Isaias 45:2 - Manobo Western Bukidnon OT

² Ebpetelihuna a su ed-endamen ku is beyeey nu, ne ebpetaǥen ku is menge vuvungan. Ebengkaǥen ku is menge pultahan he brunsi wey is putew he menge trangka kayi.

Isaias 45:2 ပူးပေါင်းရင်းမြစ်များ

Salmo 107:16

Su mibpenggevè din is menge ǥemawan he brunsi, wey mibpemadtì din is menge rihas he putew.

Isaias 13:2

Ivayew is sevaha he bendirà diyà te puntur te mehiǥawan he vuntud. Ne zutun kulehia niw te mezaǥing is menge sundaru ne uyawi niw sikandan wey zan mekesurung duen te menge pultahan te inged te menge dungganen he menge etew.

Isaias 14:31

Lelendag kew is menge meǥinged diyà te menge inged he sakup te Filistia. Su zuen edsurung keniyu he iring te evel he ebpuun diyà te zizaya ne pudu sikandan memevurut.

Isaias 24:12

Egkevengkag is inged ne kenè en egkepurungan, ne egkengeǥevà is menge pultahan kayi.

Isaias 40:4

Is kada lis-evu, edtembakan te tanà, ne is kada vuntud etawa buvungan, ne ebpenhayen, ragkes is menge lugar he ebpemukbuketur.

Isaias 42:16

Ed-eǥaken ku is lakap he menge etew ku pehendiyà te ketutuanan, diyà te zalan he wazè dan pa zuen hanew wey wazè dan pa meikul. Is kerusireman diyà te veyeey zan edhimuwen ku he kerayag, ne ebpetaǥen ku is menge ebpemukbuketur he menge lugar ziyà te edhipenawan dan. Ebeelan ku heini, ne kenè ku sikandan idselikwey.

Isaias 45:13

Iyan a mismu mibpezumala ki Cyrus te kedtuman te metazeng he tuyù ku. Iyan a metau para hustu is langun he menge paaǥi zin. Ed-umanan din ebenguna is inged ku ne ebeǥayan din te vayàbayà is menge etew ku he menge vinihag. Ebeelan din heini, kenà tenged te edsuhulan sikandin etawa ebprimyuwan.” Iyan a, is Nengazen he Mekeǥeǥehem, is migkaǥi kayi.

Isaias 48:15

Iyan a mismu migkaǥi wey mid-umew kayi te emiǥu ku. Edsuǥuen ku sikandin ne edlampus sikandin te ebeelan din.

Jeremias 28:13

“Genat ka, ne keǥiyi nu si Hanania he iyan heini migkaǥi ku: Mibadtì nu is eyuǥu he kayu piru ed-ilisan ku heini te eyuǥu he putew.

Jeremias 51:30

Ed-engked en he ebpekidtebek is menge sundaru te Babilonia ne ziyè dan dà te kampu zan. Neewaan dan en te zesen ne egkeiring dan te vahi he meluya. Nevinsulan is menge valey ziyà te Babilonia wey nengezeetan is menge terangka te pultahan te menge inged kayi.

Jeremias 51:58

Migkaǥi pa is Nengazen he Mekeǥeǥehem te, “Ebengkaǥen is mekepal he verengbeng te Babilonia, ne ebinsulan is metikang he menge pultahan kayi. Is langun he menge hineǥuan te menge etew kayi egkehimu he wazè din pulus su egkevinsulan dà heini.”

Daniel 5:28

Is Parsin, iyan kehuluǥan din is egkevahin is ginhedian nu ne imbeǥey ziyà te Media wey Persia.”

Daniel 8:4

Neehè ku he ebpemenungey haazà is kerehidu ziyà te minsan hendei he lugar. Ne wazà duma he langgam he ebpekepeengked kandin. Ne wazà ebpekelikey kandin. Umbe ebeelan din en ke hengkey is egkesuatan din te ebaal ne nehimu haazà he mekeǥeǥehem.

Nahum 3:13

Tengtengi niw man is menge sundaru niw–meluya he iring te menge vahi! Is menge trangka te pultahan te inged niw ne nengetutung en, umbe melemu zà heini he edselezan te menge kuntada niw.