Isaias 49:9 - Manobo Western Bukidnon OT

⁹ Egkeǥiyan nu is menge Israilihanen he vinihag wey pinirisu ziyà te merusirem he lugar te, ‘Gawas kew! Su gewasnen kew en!’ “Ne egkeiring sikandan te menge kerehidu he ebpemenabtab diyà te kilid te menge zalan wey menge vuvungan he mehiǥawan dengan.

Isaias 49:9 ပူးပေါင်းရင်းမြစ်များ

Salmo 102:20

su para mezineg din is dag-es te menge etew zin he menge vinihag ne wey zin melibri is menge etew zin he ebpenhimetayan.

Salmo 146:7

Is kedhukum din ne edapig diyà te menge edèdaaǥen. Wey iyan sikandin ebeǥey te keuyaǥan te langun he egkinahanglan kayi. Ibpelingkawas din is menge vihag,

Salmo 22:26

Egkaan is menge egkaayuayu ne egkahantey sikandan. Is menge etew he midangep diyà te kenikew ne edalig kenikew. Berakat he mebmeupiya wey mebmeluǥayad is untung dan.

Salmo 69:33

Ebpemineǥen te Nengazen is menge egkaayuayu, ne kenè din egkelipatan is menge etew zin he mibihag.

Isaias 41:18

Ibpetudè ku is dekelà he menge wahig diyà te zemilag he menge vuvungan wey ibpelepew ku is menge serebseb diyà te menge suǥud. Edhimuwen ku he wehiǥen is disirtu, ne is memaza he tanà edhimuwen ku he zuen dutun teheb.

Isaias 42:16

Ed-eǥaken ku is lakap he menge etew ku pehendiyà te ketutuanan, diyà te zalan he wazè dan pa zuen hanew wey wazè dan pa meikul. Is kerusireman diyà te veyeey zan edhimuwen ku he kerayag, ne ebpetaǥen ku is menge ebpemukbuketur he menge lugar ziyà te edhipenawan dan. Ebeelan ku heini, ne kenè ku sikandan idselikwey.

Isaias 42:7

su wey mekaahà is menge lakap ne wey zaan ikepeǥawas is menge vihag, he nengepirisu ziyà te merusirem he pirisuwan.

Isaias 48:17

“Migkaǥi is Nengazen he Menluluwas niw, he iyan kes Waǥas he Megbevayà te Israel: Iyan a kes Nengazen he Megbevayè niw, nenurù keniyu ke hengkey is meupiya para keniyu wey migiya keniyu pehendiyà te hustu he zalan.

Isaias 5:17

Is nevengkag he menge inged he iyan mid-ubpaan te menge sepian, egkehimu he penebtavà te kerehidu.

Isaias 61:1

Is Mulin-ulin te Nengazen he MEGBEVAYÀ ne kayi te kediey. Su mibpilì e zin he ibpewali te meupiya he tudtulanen diyà te menge pubri. Midsuǥù e zin te kedlipey te egkengeseeng wey kebpenudtul ziyà te menge vihag wey menge pirisu he ebpekeǥawas dan en.

Isaias 65:13

Umbe, siak, is Nengazen he MEGBEVAYÀ migkaǥi a te, ‘Ebpekekaan wey ebpekeinum is menge suluǥuen ku, piru sikiyu mulà egkevitil wey egkemezahan kew. Egkelipey zan mulà piru sikiyu ebpeel-elezan kew.

Isaias 9:2

Is menge etew keniyan he nerusireman, ebpekaahà te utew merayag. Is menge nerusireman he egkahandek he ebpatey, egketeyawan.

Ezekiel 34:23

Ebeǥayan ku sikandan te sevaha he tig-elima he kevuwazan te suluǥuen ku he si David. Iyan sikandin ed-atur wey egkehimu he ed-elima.

Ezekiel 34:29

Ebeǥayan ku sikandan te tanà he egkevantug te kegkeselebpeten din su wey zan kenè en bitila wey sudia te menge etew ziyà te zuma he menge nasyun.

Joel 3:18

Dutun he timpu ebewian ku sikiyu. Ed-uzaren kew te veǥu he vinu he ebpuun diyà te mezakel he menge paras diyà te menge vuvungan. Ed-uzaren kew zaan te ǥatas he ebpuun diyà te mezakel he menge vaka wey menge kambing he ebpemenabtab diyà te menge mibuntud-buntud. Kenà egkemezahan is menge wahig niw. Ne edtudà is serebseb he ebpuun diyà te valey te Nengazen ne egkewehiǥan din is menge zal-ug he zuen duen menge acacia.

Leviticus 25:54

Emun kenà sikandin egkelekat te iring kayi he paaǥi, egkelibri ǥihapun sikandin wey is menge anak din dutun te Tuig te Kebeǥey te Bayàbayà wey Ked-ulì.

Micas 5:4

Edumala heini he pengulu ne ed-elimahan din is menge etew te Israel he iring sikandin te perevantey te menge kerehidu. Edhimuwen din heini pinaaǥi te zesen wey gehem te Nengazen he Megbevayè din. Ne ebpengungubpaan is menge etew zin he wazè dan igkahandek su egkilelaan te menge etew te tivuuk he kelibutan is kegkemekeǥeǥehem din.

Deuteronomio 32:13

Impevayàbayà din sikandan te menge vuvungan wey impekaan din te menge abut te tanà. Mid-uyag din sikandan te teneb he ebpuun te kelendiǥan wey lana te ulibu he nenuvù diyà te betuwen he tanà.