Daniel 9:3 - Manobo Western Bukidnon OT

³ Ne tenged dutun midangep a ziyà te Nengazen he Megbevayà pinaaǥi te ked-ampù. Mibpuasa a, mibivisti a te saku, wey mibukbukan ku te avu is ulu ku tenged te kegkeseeng ku.

Daniel 9:3 ပူးပေါင်းရင်းမြစ်များ

2 Samuel 12:16

Midhangyù si David diyà te Megbevayà para zutun te vatà. Midseled sikandin diyà te ruǥu zin ne mibpuasa ne kada mezukilem ne ziyè dà edlipezeng te saag.

Ezra 10:6

Ne mid-awà si Ezra ziyà te egkesineruwan duen te valey te Megbevayà ne midhendiyà te ruǥu ni Jehohanan te anak ni Eliashib. Ne hein dutun en sikandin ne wazà sikandin megkaan wey med-inum, su midlalew sikandin tenged te kenà metinumanen is menge Israilihanen he nemen-ulì puun te kegkevihag.

Ezra 8:21

Hein diyè key te veyvey te Wahig he Ahava, migkeǥiyan ku is menge zuma ku zutun te grupu zey te ebpuasa key wey ebpekevevaan dey is keugelingen dey ziyà te etuvangan te Megbevayè dey su edhangyù key ziyà te kandin he ventayi key zin dutun te hipenawan dey, ragkes is menge anak dey wey menge azen dey.

Ezra 9:5

Dutun te kegkeuma keniyan he uras, mid-engked a he edseengseeng. Midluhud a is nevindas is bisti, ne nengemuyù a he ebayew te menge velad ku ziyà te Nengazen he Megbevayè ku.

Nehemias 9:1

Hein ike-24 he andew zutun he vulan, midtiǥum is menge Israilihanen su ebpuasa zan. Migkukumbalà sikandan te saku wey mibpen-evuwan dan is ulu zan su ibpeehè dan is kedlalew zan.

Ester 4:16

“Genat ka, ne tiǥuma nu is langun he menge Judio he kayi te Susa ne puasa kew para kediey. Kenè kew megkaan wey med-inum seled te tetelu he andew wey tetelu he kezukileman. Ebpuasa a zaan wey is menge suluǥuen ku he menge vahi. Ne emun egkepasad, ne edhendiyà a te hadì minsan pa te supak heini te kesuǥuan. Belaǥad ke himetayi a.”

Job 42:6

Umbe, ingkeeled ku is langun he mibpengaǥi ku mehitenged kenikew, ne idsendit ku haazà pinaaǥi te kebpinuu ku ziyà te eliyavuk wey avu.”

Salmo 35:13

Piru emun egkezeruwan dan, ebpetuusan ku he igkeseeng ku sikandan pinaaǥi te kebivisti ku te saku wey kebpuasa. Ne emun kenà edtevaken is ampù ku para kandan,

Isaias 22:12

Dutun he andew mid-umew kew te Nengazen he MEGBEVAYÀ he Mekeǥeǥehem su ibperuǥur kew zin wey ibpesineǥew. Migkeǥiyan kew zin he ipetuusi niw is kedlalew niw pinaaǥi te kepevangul niw wey kebivisti niw te saku.

Jeremias 33:3

“Umawa a kenikew su edtevangan ku sikew. Ne ibpezayag ku ziyà te kenikew is egkengein-inuwan wey in-eles he wazè nu pa metueni.

Ezekiel 36:37

Mibpedayun megkaǥi is Nengazen he MEGBEVAYÀ te, “Ed-umanan ku ebpemineǥa is kebpehizuhizu te menge etew te Israel, ne iyan ebeelan ku ziyà te kandan is: Edhimuwen ku sikandan he iring kahabet te menge kerehidu he ibpemuhat diyà te Jerusalem emun timpu te pista. Umbe is nengevengkag he menge inged egkeuman egkepenù te mahabet he menge etew. Ne egketuenan dan he iyan a Nengazen.”

Daniel 6:10

Ne hein netuenan ni Daniel he mibpirma haazà is hadì, ne mid-ulì sikandin. Ne ziyà te zivavew he ruǥu te valey ni Daniel ne zuen dutun menge sulawà he ebpekesinaru ziyà te Jerusalem. Ne zutun sikandin renged is edluhud wey ebpengemuyù diyà te Megbevayè din te ketetelu kada andew, su iyan haazà layun din ebeeli.

Daniel 9:20

Mibpedayun a is ebpengemuyù wey edtug-an te menge salè ku wey menge salà te menge zuma ku he menge Israilihanen. Midhengyuan ku is Nengazen he Megbevayè ku para te segradu he vuvungan din.

Daniel 9:4

Ne iyan heini migkaǥi ku zutun te ked-ampù ku ziyà te Nengazen he Megbevayè ku wey kedtug-an ku te menge salè ku wey menge salà te menge Israilihanen: “Nengazen, mekeǥeǥehem ka wey egkein-inuwan he Megbevayà. Metinumanen ka, ne edtumanen nu is penaad nu he ebmahalen nu is ebmahal kenikew wey edtuman te menge suǥù nu.

Joel 1:13

Sikiyu is menge memumuhat he ebpenilbi ziyà te pemuhatà he para te Megbevayè ku, bivisti kew te saku ne hendiyè kew te valey te Nengazen ne sineǥew kew seled te tivuuk he kezukileman. Su wazè en menge trigu wey menge vinu he igkepemuhat diyà te valey te Megbevayè niw.

Joel 2:12

Migkaǥi is Nengazen he timpu en heini te kedlikù niw ziyà te kandin te kedlikù he meheǥet diyà te gehinawa niw, he egkezumahan te kebpuasa wey kedlalew duma is kedsineǥew.

Jonas 3:5

Ne tenged dutun midtuu te Megbevayà is menge tig-Nineve. Mibpuasa sikandan, ne is langun kandan, dekelà se zeisey is pid-etawan din, ne mibivisti te saku wey mibpuasa he tuus te ed-engkezan dan en is mezaat he menge ulaula zan.