Isaias 57:2 - Manobo Western Bukidnon OT

² Emun ebpatey is etew he metazeng, ebpekehimeley en sikandin wey ebmelinawen en.

Isaias 57:2 ပူးပေါင်းရင်းမြစ်များ

Genesis 17:1

Ne hein 99 en is penuiǥen ni Abram, mibpaahà kandin is Nengazen ne migkaǥi kandin te, “Siak, iyan a Megbevayà he Mekeǥeǥehem. Sunuza nu is menge penurù ku ne kinahanglan he wazà igkesewayi kenikew.

2 Cronica 16:14

Inleveng sikandin diyà te penlevengà he mibpeveelan din para te keugelingen din diyà te Inged ni David. Impehizeǥè dan sikandin diyà te hizeǥeey he zuen duen nekedseselekawà he menge pehemut, wey midtetavun is menge etew te zekelà he hapuy para te kebeǥayi kandin te zengeg.

Job 3:17

Diyà te lugar te menge minatey, is menge lalung kenè en ebaal te kelelalung, ne is nengeveley nemekehimeley en.

Salmo 37:37

Ne ahaa nu purungi is etew he wazà duen igkesawey he ebpengungubpaan te hustu wey melinew. Duen din mulà meupiya he egkepaabut.

Megwewali 12:7

Edlikù ka ziyà te tanà he iyan mibpuunan nu, ne sikan is gehinawa he mibeǥey kenikew te untung ne edlikù diyà te Megbevayà he iyan mibeǥey kayi.

Isaias 14:18

“Is langun he menge hadì kayi te kelibutan duen dengeg te kebpelestara kandan diyà te menge leveng dan.

Isaias 26:7

“Patag is dalan te menge metazeng, ne iyan ka is Metazeng he Megbevayà, mibpekeupiya kayi.

Jeremias 6:16

Ne heini pa is migkaǥi te Nengazen: “Hitindeg kew ziyà te lembaǥan te menge zalan ne purung kew pekisusi. Insè kew ke hendei is kezaan wey meupiya he zalan he meupiya he ed-ikulen, ne zutun kew ikul. Emun ed-ul-ulahan niw heini ne ebpekaangken kew te kelinew. Piru migkaǥi kew te, ‘Kenè key mulà keniyan ed-ikul.’

Ezekiel 32:25

Duen dutun lugar he para zuen te hadì te Elam duma te menge minatey te tebek. Neliǥuy is leveng din te menge leveng te menge etew zin. Mibpematey te tebek sikandan is langun he wazà medtuu te Megbevayà. Uya, igkikinehendekà sikandan te menge etew hein uuyag dan pa, piru ǥuntaan nepeel-elezan sikandan wey neketetayhad duma te nemematey te tebek.

Daniel 12:13

“Ne sikew Daniel, leusa nu is menge vaal nu. Ebpatey ka piru ebenhawen ka te ketepusan he menge andew su para mezawat nu is bales te menge vaal nu he inteǥana para kenikew.”