Isaias 6:7 - Manobo Western Bukidnon OT

⁷ Ne indegkit din haazà diyà te vèbè ku; ke sikandin te, “Indegkit heini ziyà te vivig nu, ne ǥuntaan wazè nu en salà su mibpesaylu ke en.”

Isaias 6:7 ပူးပေါင်းရင်းမြစ်များ

Isaias 40:2

Lelaǥi niw te menayù is menge etew ziyà te Jerusalem. Tudtula niw kandan he nepasad en is kegkerasey zan wey nepesaylu en is menge salè dan. Su nezawat dan en is silut he para te langun he menge salè dan.”

Isaias 43:25

“Iyan a mismu mid-awà te menge salè nu su para meveǥayi a te zengeg, ne kenè ku en heini edtentenuzan.

Isaias 53:10

Piru egkasuatan te Nengazen he edresayen wey ibpaantus sikandin. Piru minsan midhimu te Nengazen is untung din he pemuhat para meveyazi is salà te menge etew, egkeehè din ded is menge kevuwazan din wey ebpekaangken ded sikandin te meluǥayad he untung, ne pinaaǥi kandin egketuman is egkesuatan te Nengazen.

Isaias 53:5

Iyan tutuu is, mibpelian sikandin tenged te menge kedrapas tew; nevuǥel sikandin tenged te kelelalung tew. Is silut he mid-antus din iyan nekeveǥey kenitew te meupiya he kebpekesavuk; ne pinaaǥi te menge palì din nengeulian kiw.

Isaias 53:6

Iring kiw is langun te nengetazin he menge kerehidu; is kada sevaha kenitew ne iyan en mibeelan din is egkesuatan din. Piru iyan sikandin impaantus te Nengazen te silut he para pezem kenitew te langun.

Isaias 57:19

Ne zutun ebpekezalig dan kedì. Ebeǥayan ku sikandan te meupiya he kebpekesavuk, ke ziyè dan man te meziyù etawa ziyè dà te uvey. Ebewian ku sikandan wey zan meulii. Iyan a, is Nengazen, is migkaǥi kayi.

Jeremias 1:9

Ne migkevit te Nengazen is bèbè ku he ke sikandin te, “Idsavuk ku guntaan diyà te vèbè nu is menge lalag ku he egkeǥiyen nu.

Daniel 10:16

Ne, heini is henduen be te etew, migkevit din is bivig ku ne human a mekekaǥi. Migkeǥiyan ku haazà is edhithitindeg diyà te etuvangan ku te, “Datù, selakew is keǥezamgezam ku wey edluyahan a tenged duen te nelewasan ku.

Zefanias 3:9

Ne zutun ebeg-uwen ku is menge etew su wey zan pudu medangep kayi te kedì ne egkesevaha zan is ebpenilbi kedì.

Zacarias 3:4

Umbe, migkaǥi haazà is belinsuǥuen diyà te zuma he menge velinsuǥuen he ebpemenhitindeg diyà te etuvangan ni Josue te, “Luwasa niw is meremerik he visti zin.” Ne migkeǥiyan din si Josue te, “In-awè ku en is menge salè nu. Ne ǥuntaan ebistiyan ku sikew te veǥu he visti.”

Numero 16:46

Ne migkeǥiyan ni Moises si Aaron te, “Kuwaa nu is teleǥuey nu te veyewà ne teǥui nu te veyewà wey vaǥa he ebpuun diyà te pemuhatà. Ne gaanggaan ka hendiyà te menge etew ne veeli nu is tulumanen su wey zan mevelukasi te menge salè dan, su nepauk en is Nengazen ne ebpuun en is limas.”