Isaias 66:23 - Manobo Western Bukidnon OT

²³ Ne kada kebpuun te hayag wey kada Andew te Kedhimeley ne ed-azap kedì is langun he menge etew. Iyan a, is Nengazen, is egkaǥi kayi.

Isaias 66:23 ပူးပေါင်းရင်းမြစ်များ

2 Hadì 4:23

Mid-insà is esawa zin te, “Maan is edhendiyè ka ǥuntaan he andew te kenè man heini Pista te Kebpuun te Hayag etawa Andew te Kedhimeley?” Midtavak haazà is bahi te, “Maambe en.”

Salmo 22:28

Su iyan ka hadì, ne iyan ka edumala te menge nasyun.

Salmo 65:2

Is langun he menge etew ed-uvey ziyà te kenikew su edtevaken nu is menge kebpengemuyù dan.

Salmo 65:3

Minsan mahabet is menge salè dey, ebpeseyluwen key ǥihapun kenikew.

Salmo 86:9

Edsimba kenikew is langun he menge etew ziyà te menge nasyun he midlimbag nu. Ne edeliǥen ke zan.

Isaias 19:21

Ibpekilala te Nengazen is keugelingen din diyà te kandan, ne zutun he timpu egkilelaan dan is Nengazen. Ed-ezapen dan sikandin pinaaǥi te kebpemuhat te nekedseselekawà he menge pemuhat. Ebpenaad dan diyà te Nengazen ne edtumanen dan heini.

Isaias 19:23

Dutun he timpu zuen meluag he zalan he ebpuun te Ehipto pehendiyà te Asiria. Umbe ebpekedsusuvar zà is menge Ehiptohanen wey menge Asiryanhen, ne edsevaha sikandan te kedsimba.

Isaias 2:2

Diyà te huziyan he menge andew, sikan is buvungan he edhitindeǥan duen te valey te Nengazen egkehimu he lavew he impurtanti te langun he menge vuvungan. Ne ebpekeuma kayi he vuvungan is mahabet he menge etew he ebpemuun diyà te langun he menge nasyun.

Isaias 27:13

Dutun he timpu ibpezaǥing is mezaǥing he vudyung. Ne ebpemenlikù diyà te Jerusalem is menge Israilihanen he nekaantus te kegkevihaǥa kandan diyà te Asiria wey Ehipto. Ne ed-ezapen dan is Nengazen, diyà te segradu he vuvungan diyà te Jerusalem.

Isaias 49:7

Is Nengazen, he Menluluwas wey Waǥas he Megbevayà te Israel, migkaǥi sikandin diyà te etew he edsudien wey igkeremerik te menge etew ziyà te menge nasyun, wey te suluǥuen te menge pengulu. Ke sikandin te, “Egkaahà te menge hadì ke hentei ka ne edhitindeg sikandan te kedtahud kenikew. Is menge pengulu edunghuy te kebeǥey te zengeg kenikew. Egkeulaula heini tenged kediey te Nengazen he metinumanen, he iyan kes Waǥas he Megbevayà te Israel. Iyan a mibpilì kenikew.”

Ezekiel 20:40

Su ebpekepenilbi kediey is langun he menge etew te Israel ziyà te segradu he vuvungan ku, he iyan kes metikang he vuvungan diyà te Israel. Dutun edewaten ku sikiyu wey ibpepemuhat ku te nekedseselekawà he menge pemuhat wey te ispisyal he menge gasa.

Ezekiel 45:17

Ketengdanan te pengulu is kebeǥey te menge pemuhat he edtutungen, pemuhat he para gasa, pemuhat he inumen, pemuhat he para idlumpiyu, wey pemuhat he para te meupiya he kedepità dutun te timpu te menge pista iring te Pista te Kebpuun te Hayag, menge Andew te Kedhimeley, wey zuma pa he menge pista he edsilibrahan te menge Israilihanen. Ibpemuhat heini he menge pemuhat su wey mevelukasi is menge Israilihanen tenged te menge salè dan.”

Ezekiel 46:1

Migkaǥi pa is Nengazen he MEGBEVAYÀ te, “Is beyeey pehendiyà te seled he lama he ebpekesinaru ziyà te edsilaan, kinahanglan he siradu seled te heenem he andew he iyan timpu te kedterebahu, piru ed-ebriyan heini emun Andew te Kedhimeley wey emun Pista te Kebpuun te Hayag.

Ezekiel 46:6

“Kada Pista te Kebpuun te Hayag mebpemuhat is pengulu: sevaha he turiti he vaka, sevaha he meǥurang en he kerehidu, wey heenem he nati he kerehidu he meemahan he pudu wazè dan sazir.

Zacarias 14:16

Is langun he egkesamà diyà te menge nasyun he nenurung te Jerusalem edtekezeg diyà te Jerusalem kada tuig su ed-ezapen dan is Nengazen he Mekeǥeǥehem he iyan hadì, wey edsilibra sikandan te Pista te Kebaal te menge Lawig.

Zacarias 14:18

Is menge etew ziyà te Ehipto he kenà edhendiyà te Jerusalem, ebpeeǥiyan daan te Nengazen te kezeetan iring te ibpaaǥi zin diyà te menge nasyun he kenà edhendiyà te kedsilibra te Pista te Kebaal te menge Lawig.

Zacarias 14:19

Iyan heeyan idsilut diyà te Ehipto wey ziyà te langun he menge nasyun emun kenè dan edhendiyà te Jerusalem te kedsilibra te Pista te Kebaal te menge Lawig.

Malakias 1:11

Ebentuǥen a ziyà te menge nasyun puun te kedsilà te andew pehendiyà te kedsanlep kayi. Ebpemuhaten a te veyewà wey lunsey he menge pemuhat diyà te langun he lugar, su ebentuǥen a ziyà te menge nasyun. Iyan a, is Nengazen he Mekeǥeǥehem, is migkaǥi kayi.