Erubasa 2:9 - Manobo Western Bukidnon OT

⁹ Emun ebpemineg ka kedì, egketuenan nu ke hengkey is meupiya he ed-ul-ulahan: is hustu, metazeng, wey mezait he menge ulaula.

Erubasa 2:9 ပူးပေါင်းရင်းမြစ်များ

Salmo 119:105

Is lalag nu iring te sulù he ebpeketeyew te ibayè ku.

Salmo 119:99

Mahabet pa is kedì he nesavut, kenà te menge menunudlù ku, su is menge penurù nu iyan ebpurungan ku ed-is-isipa.

Salmo 25:12

Nengazen, is menge etew he edtahud kenikew, egiyahan nu wey zan meikul is dalan he ereg he ed-ikulen.

Salmo 32:8

Nengazen, migkaǥi ka kayi te kedì te, “Ibpenurù ku kenikew is dalan he zait he ed-ikulen nu. Ne zutun te kebentayi ku kenikew ne edsembaǥan ku sikew.

Erubasa 28:5

Is menge etew he lalung kenè dan egkesavut is hustu he kukuman, piru is menge etew he edangep te Nengazen egkepurung dan mulà egkesavut is hustu.

Erubasa 4:12

Emun edtumanen nu heini, wazà egkehimu he velavag te kebpengungubpaan nu, wey wazà mezaat he egkehitavù kenikew.

Erubasa 4:18

Is kebpengungubpaan te menge etew he metazeng ne igkepetug-iring te aney en he kedsilà te andew ke egkepawà he ebmerayag taman te meudtu.

Erubasa 8:20

Edsunuzen ku is metazeng wey is hustu.

Isaias 35:8

Ebeelan dutun te disirtu is meluag he kersada, ne egngezanan heini te “Segradu he Zalan.” Wazà mekesesalà wey tulebung he ebpekeikul zutun. Su para zà haazà te menge etew he edsunud te menge paaǥi te Megbevayà.

Isaias 48:17

“Migkaǥi is Nengazen he Menluluwas niw, he iyan kes Waǥas he Megbevayà te Israel: Iyan a kes Nengazen he Megbevayè niw, nenurù keniyu ke hengkey is meupiya para keniyu wey migiya keniyu pehendiyà te hustu he zalan.

Jeremias 6:16

Ne heini pa is migkaǥi te Nengazen: “Hitindeg kew ziyà te lembaǥan te menge zalan ne purung kew pekisusi. Insè kew ke hendei is kezaan wey meupiya he zalan he meupiya he ed-ikulen, ne zutun kew ikul. Emun ed-ul-ulahan niw heini ne ebpekaangken kew te kelinew. Piru migkaǥi kew te, ‘Kenè key mulà keniyan ed-ikul.’