niw su para meubpai niw taman te taman heeyan is tanà he imbeǥey ku keniyu wey te menge kepuun niw.

Jeremias 33:15

Dutun he timpu iyan ku ibpezumala is metazeng he hadì he kevuwazan ni David. Ne ebeelan din is metazeng wey hustu kayi te tivuuk he tanà.

Jeremias 33:17

Mibpedayun megkaǥi is Nengazen te, “Layun duen kevuwazan ni David he edhadì te menge etew te Israel.

Jeremias 33:21

Ne iring daan keniyan is kebpekid-uyun ku ki David he suluǥuen ku, he iyan is layun din duen kevuwazan he egkehimu he hadì. Ne iring din daan is menge memumuhat he kevuwazan ni Levi ebpenilbi ǥihapun sikandan kediey.

Jeremias 7:3

Iyan heini migkaǥi te Nengazen he Mekeǥeǥehem, he Megbevayà te Israel: Helina niw en is menge vetasan niw wey menge ulaula niw, su para ibpeubpè ku zed sikiyu kayi he lugar.

Jeremias 7:7

Emun egkeveelan niw heini, ibpeubpè ku ǥihapun sikiyu kayi te tanà he imbeǥey ku ziyà te menge kepuun niw te wazà pidtemanan.

Deuteronomio 17:16

Kinahanglan he kenà ebpekehebeten te hadì niw is menge kudè din wey kenè din ipelikù diyà te Ehipto is menge etew zin te kebpemasa te menge kudà, su is Nengazen he Megbevayè niw migkaǥi ziyà te keniyu te kenè kew en likù diyà.

1 Samuel 8:11

Ke sikandin te, “Iyan heini ebeelan te hadì he ed-uwit keniyu: egkuwaan din is menge anak niw he maama ne edsunderuwen din. Is duma edhimuwen din he menge pereuntud te kerwahi, is duma ne iyan pereuntud te kudà, ne is duma ne iyan edhuna zutun te menge kerwahi.