Genesis 1:20 - Manobo Western Bukidnon OT

²⁰ Ne migkaǥi zutun is Megbevayà te, “Mehimu ziyà te menge wahig is utew medmezakel he linimbag he egeǥehinawa wey ebpezumdumahà ne mehimu zaan is utew mezakel he menge tagbis he ebpemenlayang diyà te hewhewanan he zivavew te tanà.”

Genesis 1:20 ပူးပေါင်းရင်းမြစ်များ

Genesis 1:14

Ne migkaǥi zutun is Megbevayà te, “Mehimu ziyà te langit is menge mesiǥa su wey zuen tuus te maandew wey mezukilem. Egkehimu zaan haazà he tuus te menge timpu te menge tuig wey menge andew.

Genesis 1:19

Ne mibmezukilem dutun, ne hein nepawè en, ne nehimu is ikeepat he andew.

Genesis 1:21

Umbe midlimbag te Megbevayà is utew zekelà he menge isdà wey is langun he menge linimbag he egeǥehinawa wey ebpenlayewlayew wey ebpezumdumahà he utew medmezakel ziyà te wahig. Ne midlimbag din daan is minsan hengkey he kelasi te menge tagbis. Ne naahà te Megbevayà he meupiya zaan haazà.

Genesis 1:22

Ne midtuvazan heini te Megbevayà ne ke sikandin te, “Mengevuwad kew ne mebmahabet kew utew su wey mepenù is daǥat te menge linimbag ku. Ne mebmahabet kew zaan is menge tagbis diyan te tanà.”

Genesis 1:30

Ne haazà is menge langgam he ziyà te tanà, wey is menge tagbis he ebpemenlayang diyà te hewhewanan, wey is menge keranapranap he ebpenanap, wey is minsan hengkey he egeǥehinawa, idtuǥut ku kandan he egkeenen dan is minsan hengkey he menge meilem he sagbet.” Ne nehimu haazà.

Genesis 1:7

Ne zutun nehimu is elang ne pinaaǥi kayi impedsivey zin is wahig he ziyà te zizalem wey is wahig he ziyà te zivavew.

Genesis 2:19

Ne zutun, puun dutun te tanà, midlimbag te Nengazen he Megbevayà is langun he menge leew he menge langgam wey is langun he menge tagbis he ziyà ebpemenlayang te hewhewanan. Ne impeetuvang din haazà is langun dutun te etew su ed-ahaan din ke hengkey is menge igngazan kandan duen te etew. Ne sumalà is igngazan te etew te uman sevaha zutun te linimbag he egeǥehinawa ne iyan en ngazan din.

Genesis 7:21

Ne nelimas dutun is minsan hengkey he menge linimbag he egeǥehinawa zini te lumpad. Is menge tagbis, menge ayam, menge leew he langgam, menge keranapranap, wey is tivuuk he menusiyà, nelimas dutun is langun.

Genesis 8:17

Ipeliǥawang nu zaan haazà is langun he menge linimbag he menge langgam wey menge keranapranap, su wey mengevuwad sikandan wey zan meeneb is tivuuk he kelibutan.”

1 Hadì 4:33

Igkeseysey zin is mehitenged te ebpemenuvù, puun te zezekelà he menge kayu pehendiyà te utew zezeisey he ebpemenuvù. Ebpekepenudtul zaan sikandin bahin te minsan hengkey he klasi te: ebpemenhipanew, ebpemenanap, ebpemenlayang, wey is ebpenlayewlayew.

Job 12:9

Su sikandan is langun, netau kayi te mibeelan te Nengazen.

Salmo 148:10

langun he menge langgam: he leew wey is ayam, wey zuma pa he kelasi te langgam he ebpenanap wey ebpemenlayang.

Megwewali 2:21

Minsan pa ke edhaǥù ka duma is keuluwanen wey abilidad, igketaǥak nu zà is langun he midheǥuan nu ziyà te menge etew he wazà iyan medhaǥù kayi. Wazà kayi pulus, ne utew heini mezaat.

Leviticus 11:43

Kenè niw remeriki is keugelingen niw pinaaǥi te kegkaan te minsan hendei kayi he menge langgam, su iyan a, is Nengazen, Megbevayè niw. Umbe iviza niw is keugelingen niw para kediey, ne mebpekesegradu kew su waǥas a.