Genesis 48:21 - Manobo Western Bukidnon OT

²¹ Ne zutun migkaǥi si Israel ziyà te ki Jose te, “Meǥaan en is kebpatey ku, iyan, edumahan kew zed te Megbevayà, ne ibpeulì din ded keuzemà is menge kevuwazan tew ziyà te tanà he mid-ubpaan te menge kepuun tew.

Genesis 48:21 ပူးပေါင်းရင်းမြစ်များ

Genesis 15:14

Piru haazà is nasyun he ed-uripen kandan, edsilutan ku ne zutun ebpekaawè dan, ne utew mezakel is menge azen dan.

Genesis 15:16

Ke heepat egkelapis is menge kevuwazan nu ziyà te senge nenasyun, ne human dan ed-ulì dini su wazè pa metuman is timpu te kedsiluti ku te menge Amorihanen tenged te menge salè dan.”

Genesis 26:3

Kayi ke zà ubpà dèpa su edumahan ku sikew wey edtuvazan ku sikew. Ibeǥey ku heini kenikew wey ziyà te menge kevuwazan nu heini is langun he tanà. Edtumanen ku is pesarig ku te amey nu he si Abraham.

Genesis 28:15

Tentenuzi nu he layun a eduma kenikew wey ebentayan ku sikew minsan hendei ka ebpevayà. Ibpelikù ku sikew kayi he tanà, ne kenè ku sikew ed-ewaan taman te egketuman ku is menge saad ku kenikew.”

Genesis 37:1

Ne ziyà med-ubpà si Jacob te tanà he Canaan he iyan daan sikan is tanà he mid-ubpaan dengan te amey zin he si Abraham.

Genesis 46:4

Eduma a keniyu ke edhendiyè kew te Ehipto ne edhimuwen ku he mekeulì daan keuzemà is menge kevuwazan nu. Ne sikew, emun ebpatey ka ne iyan si Jose edleveng kenikew.”

Genesis 47:29

Hein egkeǥezam din he meǥaan en sikandin egkeumuri, mid-umew zin si Jose, ne ke sikandin diyà te kandin te, “Emun egkehimu isavuk nu is belad nu kayi te laang ku, ne penangdù ka he ipeehè nu he kenà egkaawà is gaǥew nu kedì. Kenà a ileveng kayi te Ehipto.

Genesis 50:24

Duen timpu he migkaǥi si Jose ziyà te menge suled din te, “Meǥaan en is kebpatey ku, piru kenà egkehimu he kenè kew en edtevangan te Megbevayà. Ne ibpaawè kew zin ded kayi he tanà, ne ibpeulì kew zin diyà te tanà he impesarig din te menge kepuun tew he si Abraham, si Isaac, wey si Jacob.”

Genesis 50:6

Ne hein netuenan duen te hadì, ne midtavak sikandin te, “Tumana nu is impenangdù nu ziyà te amey nu. Ne ǥenat kad ne ileveng nu en sikandin.”

Salmo 18:46

Uuyag ka, Nengazen! Edeliǥen ka is endilungè ku he vatu. Ibayew ku sikew tenged te iyan ka Megbevayà he menluluwas ku.

Deuteronomio 30:3

egkehizuwan kew te Nengazen he Megbevayè niw. Edtiǥumen kew zin puun te langun he menge nasyun he zutun kew zin ipevihag, ne zutun idlikù din is meupiya he kebpekesavuk niw.

Deuteronomio 31:8

Egiyahan ka te Nengazen ne eduma sikandin kenikew; kenè ke zin ed-ewaan wey ed-iniyuǥan. Umbe kenè ka mahandek wey mebpekeluya.”

Josue 1:5

“Wazà ebpekezaag kenikew mintras uuyag ke pa. Su ebpekiduma a kenikew iring te kebpekiduma ku ki Moises. Kenè ku sikew ed-ewaan wey ebpesegdanen.

Josue 1:9

Tentenuzi nu heini is insuǥù ku kenikew: ‘Mebpekelig-en ka wey mebpekevurut ka. Kenè ka mahandek wey luyahi, su siak, is Nengazen he Megbevayè nu, eduma a kenikew minsan hendei ka ebpevayà.’ ”

Josue 23:14

“Hapit ad ebpatey. Netuenan niw pinaaǥi te tivuuk he gehinawa niw wey isip niw he midtuman te Nengazen he Megbevayè niw is langun he menge meupiya he insaad din keniyu. Wazà minsan sevaha he wazà metuman.

Josue 3:7

Ne zutun migkaǥi is Nengazen diyà te ki Josue te, “Guntaan he andew ebpuunan ku is kebeǥey kenikew te zengeg diyà te etuvangan te menge etew te Israel, ne egketuenan dan he ebpekiduma a kenikew iring te kebpekiduma ku ki Moises.