Isaias 61:7 - Manobo Western Bukidnon OT

⁷ Kenè kew egkepeel-elezan, kekenà, egketakep is tuvad he egkezawat niw puun te tanè niw, ne igkelipey niw haazà is egkezawat niw. Is kelipey niw ebpedayun taman te taman.

Isaias 61:7 ပူးပေါင်းရင်းမြစ်များ

2 Hadì 2:9

Ne hein nekelayun dan en, migkeǥiyan ni Elias si Elisha te, “Hengkey is egkesuatan nu he ebeelan ku kayi te timpu he wazè e pa iawà diyà te kenikew?” Midtavak si Elisha te, “Egkesuatan ku he metakep is gehem nu he egkesunud ku.”

Job 42:10

Ne hein ingkaampù ni Job haazà is menge emiǥu zin, impeuman sikandin ipeuswag te Nengazen ne midtakep din sikan is nehuna he imbeǥey zin ki Job.

Salmo 126:5

Berakat he sikan is nekesineǥew hein timpu te ked-ezek din, ne mebmelipayen emun edraǥun en.

Salmo 16:11

Ipenurù nu kediey is paaǥi wey ku maangken is ebpedayun he untung. Ne tenged te kebpekiduma nu kediey, wazè en kurang te kelipey ku; wazà pidtemanan te kelipey ku ziyà te avey nu.

Isaias 35:10

Heini is menge nevelukasan te Nengazen edlikù sikandan diyà te Jerusalem is ebpemenganta. Melipayen dan layun; egkaawè en is menge seeng dan wey menge kegkerasey zan.

Isaias 40:2

Lelaǥi niw te menayù is menge etew ziyà te Jerusalem. Tudtula niw kandan he nepasad en is kegkerasey zan wey nepesaylu en is menge salè dan. Su nezawat dan en is silut he para te langun he menge salè dan.”

Isaias 51:11

Edlikù diyà te Zion is menge etew he midlibri nu he ebpemenganta he kenà egkeengked is kegkelipey zan. Egkaawè en is kegkeseeng dan, ne utew subra is kegkelipey zan.

Isaias 54:4

Kenè ka mahandek su kenè ka egkepeel-elezan. Egkelipatan nu is kegkeeled-eled nu hein betan-en ke pa wey is kegkevalu nu.

Isaias 60:15

Minsan inselikwey ka wey midumutan, wey wazà edseǥipà kenikew zengan, edhimuwen ku he mevantug ka te wazà pidtemanan, wey igkelipey te langun he lapis te kevuwazan.

Isaias 60:21

Is langun he menge etew nu egkehimu he metazeng, ne egkaangken dan is tanà he Israel taman te taman. Midlimbag ku sikandan; iring sikandan te pinemula he impemula ku su wey a meveǥayi te zengeg.

Isaias 65:13

Umbe, siak, is Nengazen he MEGBEVAYÀ migkaǥi a te, ‘Ebpekekaan wey ebpekeinum is menge suluǥuen ku, piru sikiyu mulà egkevitil wey egkemezahan kew. Egkelipey zan mulà piru sikiyu ebpeel-elezan kew.

Zefanias 3:19

Dutun he andew, edsilutan ku is langun he midlisedlised keniyu. Edlibriyen wey edtiǥumen ku sikiyu is iring te menge kerehidu he nengepiangan wey nekedsusuwey. Mibpeel-elezan kew zengan, piru ebeǥayan ku sikiyu te zengeg wey edhimuwen ku he mevantug kew kayi te tivuuk he kelibutan.

Zacarias 8:12

Ke ebpemula kew ne zuen kelinew. Ebpemeǥas is menge paras, duen egkeraǥun diyà te tanà, ne zuen en dehemug. Heini is langun, ibeǥey ku ziyà te keniyu te egkengesama, ne egkaangken niw heini.

Zacarias 9:12

Sikiyu is menge nevihag he ebperateng he mekelingkawas, likù kew en diyà te melig-en he menge lugar. Ǥuntaan egkaǥi a ziyà te keniyu he idlikù diyà te keniyu he edtekepen is naawà diyà te keniyu.

Deuteronomio 21:17

Kinahanglan he egkilelaan din is kegkekakey zuen te kinekekayan he anak din minsan wazè din mahala is bahi he teǥianak duen. Ne ke sengemenu kezekelà is bahin te zuma, ne tekepa zin is ibahin din kandin su iyan sikandin nehuna he anak din ne zuen din ketenged te kedawat te vahin he para te kinekekayan he anak.