Hoseas 7:1 - Manobo Western Bukidnon OT

¹ Egkesuatan ku te ebawì is menge tig-Israel. Piru is egkeehè ku ziyà te kandan iyan is kelelalung dan. Ebpenlimbung sikandan, edseled dan diyà te menge valey is ebpenakew, wey ebpenulis dan diyà te menge zalan.

Hoseas 7:1 ပူးပေါင်းရင်းမြစ်များ

Isaias 28:1

Mekehizuhizu is Samaria, he henduen be te kuruna he vulak, he ibpegalbu te menge lelenguten he menge pengulu te Israel. Heini he inged diyà mekepelastar te uuzaran he suǥud, piru egkaawà is kekempet din iring te vulak he egkeǥangu.

Isaias 59:12

Su mahabet en is menge salè tew ziyà te etuvangan te Megbevayà, ne iyan heini ebpeǥumbenar he ereg kiw he edsilutan. Uya, netuenan tew he layun kiw ebaal te salà.

Isaias 59:13

Midsupak wey midluivan tew is Nengazen; mid-iniyuǥan tew is Megbevayè tew. Edèdaaǥen wey ebpesipelahan tew is duma. Ebpurungan tew ed-is isipa ke ebmenmenuwen tew is kedtarùtarù tew.

Isaias 59:14

Ne iyan heeyan hinungdan he wazè pa siluti te Megbevayà is menge kuntada tew wey wazè kiw zin pa veǥayi te kezeeǥan duma is ketazeng. Egketembunan en is tutuu ziyà te minsan hendei; is menge etew kenè en egkeseriǥan.

Jeremias 51:9

Migkaǥi is menge Israilihanen he ed-ubpà diyà te, “Mibpeniguduwan dey te ebawì is Babilonia piru kenè en sikandin egkeulian. Hendiyè kiw en, ed-awà kiw en kayi ne ed-ulì kiw ziyà te kenitew he menge lugar. Su nekesungkul en te langit is menge salè din, umbe edsilutan en sikandin te Nengazen.

Ezekiel 16:46

Is kakey nu he vahi iyan is Samaria he ziyà ed-ubpà te zizaya duma te menge anak din he vahi. Is hazi nu he vahi iyan is Sodom, he ziyà ed-ubpà te zivavà duma te menge anak din he vahi.

Ezekiel 23:4

Is ngazan te kakey si Ohola, ne is hazi iyan si Oholiba. Mid-esawa ku sikandan is dezuwa ne mid-anak key. Si Ohola iyan is Samaria, ne si Oholiba iyan is Jerusalem.

Ezekiel 24:13

“ ‘He Jerusalem, is mahawag he vaal nu iyan nekeremerik kenikew. Neninguhà a te kedlumpiyu kenikew, piru wazè ka mebpelumpiyu. Umbe kenà egkaawà is keremerik nu taman te kanà egkaawà is kegkepeuki ku kenikew.

Hoseas 10:5

“Egkahandek is menge meǥinged diyà te Samaria tenged te kegkaawà te menge ed-ezapen he vehiyan he menge vaka ziyà te Bet Aven. Sikandan wey is menge memumuhat dan he ingkelipey zan is kekempet kayi he menge ed-ezapen, ebpekelalew zan su egkuwaan heini ziyà te kandan

Hoseas 11:12

Migkaǥi pa is Nengazen te, “Layun e zà edterterui wey edlelunga te menge tig-Israel. Ne is menge tig-Juda mibpedayun te kebpekeziyù kayi te kedì, te Megbevayà he waǥas wey metinumanen.

Hoseas 11:8

“Sikiyu is menge tig-Israel, kenè ku egkehimu is kedselikwey wey kebey-ani keniyu. Kenè ku egkehimu is kebpurungi kedezeeti keniyu iring te mibeelan ku ziyà te inged he Adma wey Zeboyim. Utew ebmesakit is gehinawa ku emun ebeelan ku heini ziyà te keniyu. Nehizuwan ku sikiyu.

Hoseas 12:1

“Is menge tig-Israel midsarig te menge azen he wazè din pulus. Is edel-asen dan seled te tivuuk he andew ne iyan is menge azen he ebpekezezaat kandan. Mid-iseg is ketetarù dan wey kebpesipala. Mibpekid-uyun sikandan te menge tig-Asiria wey menge tig-Ehipto, umbe mid-uwit dan te lana ziyà te Ehipto he igasa zan.”

Hoseas 12:2

Migkaǥi si Hoseas te, “Duen riklamu te Nengazen diyà te tig-Juda he menge kevuwazan ni Jacob. Edsilutan din sikandan te sumalà te menge vetasan dan; ebelesan din sikandan te sumalà te menge vaal zan.

Hoseas 4:17

Iyan en ingkaapal zan is ked-azap te zuma he menge ed-ezapen. Ne bey-ani en sikandan!

Hoseas 4:2

kekenà, iyan mid-ulaula niw is kebpenrawak te zuma, kedtarùtarù, kebpenhimatey, kebpenakew, wey kebpengumpadi. Nekeeneb en heini, ne kenè en egkerintas is hinimetayà.

Hoseas 5:1

Migkaǥi pa is Nengazen te, “Pemineg kew, is menge etew te Israel, ragkes kew en is menge memumuhat wey menge sakup te pemilya te hadì, su heini he kedhukum ne para keniyu: Iring kew te penuǥes he nekeutel, su nezeetan tenged keniyu is menge etew ziyà te Mizpa wey Tabor.

Hoseas 6:4

Piru migkaǥi is Nengazen te, “Menge etew te Israel wey Juda, hengkey is ebeelan ku ziyà te keniyu? Is kebmahala niw kedì ne meǥaan dà egkaawà; iring dà heini te edsaǥad he virisbiris etawa zehemug emun meselem.

Hoseas 7:13

Mekehizuhizu zan su mibpekeziyù dan kayi te kedì. Edezeetan ku sikandan su nekidsukulà sikandan kediey. Egkesuat a pezem he edlibri kandan piru tarù is migkaǥi zan mehitenged kediey.

Hoseas 8:5

Inselikwey ku is ed-ezapen he vaka te menge tig-Samaria. Ne neregreg is pauk ku kandan. Keenu zan buwa ebpengungubpaan he lumpiyu?

Hoseas 8:9

Neiring heini te meseǥila he asnu he sebsevaha zin is egketazintazin. Midhangyù sikandin te tavang diyà te Asiria; mibayad sikandin diyà te zuma he menge nasyun su ebpetavang.

Amos 3:10

Su iyan heini kes migkaǥi te Nengazen he MEGBEVAYÀ he ebpekesuǥat te Samaria: “Kenè dan metau he edtinazeng, ne is melig-en he menge vahin te inged dan, nepenù te menge azen he tinakew wey tinavan. Umbe edsurungen sikandan te menge kuntada zan ne ebpemengkaǥen is menge pengalang dan. Egkuwaan te menge kuntada is menge azen diyà te melig-en he menge vahin te inged dan.”

Amos 3:9

Keǥiyi niw is menge pengulu he ed-ubpà diyà te melig-en he menge vahin te Ashdod wey is diyà te Ehipto he medtiǥum sikandan diyà te menge vuntud he nekeliǥuy te Samaria ne ahàa zan is kegubut kayi he inged wey is kedlisliseza te menge meǥinged kayi.

Amos 8:14

Sikiyu is ebpenangdù pinaaǥi te ngazan te menge ed-ezapen diyà te Samaria, Dan, wey Beersheba, edezeetan kew ne kenè kew en ebpekeenew pa.”

Micas 6:16

Egkehitavù heini keniyu su ǥeina te mid-iringan niw is mezaat he menge vaal, menge sulunuzen, wey menge sambag ni Hadì Omri wey te anak din he si Hadì Ahab. Umbe, edezeetan ku sikiyu, ne ed-un-undahan kew wey edsudien te menge etew ziyà te zuma he menge nasyun.”