Genesis 15:2 - Manobo Western Bukidnon OT

² Ne midtavak dutun si Abram te, “Sikew is Nengazen he Megbevayà, wazà igkeveǥey nu kediey he ibmeupiya te ǥehinawa ku su kenè bes egkehimu he egkevuwad a, ne iyan ebpekepengevilin te menge azen ku si Eliezer he tig-Damascus.”

Genesis 15:2 ပူးပေါင်းရင်းမြစ်များ

Genesis 14:15

Ne hein mezukilem, mibahin ni Abram te dezuwa he grupu is menge sundaru zin. Ne zutun midsurung dan is menge kuntada zan, ne nezaag dan heini. Ne haazà is menge kuntada zan ne mibpemelaǥuy midal-as eni Abram taman te inged he Hoba, he ziyà te zapit te egkezizaya te inged he Damascus.

Genesis 15:1

Ne hein neiwas haazà, mibpekidlalag ki Abram is Nengazen , ke sikandin te, “Abram, kenè ka mahandek, su edlevanan ku sikew wey ebeǥayan ku sikew te utew zekelà he suhul.”

Genesis 15:3

Ne impelaus pa ni Abram is egkeǥiyen din, ne ke sikandin te, “Geina te wazè nu himuwa he mevuwad a, iyan ebpekepengevilin te menge azen ku is suluǥuen ku zà.”

Genesis 24:10

Ne hein nepasad dutun, migkuwa is suluǥuen te sepulù he menge ayam he kemilyu ne migkergahan din te langun he kelasi te menge mahalen he igasa he ebpuun te egalen din he si Abraham. Migenat sikandin pehendiyà te inged he Aram Naharaim, he iyan inged he mid-ubpaan ni Nahor he hazi ni Abraham.

Genesis 24:2

Sevaha zutun he andew, migkeǥiyan ni Abraham is egalen te menge suluǥuen din he iyan sineriǥan te langun he menge azen din te, “Isavuk nu is belad nu kayi te laang ku. Tuus heini te penaad nu he edtistiǥusan te Nengazen, he iyan dà Megbevayà te langit wey tanà, ne kenè ka mebpilì te ed-esawaan te anak ku he si Isaac te vahi he tig-Canaan he emurè tew kayi te mid-ubpaan tew ǥuntaan.

Genesis 25:21

Tenged te kenà ed-anak si Rebeka, mid-ampù si Isaac diyà te Nengazen he med-anak ded is esawa zin. Midtavak te Nengazen is ked-ampù din, umbe mibmeǥingey zutun si Rebeka.

Genesis 39:9

Henduen be te nekedrepeng key kayi te valey, su insarig din is langun kediey kayi ǥawas kenikew su esawa ke zin man. Kenà egkehimu he edlimbungan ku is egalen ku wey ebaal a te salà diyà te Megbevayà.”

Genesis 43:19

Ne tenged dutun mid-uvayan dan haazà is suluǥuen ni Jose ne mibpekidlalag dan diyà te ǥemawan dutun te valey.

Genesis 44:1

Ne zuen insuǥù ni Jose ziyà te suluǥuen din he ebayàbayà diyà te valey zin. Ke sikandin te, “Penua nu is saku te kada sevaha kandan sumalà is egkehenat te menge asnu zan, ne itaǥù nu is selapì he ibpemasa te kada sevaha ziyà te saku zin.

Salmo 127:3

Is menge anak beǥey wey gasa he ebpuun te Nengazen.

Erubasa 13:12

Is kenà kegkeengkena te etew te penganduy zin ne ebpekezezaat te ǥehinawa zin, piru is etew he naangken din is penganduy zin ne ebpekelig-en wey ebpekelipey kandin.

Erubasa 17:2

Is uluwanen he suluǥuen, ne ebpekemandù te taleng he anak te egalen din, ne ebeǥayan sikandin te egkepengevilin duma te zuma pa he menge anak te egalen din.

Isaias 17:1

Heini he menge lalag mehitenged te Damascus: “Pemineg kew! Kenè en maan inged is Damascus su egkevengkag heini.

Isaias 56:5

Edtuǥutan ku sikandan te kedseled diyà te valey ku ne ebeǥayan ku sikandan te zengeg he lavew pa te zengeg he egkezawat dan emun duen dan menge anak. Kenà sikandan egkelipatan te menge etew te taman te taman.

Jeremias 49:23

Iyan heini menge lalag mehitenged te Damascus: “Netingkemed is menge tig-Hamat wey menge tig-Arpad te mezaat he tudtul he nezineg dan. Neliveǥan sikandan wey kenà ebpekehulenà is ked-isip-isip dan; neiring dan te ebpemaǥel he zaǥat.

Ruth 2:6

Ne midtavak sikan is impezumala te, “Iyan sikan is tig-Moab he vahi he miduma ki Naomi.

1 Samuel 1:11

Ne zutun midsaazan ni Hana is Nengazen he egkaǥi, “Nengazen he Mekeǥeǥehem, ahaa nu is ked-antus ku. Tentenuzi a is uripen nu ne kenà a kenikew lipati. Emun ebeǥayan a kenikew te anak he maama, ne ibeǥey ku sikandin kenikew para ebpenilbi kenikew te tivuuk he untung din. Ne iyan tuus te kebpenilbi zin is kenè ku edtempezan is bulvul zin.”