Hoseas 4:3 - Manobo Western Bukidnon OT

³ Tenged kayi mibmemaza is tanè niw ne ebpematey is langun he meǥinged duen, ragkes is langun he uyaǥen he edhipanew, edlayang, wey edlayewlayew.

Hoseas 4:3 ပူးပေါင်းရင်းမြစ်များ

Isaias 33:9

Nezeetan is tanà he Israel. Nengeǥangu is menge kayu ziyà te Lebanon, ne ke và dà etew ne neeled-eled heini. Neiring te sibsivayan is menge suǥud diyà te Sharon. Netaktak is menge zahun te menge kayu ziyà te Bashan wey Carmel.

Jeremias 12:4

Keenu egkeengked is kebmemaza te tanà wey kegkeǥangu te menge sagbet diyà te langun he menge vevesukà? Nemematey is menge langgam wey menge tagbis tenged te kelelalung te menge etew he ed-ubpà keniyan he tanà. Migkaǥi pa sikandan te, “Wazè mebpekilavet is Megbevayà te egkepeveyaan tew.”

Jeremias 23:10

Nepenù en is tanà te menge etew he ed-azap te tarù he menge megbevayà, su mibaal te mezaat is menge ebpeneuven wey mezaat is kegemita zan te ǥehem dan. Ne tenged kayi midrewakan te Nengazen is tanà, umbe mibmemaza heini ne nengeǥangu is menge pinemula.

Jeremias 4:25

Neehè ku zaan he wazà menge etew, ne is langun he menge tagbis midlayang pehendiyà te meziyù.

Jeremias 9:10

Migkaǥi si Jeremias te: Edlelendag a tenged te menge vuntud; edlalew a tenged te menge penebtavà diyà te sibsivayan. Su egkehimu en heini he mekevulungbulung ne wazè en edsaǥad kayi. Kenè en egkezineg kayi is ked-engà te menge vaka, ne mibpekeziyù en is menge tagbis wey minsan is dumezaas he menge langgam.

Jeremias 9:9

Umbe, ereg he edsilutan ku sikandan. Ereg he ebelesan ku is nasyun he iring kayi.”

Ezekiel 38:20

Ne zutun is langun he menge etew wey is langun he menge langgam: is ebpemenhipanew, is ebpemenlayang, is ebpemenanap, wey is diyà ebpen-ubpà te wahig ebpengerkeren te kegkahandek diyà te etuvangan ku. Egkengetempag is menge vuvungan wey menge kelendiǥan, wey egkengevengkag is menge verengbeng.

Joel 1:18

Egurub is menge uyaǥen tenged te kegkevitil zan. Ed-engà is menge vaka su wazè dan en egketabtab, wey elin daan edlised is menge kerehidu.

Amos 1:2

Migkaǥi si Amos te, “Edhiniǥer is Nengazen he ebpuun te Zion; edraǥeb is laǥeng din puun te Jerusalem. Ne tenged kayi nengeǥangu is menge pepenebtavà te menge vantey te menge kerehidu ragkes en is menge pinemula ziyà te puntur te Buntud he Carmel.”

Amos 5:16

Su iyan heini migkaǥi te Nengazen he Megbevayà he Mekeǥeǥehem: “Egkeuma is timpu he zuen ebpemenineǥew wey ebpemen-erang diyà te menge zalan niw wey menge pelasa. Is menge perevasuk ibpetawag su wey zan mesineǥawi is menge minatey zuma te menge etew he edsuhulan wey mekesineǥew.

Amos 8:8

Tenged kayi ibpelinug ku ziyà te tanè niw ne ebpemekesineǥew kew. Egkepurung egkeyunggat is tanè niw, he iring te kedlapey wey kegkemezahi te Wahig he Nilo ziyà te Ehipto.

Nahum 1:4

Pinaaǥi te kebmandù din ne egkemezahan is menge zaǥat wey menge wahig, egkengeǥangu is menge pinemula ziyà te Bashan, diyà te Buntud he Carmel, wey ziyà te Lebanon.

Zefanias 1:3

is menge etew, is menge langgam ragkes en is menge tagbis wey menge isdà. Id-awè ku is menge edtukù te menge etew wey zan mekesalà ragkes en is menge mekesesalà. Edezeetan ku is langun he etew ziyà te tanà. Iyan a, is Nengazen, is migkaǥi kayi.

Zacarias 5:4

Migkaǥi is Nengazen he Mekeǥeǥehem, ‘Ibpaaǥi ku heini he rawak ne edseled heini ziyà te valey te tekawen wey ziyà te valey te nenangdù te tarù he migamit din is ngazan ku. Ne kenà heini egkaawà diyà te kandan taman te egkepurung egkewaǥey is menge valey zan.’ ”