Deuteronomio 9:3 - Manobo Western Bukidnon OT

³ Piru ǥuntaan egkeehè niw he iyan is Nengazen he Megbevayè niw edhuna edlayun he iring te hapuy he ebpekeepur te menge kuntada. Edaaǥen din sikandan su para melemu zà is kedsegseǥa niw wey kedezeeti niw kandan su iyan heini impenaad te Nengazen keniyu.

Deuteronomio 9:3 ပူးပေါင်းရင်းမြစ်များ

Exodus 23:23

Edhuna ziyà te ibayè niw is belinsuǥuen ku ne edumahan kew zin diyà te tanà te menge Amorihanen, menge Hitihanen, menge Pirisihanen, menge Canaanhen, menge Hivihanen wey menge Jebusihanen, ne iyan a ebpuew kandan.

Exodus 24:17

Ne zutun te kedlaus kedtekezeg ni Moises duen te vuntud, nekeseled sikandin duen te ǥapun. Ne zutun sikandin te vuntud seled te 40 he andew wey 40 he kezukileman. Ne is kezekelan mulà te menge Israilihanen, ne iyan kandan he ked-ahaa te mekeǥeǥehem he kebpekiduma te Nengazen duen te puntur te vuntud is iring te edriyubriyub he hapuy.

Isaias 27:4

Naawè en is pauk ku kayi he pemuleey. Piru emun duen egkeehè ku ziyà te kandin he zuǥiyen he zezeisey he menge kayu, egkuntedahan ku sikandin ne ebinsulan ku.

Isaias 30:27

Pemineg kew! Edhendini is Nengazen he ebpuun diyà te meziyù he utew egkepauk, ne neliǥuy sikandin te evel. Is menge lalag din he egkezumahan te pauk he henduen be te edriyubriyub he hapuy.

Isaias 30:30

Ibpezineg te Nengazen is mezaǥing he laǥeng din, wey ibpeehè din is belad din he andam en he edsilut tenged te utew zin kegkepauk. Egkezumahan heini te edriyubriyub he hapuy, egketik-ew he kedtanà te uzan, kebpenruǥung wey kebpengilat, wey ked-uzan te ǥiyew he iring kengezekelà te menge vatu.

Isaias 30:33

Neuǥet en he naandam is lugar he zutun ebinsuli is hadì te Asiria. Meluag wey mezalem heini he lugar, ne zutun dekelà is hapuy wey kayu he tavun. Is gehinawa te Nengazen he iring te edriyubriyub he esupri ne iyan ebpekeregreg duen te tavun.

Isaias 33:14

Mibpengerker tenged te kekahandek is menge mekesasalà diyà te Zion. Egkaǥi sikandan te, “Is Megbevayà, iring te edriyubriyub he hapuy he kenà egkeuvukan. Hentei man kenitew is ebpekeubpà diyà te etuvangan te Megbevayà?”

Micas 2:13

Ebpuwasan ku is pultahan te inged he zutun kew zumaha is mibihag, ne ebpenguluwan ku sikiyu te kegawas puun dutun. Iyan a kes Nengazen he hadì niw is ebpengulu keniyu.”

Deuteronomio 1:30

Su is Nengazen he Megbevayè niw, edhuna keniyu ne iyan sikandin ebpekidtebek para keniyu, iring te neehè niw he mibeelan din diyà te Ehipto

Deuteronomio 20:1

“Emun edhipanew kew is ebpekidtebek te menge kuntada niw, ne egkeehè niw is menge kudè dan, menge kerwahi wey menge sundaru zan he edhuna he mahabet te keniyu, kenè niw sikandan ikahandek, su zuma niw is Nengazen he Megbevayè niw he mibpeǥawas keniyu ziyà te Ehipto.

Deuteronomio 20:4

Su eduma keniyu is Nengazen he Megbevayè niw! Ebpekidtebek sikandin para keniyu kuntra te menge kuntada niw ne ibpezaag din keniyu sikandan!’

Deuteronomio 4:24

Kenà sikandin egkesuat ke zuen selakew en he ed-ezapen niw. Su emun edsilut is Nengazen he Megbevayè niw ne iring sikandin te hapuy he ebpekeepur.

Deuteronomio 7:16

Kinahanglan he egeraan niw is langun he menge etew he ibeǥey keniyu te Nengazen he Megbevayè niw. Kenè niw sikandan kehizuwi, wey kenè kew mebpenilbi te kandan he menge ed-ezapen su pekaid heini keniyu.

Deuteronomio 7:22

Ibpetigdezeisey keniyu te Nengazen he Megbevayè niw is kedsegseg te menge etew keniyan he menge nasyun. Kenè niw sikandan diritsuwa emina, su emun ebeelan niw heeyan ne ebmahabet is leew he menge langgam.

Deuteronomio 9:6

Umbe, tentenuzi niw he kenà tenged te ketazeng niw is kebeǥaya te Nengazen he Megbevayè niw zuen te meupiya he tanà he ed-engkenen niw, su is tutuu, menge mesinupaken kew.

Josue 11:12

Naaǥew eni Josue heini is langun he menge inged. Migerè dan is langun he menge meǥinged kayi, ragkes is menge hadì dan, su iyan heini insuǥù te suluǥuen te Nengazen he si Moises.

Josue 11:8

Mibpengelinteuwan te Nengazen he mezaag te menge Israilihanen haazà is menge kuntada zan. Midal-as dan is menge kuntada zan taman diyà te Zekelà he Sidon wey ziyà te Misrefot Maim, wey taman diyà te Suǥud te Mizpa ziyà te edsilaan, taman te naamin dan mepatey is menge kuntada zan.

Josue 14:12

Umbe, iveǥey nu kediey is menge vuvungan he insaad kediey te Nengazen. Iyan ka mismu nekezineg dengan he iyan menge meǥinged kayi is menge kevuwazan ni Anak ne melig-en is menge inged dan he miberengbeng. Piru pinaaǥi te tavang te Nengazen edsegseǥen ku sikandan keniyan he tanà su iyan heeyan insaad din kediey.”

Josue 3:11

Sigureduwa niw he egkehuna sikan is Kavan te Kebpekid-uyun te Nengazen he iyan ebayàbayà te tivuuk he kelibutan dutun te kedlayun niw te Wahig he Jordan.

Josue 3:14

Timpu haazà te tiraǥun ne midalem haazà is wahig. Ne mid-awà is menge etew zuen te kampu zan su edlayun dan en duen te wahig. Ne iyan midhuna sikan is menge memumuhat he ebinting duen te Kavan te Kebpekid-uyun. Ne kebpekeǥiek duen te menge memumuhat duen te wahig,

Zatù 4:14

Ne migkeǥiyan ni Debora si Barak te, “Genat ke en, su iyan heini andew he ebpengelinteuwan te Nengazen he mezaag nu si Sisera. Ebpetelihuna kenikew is Nengazen.” Umbe midtupang si Barak dutun te Buntud he Tabor zuma sikan is 10,000 he menge sundaru zin.