Genesis 41:39 - Manobo Western Bukidnon OT

³⁹ Ne migkeǥiyan din si Jose te, “Geina te iyan ka kes mibpezayaǥan te Megbevayà te langun kayi, nesavut dey he wazà duma pa he etew he metau wey zuen din kedsavut he iring kenikew.

Genesis 41:39 ပူးပေါင်းရင်းမြစ်များ

Genesis 41:16

Ne midtavak si Jose te, “Kenà a iyan, Mahal he Hadì, kekenà, iyan dà is Megbevayà ebpekeveǥey te kehuluǥan te menge teǥeinep he meupiya para kenikew.”

Genesis 41:25

Ne migkaǥi zutun si Jose ziyà te hadì te, “Mahal he Hadì, sebsevaha zà is kehuluǥan duen te zezuwa he teǥeinep nu. Impezayag en kenikew te Megbevayà ke hengkey is ed-ul-ulahan din.

Genesis 41:28

Ne haazà he egkehitavù ne iyan en kes migkaǥi ku kenikew, Mahal he Hadì, he impezayag en kenikew te Megbevayà ke hengkey is ed-ul-ulahan din.

Genesis 41:33

“Umbe, Mahal he Hadì, kinahanglan he ebpen-ahaan nu is sevaha he etew he uluwanen para egkehimu he iyan edumala te tanà te Ehipto.

Ezra 7:25

“Ne sikew Ezra, sumalà te ketau he imbeǥey kenikew te Megbevayà, ne pilì ka te menge meghuhukum wey menge upisyal he edumala te langun he etew keniyan te prubinsya he ziyan layun te Eufrates. Kinahanglan he netuenan dan is Kesuǥuan te Megbevayè nu. Ne penurua nu is menge etew he wazà metau zutun te Kesuǥuan.

Erubasa 12:8

Egkezeliǥan is etew pinaaǥi te ketau zin, piru is etew he egketultulebung, edsudien sikandin.

Isaias 19:11

Menge tulebung is menge upisyal ziyà te Zoan! Egkilelaan sikandan he kinemeteuwan he menge sumesambag te hadì te Ehipto, piru wazà pulus te menge sambag dan. Ne kenà sikandan ereg he egkaǥi te, “Menge kevuwazan key te uluwanen he menge etew wey menge hadì dengan.”

Daniel 2:11

Utew mereǥen is ebpeveelan nu kenami, Mahal he Hadì. Menge ed-ezapen dà is ebpekehimu keniyan, piru wazè man sikandan med-amur te menge etew.”

Daniel 2:48

Ne zutun mibeǥayan duen te hadì si Daniel te mahabet wey mekempet he menge gasa. Wey mibeǥayan din daan sikandin te metikang he ketengdanan su iyan din impezumala te tivuuk he prubinsya te Babilonia wey impepenguluwan kandin is langun he uluwanen he etew zutun.