Genesis 12:11 - Manobo Western Bukidnon OT

¹¹ Ne hein meǥaan dan en ebpekeuma ziyà te Ehipto, migkeǥiyan din is esawa zin te, “Sikew, utew ka mekempet he vahi.

Genesis 12:11 ပူးပေါင်းရင်းမြစ်များ

Genesis 12:14

Ne hein nekeuma ensi Abram diyà te Ehipto, naahà iyan te menge Ehiptohanen he utew mekempet he vahi si Sarai.

Genesis 20:13

Hein migkeǥiyan a te Nengazen he med-awà a ziyà te inged te amey ku, migkeǥiyan ku si Sara he ipekilala zin he telesuled key minsan hendei key mekepevayà. Pinaaǥi kayi igkepeehè din is dekelà he gaǥew zin kedì.”

Genesis 20:2

Hein dutun dan en, ne migkeǥiyan din is menge etew he etevey zin si Sara. Umbe impaangey ni Hadì Abimelec he hadì te Gerar si Sara su ed-esewaan din.

Genesis 24:16

Utew mekempet he raǥa si Rebeka ne wazè pa sikandin meuvayi te maama. Mibpenaug sikandin dutun te kalut ne midteǥuan din is umuy zin te wahig. Ne hein nekepasad ne migaun sikandin dutun ne mid-ulì.

Genesis 26:7

Mekempet si Rebeka, umbe emun ebpenginsà haazà is menge tig-Gerar ziyà te ki Isaac mehitenged te esawa zin, ne edtevaken din te etevey zin si Rebeka. Egkahandek sikandin he egkaǥi he esawa zin, su kela ke himetayi zan sikandin para maaǥew zan si Rebeka.

Genesis 29:17

Meupiya he ed-ahaan is mata ni Lea, piru edhuna he mekempet wey mezagwey he ed-ahaan is dagwey ni Raquel.

Genesis 6:2

Naahà duen te menge anak te Megbevayà he memekempet is menge vahi he anak te menge etew, ne mid-esawa zan dutun is menge vahi sumalà is egkesuatan dan.

2 Samuel 11:2

Hein sevaha he mahapun dutun te meǥaan en edsanlep is andew, mid-enew si David ne midhiphipanew zuen te patag he atep te turuǥan din. Dutun te ebpememantew sikandin, neehè din diyà te zizalem is utew metaid he vahi he ebpemeziǥù.

1 Hadì 1:4

Utew mekempet si Abishag, ne nehimu sikandin he peraatur zuen te hadì. Piru wazà sikandin hileveti zuen te hadì.

Erubasa 21:30

Wazà edlampus he ketau, kedsavut, etawa sambag he igkuntra te Nengazen.

Erubasa 29:25

Is kegkahandek, ebpekezezaat te etew; iyan, ke edsarig ki zà te Nengazen, ne wazè ta igkemenu.

Solomon 1:14

Iring sikandin te rupung te vulak he hina, he nemekar ziyà te menge pemuleey te paras diyà te En Gedi.

1 Samuel 25:3

Ne egngezanan haazà ki Nabal he ebpuun te kevuwazan ni Caleb, ne iyan esawa zin si Abigail. Mesinevuten wey metaid si Abigail, piru si Nabal melemu he egkepauk wey mezaat is betasan.