Daniel 9:5 - Manobo Western Bukidnon OT

⁵ Nekesalè key ziyà te kenikew. Mibaal key te mezaat wey mid-engkezan dey is menge suǥù nu wey menge sulunuzen he ibpesunud nu.

Daniel 9:5 ပူးပေါင်းရင်းမြစ်များ

2 Hadì 18:12

Nehitavù heini ziyà te menge tig-Israel su wazè dan mebpezumazuma te Nengazen he Megbevayè dan; midsupak dan is kebpekid-uyun te Nengazen kandan, wey midsupak dan is langun he menge suǥù he imbeǥey te Nengazen pinaaǥi te suluǥuen din he si Moises. Wazè dan heini pemineǥa wey wazè dan tumana.

2 Hadì 21:15

Egkehitavù heini kandan su mezaat is mibeelan dan diyà te etuvangan ku, ne midhimu zan he mepauk a, puun pa te kegawas te menge kepuun dan diyà te Ehipto taman en guntaan.”

Ezra 9:6

Ke siak te, “Megbevayè ku, utew a neeled. Ebpekezuzungul a tenged te kegkeeled ku su utew zekelà is menge salè dey; henduen be te nelapew key en kayi wey nekeume en diyà te langit.

Salmo 106:6

Nekesalè key iring te menge kepuun dey; utew mezaat is mibeelan dey.

Salmo 119:102

Wazè ku ewai is menge suǥù nu, su iyan ke man nenurù kayi kediey.

Salmo 119:176

Netazin a iring te kerehidu he netazin, umbe pen-ahaa a is suluǥuen nu, su wazè ku lipati is menge suǥù nu.

Salmo 18:21

Su edsunuzen ku is menge paaǥi nu, ne sikew is Nengazen he Megbevayè ku, wazè ku sikew engkezi.

Isaias 53:6

Iring kiw is langun te nengetazin he menge kerehidu; is kada sevaha kenitew ne iyan en mibeelan din is egkesuatan din. Piru iyan sikandin impaantus te Nengazen te silut he para pezem kenitew te langun.

Isaias 59:13

Midsupak wey midluivan tew is Nengazen; mid-iniyuǥan tew is Megbevayè tew. Edèdaaǥen wey ebpesipelahan tew is duma. Ebpurungan tew ed-is isipa ke ebmenmenuwen tew is kedtarùtarù tew.

Isaias 64:4

Puun pa zengan wazè pa nekezineg wey nekaahà te Megbevayà he iring kenikew he edtavang te menge edsarig kandin.

Jeremias 14:20

He Nengazen, mid-angken dey is kelelalung dey wey is menge salà te menge kepuun dey. Nekesalè key ziyà te kenikew.

Jeremias 14:7

Migkaǥi is menge etew te, “He Nengazen, nekesalè key ziyà te kenikew. Layun dey sikew ed-iniyuǥi, ne ereg key he edsilutan. Piru tevangi key para meveǥayi ka te zengeg.

Jeremias 3:25

Ereg key he ed-eles tenged te kegkeeled su sikami wey is menge kepuun dey nekesalà diyà te kenikew, Nengazen he Megbevayè dey. Puun pa te kegkevatè dey taman en guntaan ne wazè key medsunud kenikew.”

Jeremias 30:14

Midlipatan kew en te kezapig niw he menge nasyun; wazè kew zan en seǥipaa. Midsurung ku sikiyu iring te kedsurung te kuntada niw. Mibpurungan ku sikiyu siluti su utew en meveǥat is menge salè niw wey utew en heini mahabet.

Jeremias 44:3

tenged te mezaat he menge vaal te menge meǥinged duen. Midhimu zan he mepauk a pinaaǥi te kedtutungi zan te veyewà wey ked-ezapa zan te menge ed-ezapen he wazè dan duen hanew wey te menge kepuun dan.

Penhulùhulù 1:18

Migkaǥi is Jerusalem te, “Metazeng is Nengazen; piru wazè ku tumana is suǥù din. Sikiyu is langun he menge etew, pemineg kew, wey tengtengi niw is kegkerasey ku. Mibihag is menge vetan-en ku he menge vahi wey menge maama.

Penhulùhulù 1:20

“Nengazen, ahàa nu ke sengemenu kezekelà is kegkeseeng ku! Utew heini merasey he henduen be te egkevidtew en is gehinawa ku su geina te nehimu a he mesinupaken kenikew. Duen kebpemenhimatey ziyà te menge zalan ku, ne minsan diyà te seled te valey ne zuen ebpematey.

Penhulùhulù 3:42

“Nekesalà key wey nekidsukulà key kenikew, Nengazen, ne wazè key kenikew peseyluwa.

Ezekiel 5:6

Piru midrapas din is menge suǥù ku, ne midsubra pa is kandin he kelelalung te kelelalung te zuma he menge nasyun diyà te peliǥuy zin. Inselikwey zin is menge suǥù ku wey menge sulunuzen.

Ezekiel 6:9

su egkengevihag sikandan. Dutun egketenuzan e zan, ne egkeseǥipè dan he mibeǥayan e zan bes te seeng tenged te kedluivi zan kedì su iyan dan impelavi is duma he menge ed-ezapen. Edumutan dan is keugelingen dan tenged te mezaat wey utew mahawag he menge vaal zan.

Daniel 9:11

Midsupak is langun he menge Israilihanen te menge suǥù nu; kenè dan egkesuat he edtuman te menge lalag nu. Ne tenged te kebaal zey te salà, neseǥazan dey is rawak he ingkesurat diyà te Kesuǥuan ni Moises te suluǥuen nu.

Daniel 9:15

“He Nengazen he Megbevayè dey, impeehè nu is gehem nu pinaaǥi te kegeuza nu te menge etew nu puun te Ehipto, ne nevantug ka tenged kayi taman en guntaan. Piru mibaal key te salà wey kelelalung.

Daniel 9:9

Piru hihizuwen ka ǥihapun wey mepineseyluwen minsan pa te nesupak dey sikew.

Hoseas 1:2

Is nehuna he migkaǥi te Nengazen diyà te ki Hoseas ne iyan heini: “Pengesawa ka te vahi he mengungumpadi, ne is menge anak niw ed-isipen he menge anak dutun te vahi he mengungumpadi. Su ebpaahà heini he is menge etew ku, iring te nengumpadi sikandan pinaaǥi te kedselikwaya zan te Nengazen wey ked-azap dan te zuma he menge ed-ezapen.”

Malakias 3:7

Sikiyu is menge Israilihanen, ne puun pa te menge kepuun niw, midsuwayan niw en is menge suǥù ku ne wazè niw tumana. Guntaan, likù kew kayi te kediey, te Nengazen he Mekeǥeǥehem, ne edlikù a ziyà te keniyu. Piru ed-insè kew te, ‘Wazè dey man sikew ewai; ebmenumenu key te kedlikù diyan?’