Jeremias 11:17 - Manobo Western Bukidnon OT

¹⁷ Is Nengazen he Mekeǥeǥehem iyan midtukud te Juda wey Israel, iyan, guntaan midsuǥù sikandin he zezeeti heini tenged te mezaat he menge vaal te menge etew kayi. Midhimu zan he mepauk sikandin tenged te kebpemuhata zan ki Baal pinaaǥi te kedtutung te veyewà.

Jeremias 11:17 ပူးပေါင်းရင်းမြစ်များ

2 Samuel 7:10

Mibeǥayan ku en is menge etew ku he Israilihanen te ubpeey he pirmeninti, para zuen dan en keugelingen he ubpeey he wazè en ebpekesamuk kandan wey ebpekezaagdaag iring duen te nehuna,

2 Cronica 28:25

Midtukud daan sikandin te menge simbahan diyà te metikang he menge lugar ziyà te langun he menge inged he sakup te Juda su wey zin mepemuhat is duma he menge ed-ezapen. Ne utew heini ingkepauk te Nengazen, he Megbevayà te menge kepuun din.

Salmo 44:2

he mibpenegseg nu is menge etew he wazà medtuu kenikew ne iyan nu impeubpà diyà te ed-ubpaan dan is menge kepuun dey. Impaantus nu haazà he menge etew ne impeuswag nu mulà is menge kepuun dey.

Salmo 80:15

he iring te pinemula he paras he impemula nu pinaaǥi te ǥehem nu. Tentenuzi key kenikew is menge anak nu he impehitindeg nu su para mevantug ka.

Salmo 80:8

Sikami is menge etew nu, neiring key te pinemula he paras he migkuwa nu ziyà te Ehipto ne impemula nu ziyà te tanà te menge etew he midsegseg nu.

Isaias 5:2

Mid-eradu zin heini wey mibpen-awè din is menge vatu zuen, ne mibpemulaan din te utew meupiya he menge paras. Mibaal sikandin te ubpeey te ebantey ziyà te teliwazà kayi te pemuleey, ne mibpevudsiyan din is batu he para egkeresan te paras. Midtaǥad sikandin he mebeǥas heini te meemis, piru mibeǥas heini te mepezes.

Jeremias 1:14

Ne zutun migkaǥi is Nengazen kayi te kedì te, “Duen kezeetan he ebpuun diyà te zizaya he egkeseǥazan te langun he ed-ubpà kayi he tanà.

Jeremias 11:11

Umbe siak, is Nengazen, migkaǥi a te ibpaaǥi ku ziyà te kandan is kezeetan he kenè dan egkelikayan. Ne minsan ebuyù pa sikandan te tavang kayi te kediey ne kenè ku sikandan ebpemineǥen.

Jeremias 11:13

“He menge tig-Juda, utew mezakel is menge ed-ezapen niw, iring kezakel te menge inged niw. Ke sengemenu kahabet is menge zalan diyà te Jerusalem ne iyan daan kahabet te menge pemuhatà he para edtutungan niw te veyewà he para te utew mezaat he ed-ezapen he si Baal.

Jeremias 12:2

Midtuvazan nu sikandan iring te kayu he nendalid he midtuvù wey nemeǥas. Ne pinaaǥi zà te vèbà is kebeǥayi zan kenikew te zengeg ne kenà diyà ebpuun te ǥehinawa zan.

Jeremias 18:15

Piru is menge etew ku nelipatan e zan en. Midtutungan dan te veyewà is wazè din pulus he menge ed-ezapen. Mid-ewaan dan is hustu he zalan he kezaan en ne ziyè dan med-ikul te kenà hustu he zalan ne zutun sikandan meseligkat.

Jeremias 18:8

ne is menge meǥinged dutun te nasyun etawa ginhedian ed-engked te kelelalung, kenè ku edleusen is pelanu ku te kedezaat kandan.

Jeremias 19:15

“Pemineg kew, su iyan heini migkaǥi te Nengazen he Mekeǥeǥehem, he Megbevayà te Israel: Ibpaaǥi ku kayi he inged wey ziyà te menge inged he nekeelingkus kayi is kezeetan he nekaǥi ku he idezaat kandan, geina te utew sikandan mesinupaken ne wazè dan mebpemineg te menge lalag ku.”

Jeremias 2:21

Iring kew man pezem te meupiya he klasi te paras he impemula ku. Piru neiring kew te leew he paras he wazè din pulus.

Jeremias 24:6

Ebentayan ku sikandan wey ed-eturen ku, ne idlikù ku sikandan kayi he tanà. Ibpeuswag ku sikandan ne kenè ku en edezeetan. Edlig-enan ku sikandan ne kenè ku ebpilayen.

Jeremias 26:13

Umbe, beǥuwa niw en is betasan niw wey menge vaal niw, ne sunuza niw is Nengazen he Megbevayè niw. Su emun ebeelan niw heini kenà edleusen te Nengazen is kezeetan he nekaǥi zin he ebpekesuǥat keniyu.

Jeremias 26:19

Ne midhimetayan be sikandin ni Hezekia wey te minsan hentei kayi te Juda? Wazà! Su midtahud ni Hezekia is Nengazen ne midangep diyà te kandin. Umbe wazà leusa te Nengazen is kezeetan he migkaǥi zin he ebpekesuǥat kandan. Ne ǥuntaan emun edhimetayan niw si Jeremias, ne iyan kew mismu ed-uwit te mekahandekhandek he idsilut keniyu.”

Jeremias 32:29

Edselezan dan heini he inged ne ebinsulan. Elin daan ebinsulan dan is menge valey he zutun te atep dan edtutungen is beyewà para ki Baal. Ne zutun daan edhalad dan te idhalad he menge inumen para te zuma he menge ed-ezapen he utew ku ingkeepes.

Jeremias 32:30

“Puun pa zengan wazà duma he vaal te menge etew ziyà te Israel wey Juda, kekenà, pudu kebaal te salà. Midhimu zan he mepauk a pinaaǥi te menge vaal zan.

Jeremias 35:17

Umbe, siak, is Nengazen he Megbevayà he Mekeǥeǥehem, he Megbevayà te Israel, migkaǥi te: Pemineg kew! Is menge etew ziyà te Juda wey Jerusalem, ibpaaǥi ku ziyà te keniyu is langun he kezeetan he migkaǥi ku he idezaat keniyu. Mibpekidlalag a keniyu piru wazà a keniyu pemineǥa; mid-umew ku sikiyu piru wazè kew medtavak.”

Jeremias 36:7

Su kela ke pinaaǥi kayi edangep sikandan diyà te Nengazen, ne ed-engkezan dan is mezaat he vetasan dan. Su mibpetizeenan en sikandan te Nengazen he edsilutan sikandan tenged te utew zin kegkepauk.”

Jeremias 40:2

Hein naahà ni Nebuzaradan si Jeremias, migkeǥiyan din si Jeremias te, “Is Nengazen he Megbevayè nu migkaǥi he edezeetan din is Jerusalem.

Jeremias 40:3

Ne ǥuntaan nehitavù en heini; mibeelan iyan te Megbevayà is migkaǥi zin. Nehitavù heini is langun su ǥeina te mibaal kew te salà diyà te Nengazen, ne wazè kew mebpezumazuma kandin.

Jeremias 42:10

Emun kenè kew ed-awà kayi he tanà ed-enawen ku sikiyu wey edlig-enan, ne kenè ku sikiyu edezeetan. Su ingkeseeng ku is kezeetan he impeseǥazan ku keniyu.

Jeremias 44:5

piru wazè dan pemineǥa wey pezumdumahi is menge ebpeneuven. Wazè dan engkezi is kelelalung dan wey is kedtutung dan te veyewà para te zuma he menge ed-ezapen.

Jeremias 44:8

Maan is midhimu niw he mepauk a pinaaǥi te kebaal niw te menge ed-ezapen? Edtutung kew pa te veyewà para kayi zini te Ehipto he iyan ed-ubpaan niw guntaan. Pinaaǥi kayi midezeetan niw is keugelingen niw wey midhimu niw he telemayen wey mekeeled-eled diyà te etuvangan te menge etew ziyà te langun he nasyun kayi te kelibutan.

Jeremias 45:4

“Baruc, migkaǥi pa is Nengazen te, ‘Ebengkaǥen ku is nasyun he mibangun ku. Ebezuten ku is impemula ku. Ebeelan ku heini ziyà te tivuuk he tanà.

Jeremias 7:18

Ebpengayu is menge vatà, ne idtetavun haazà te menge amey zan, ne is menge vahi ebmasa te herina, su ebeelan dan he supas para te ed-ezapen he egngezanan te Rayna ziyà te Langit. Ebpemuhaten dan daan te inumen is duma he menge ed-ezapen su wey a mepauk.

Jeremias 7:9

Nenakew kew, nememunù, nengumpadi, nenangdù te tarù, midtutung te veyewà diyà te ki Baal, wey mid-azap kew te zuma he menge ed-ezapen he wazè niw ganì mekilala.

Ezekiel 17:5

“Ne hein nepasad migkuwa haazà is kulaǥu te lisu he ebpuun diyà te tanà he Israel ne impemula zin heini ziyà te egkeveluyan he tanà he kilid te wahig ne zutun utew meǥaan is kedtuvù din.

Hoseas 10:1

“Is menge tig-Israel, iring te pinemula he paras he merapung wey mahabet is menge veǥas din. Dutun te ked-uswag dan, mezakel he menge pemuhatà is mibeelan dan, ne mibpekekempet dan is tedeman he menge vatu he ed-ezapen dan.