Ester 8:11 - Manobo Western Bukidnon OT

¹¹ Ne zutun te surat, intuǥut te hadì diyà te menge Judio he ziyà te minsan hendei he inged dutun te ginhedian is ketenged te kedsevaha, su wey zan mepengelangi is keugelingen dan. Intuǥut kandan is kedezaat, kebpenhimatey, wey kebpuew te menge edsurung kandan, minsan hengkey he nasyun is ebpuunan dan wey minsan hengkey he prubinsya, ragkes en is menge vahi wey menge vatà. Ne elin daan intuǥut kandan is kedtavan te menge azen te menge kuntada zan.

Ester 8:11 ပူးပေါင်းရင်းမြစ်များ

Ester 3:13

Heini he surat ne ibpeuwit diyà te langun he menge prubinsya zutun te ginhedian pinaaǥi te menge menunudtulà. Iyan taǥù kayi he surat is kebmandù he ebpenhimetayan is langun he menge Judio seled te senge andew zà, betan-en etawa meǥurang, ragkes is menge vahi wey menge vatà, ne egkuwaan is langun he menge azen dan. Edhimuwen heini zutun te ike-13 he andew te ike-12 he vulan, he iyan is bulan he Adar.

Ester 9:18

(Ne is menge Judio ziyà te Susa midtiǥum sikandan hein ike-13 he andew pehendiyà te ike-14 he andew, ne nemenhimeley zan dutun te ike-15 he andew. Midhimu zan heini he andew te kedsilibra wey kedlipey.)

Salmo 137:8

Sikiyu is menge meǥinged te Babilonia, edezeetan kew! Utew zeyzey is menge etew he ebales keniyu tenged te mibeelan niw ziyà te kenami.

Salmo 68:3

Piru is menge metazeng, ed-ugyab sikandan te kegkelipey ziyà te etuvangan nu.

Isaias 10:6

Edsuǥuen ku is menge tig-Asiria te kedsurung te egkeepesan ku he nasyun. Heini is nasyun, kenà sikandan edsunud kedì te Megbevayè dan. Heini sikandan, edezeetan ku iring te vasak diyà te kersada he edtekutakan, wey mepenguwa te menge tig-Asiria is langun he menge azen dan.”

Ezekiel 39:10

Kenè en kinahanglan he ebpengayu pa sikandan diyà te vevesukà wey ketelunan, su egkeǥamit dan en man he tavun is menge ǥumaan te kebpekidtebek. Umbe ed-eǥawan dan daan is menge nengaǥew kandan. Iyan a, is Nengazen he MEGBEVAYÀ, is migkaǥi kayi.