Isaias 4:2 - Manobo Western Bukidnon OT

² Egkeuma is timpu he ibpeuswag wey ibpemekempet te Nengazen is menge pinemula ziyà te Israel, ne is menge sebpet dutun te tanà, egkehimu he zengeg wey kelipey te egkesamà he menge etew ziyà te Israel.

Isaias 4:2 ပူးပေါင်းရင်းမြစ်များ

Salmo 67:6

Berakat he mebeǥey te sebpet is tanà. Berakat he edtuvazan kiw te Megbevayè tew. Berakat he edtahud kandin is langun he menge etew ziyà te minsan hendei kayi te kelibutan.

Salmo 72:16

Berakat he mebeǥey te menge abut is tanà minsan is puntur te menge vuntud, ne meiring te Lebanon he utew uuzaran. Berakat he mebmahabet is ebpemen-ubpà diyà te menge inged, meiring sikandan kezakel te menge sagbet diyà te menge vevesukà.

Exodus 28:2

Peveeli nu is suled nu he si Aaron te menge visti he segradu he ebpekeveǥey kandin te zengeg.

Isaias 11:4

ebeǥayan din te metazeng he kukuman is menge pubri ne edlevanan din sikandan pinaaǥi te kebeǥey kandan te ketenged dan. Ne pinaaǥi te kebmandù din, edsilut sikandin kayi te kelibutan ne ebpematey is lalung he menge etew.

Isaias 26:1

Dutun he timpu, heini he kanta egkentahan diyà te Juda: “Melig-en en is inged tew. Is kedlibriya kenitew te Megbevayà ne iring te melig-en he verengbeng he nekeliǥuy kenitew.

Isaias 27:6

Egkeuma is timpu he zutun is menge tig-Israel, he menge kevuwazan ni Jacob, ebpendalid iring te pinemula. Ebpeneringsing heini wey ebpengevukad. Ebpemeǥas heini te mahabet ne ebpekeeneb te tivuuk he kelibutan.

Isaias 30:23

Ebeǥayan kew te Nengazen te uzan dutun te timpu te kebpemula, ne ed-uzaren kew. Dutun he timpu ebpenabtab is menge ayam niw ziyà te meluag he menge penebtavà.

Isaias 45:8

Ebeǥey a te kezeeǥan duma is ketazeng, iring te kebeǥey te langit etawa kivel te uzan. Ne edewaten heini te menge etew kayi te kelibutan. Ebpekelepew is keluwasan wey is kezeeǥan duma is ketazeng iring te pinemula he edtuvù. Iyan a, is Nengazen midhimu kayi.

Isaias 53:2

Egkesuatan te Nengazen he med-uswag is suluǥuen din he iring te pinemula he midtuvù he nendalid diyà te memaza he tanà. Wazè din keguwapu etawa tindeg he ibpekekabig din kenita.

Isaias 60:15

Minsan inselikwey ka wey midumutan, wey wazà edseǥipà kenikew zengan, edhimuwen ku he mevantug ka te wazà pidtemanan, wey igkelipey te langun he lapis te kevuwazan.

Isaias 60:21

Is langun he menge etew nu egkehimu he metazeng, ne egkaangken dan is tanà he Israel taman te taman. Midlimbag ku sikandan; iring sikandan te pinemula he impemula ku su wey a meveǥayi te zengeg.

Isaias 61:11

Is tanà ebpetuvù te venì ne is Nengazen he MEGBEVAYÀ ebeǥey te kezeeǥan duma is ketazeng, ne edeliǥen sikandin te menge etew ziyà te langun he menge nasyun.

Jeremias 23:5

Migkaǥi pa is Nengazen te, “Egkeuma is timpu he ibpahadì ku is sevaha he metazeng he hadì he kevuwazan ni David. Edhadì sikandin he zuen din ketau, ne edhimuwen din is metazeng wey hustu para kayi he tanà.

Jeremias 33:15

Dutun he timpu iyan ku ibpezumala is metazeng he hadì he kevuwazan ni David. Ne ebeelan din is metazeng wey hustu kayi te tivuuk he tanà.

Jeremias 44:14

Ebpematey kew is langun he nengesamà he uuyag he menge tig-Juda he mid-ubpà diyà te Ehipto. Kenè kew en ebpekelikù diyà te Juda, he egkesuat kew pezem edlikù su ziyà kew ed-ubpà. Wazà ebpekelikù keniyu he egkelibri gawas te egkepipira he ebpekepelaǥuy.”

Jeremias 44:28

Emun duen egkesamà he kenà ebpatey te tebek he ebpekeulì diyà te Juda, ne zeisey zà utew. Ne egkesayud is nesamà he menge etew diyà te Juda he nemen-ubpà diyà te Ehipto ke hentei ki lalag is egketuman, iyan be is kedì etawa iyan is kandan.

Ezekiel 34:29

Ebeǥayan ku sikandan te tanà he egkevantug te kegkeselebpeten din su wey zan kenè en bitila wey sudia te menge etew ziyà te zuma he menge nasyun.

Ezekiel 36:8

Piru sikiyu is menge vuvungan te Israel, edtuvù diyà te keniyu is menge kayu, ne ebpemeǥas heini para te menge etew ku he Israilihanen, su hapit dan en ed-ulì.

Ezekiel 7:16

Ne emun duen ebpekelingkawas te kemetayen he ebpekepelaǥuy ziyà te menge vuvungan, ebpekezag-es iring te merepatik, tenged te menge salè dan.

Joel 2:32

Piru is minsan hentei he edangep diyà te Nengazen ne egkelibri te silut he edtelinguma. Su sumalà is migkaǥi te Nengazen, duen menge Israilihanen he egkesamà diyà te Jerusalem he migngezanan he Buvungan he Zion. Heini sikandan mibpilì te Nengazen he egkengelibri.

Joel 3:18

Dutun he timpu ebewian ku sikiyu. Ed-uzaren kew te veǥu he vinu he ebpuun diyà te mezakel he menge paras diyà te menge vuvungan. Ed-uzaren kew zaan te ǥatas he ebpuun diyà te mezakel he menge vaka wey menge kambing he ebpemenabtab diyà te menge mibuntud-buntud. Kenà egkemezahan is menge wahig niw. Ne edtudà is serebseb he ebpuun diyà te valey te Nengazen ne egkewehiǥan din is menge zal-ug he zuen duen menge acacia.

Obadias 1:17

“Piru zuen egkesamà he menge Israilihanen diyà te Buvungan te Zion, ne egkeuman heini egkehimu he segradu he lugar. Ne egkeuman egkaangken te kevuwazan ni Jacob is menge tanà he kandan dengan.

Zacarias 3:8

Guntaan pemineg ka Josue he lavew he memumuhat: Sikew wey is duma nu he memumuhat, menge tuus kew te edtelinguma he menge hitavù. Su edsuǥuen ku is suluǥuen ku he migngezanan te Subpang.

Zacarias 6:12

Ne keǥiyi nu sikandin, he siak, is Nengazen he Mekeǥeǥehem, migkaǥi a te, ‘Is etew he migngezanan te Subpang ed-uswag is kebpekesavuk din ne iyan sikandin ebangun te valey ku. Ebeǥayan sikandin te zengeg pinaaǥi te kegkahadì din ne ebpengulu sikandin. Ne zuen memumuhat he edhitindeg diyà te avey te pinuuwè din te kedhadì ne egkeuyun sikandan is dezuwa.’

Malakias 3:17

Migkaǥi is Nengazen he Mekeǥeǥehem te, “Egkehimu sikandan he menge etew ku. Dutun te andew te kedhukum ku ne egkaangken ku en sikandan. Egkehizuwan ku sikandan, iring a te amey he egkehizu te anak din he nenilbi kandin.