Daniel 9:26 - Manobo Western Bukidnon OT

²⁶ Ne kegkepasad te 434 he tuig edhimetayan is pengulu he pinilì te Megbevayà he wazà edtavang kandin. Ne ebpekeuma is sevaha he hadì ne edezeetan te menge etew zin haazà is inged wey is baley te Nengazen. Ne ebpedayun is kezeetan wey kebpetebtebekà taman te ketepusan su imbanglis te Megbevayà is kegkeul-ulaha kayi. Henduen be te zalem is kegkeuma te ketepusan he menge andew.

Daniel 9:26 ပူးပေါင်းရင်းမြစ်များ

2 Samuel 21:5

Midtavak sikandan te, “Egkesuatan ni Saul he meǥerè key para wazè en egkesamà kenami kayi te Israel.

Salmo 22:15

Naawè en is desen ku; iring a te tanà he mibadtik, ne mibmevisekeg en is dilè ku. Nengazen, ebey-anan a kenikew minsan pa te edserupatey ad.

Isaias 28:2

Pemineg kew! Duen melig-en wey mekeǥeǥehem he nasyun he id-andam te Nengazen he ibpezezaat din te Samaria. Iring heini te ebpekezezaat he vagyu he egkelepikan te ǥiyew, wey iring te mevendes he zalem.

Isaias 28:22

Umbe, kenè kew en medwalìwalì, su kela ke ibpeiseg din pa is idsilut din keniyu. Su nezineg ku he impesavut te Nengazen he MEGBEVAYÀ he Mekeǥeǥehem he edezeetan din is tivuuk he tanà.

Isaias 53:8

Midakep sikandin, midhukuman, wey midhimetayan. Wazè nekeseǥipà dutun he lapis te kevuwazan he iyan inhimetayi kandin is tenged te menge salè dan, ne mid-antus din is silut he para pezem kandan.

Isaias 8:7

ibpesurung ku sikandan te hadì te Asiria wey te menge sundaru zin he iring te zalem te Wahig he Eufrates he ebpekelapew te menge pangpang din.

Jeremias 46:7

“Hengkey heini he nasyun is nehimu he mekeǥeǥehem, iring te Wahig he Nilo he ebpekelapew ziyà te pangpang?

Jeremias 51:42

Egkelapew te zezekelà wey edeǥurus he menge vaǥel is Babilonia.

Daniel 11:10

“Edtiǥum te mahabet he menge sundaru is menge anak duen te hadì diyà te zizaya su wey maandam is kebpekidtebek dan. Ne edsurung heini sikandan he henduen be te zalem he kenà egkepeneng. Edsurungen dan minsan is binerengbeng he inged te hadì diyà te zivavà.

Daniel 11:17

Meheǥet is tinguhà duen te hadì diyà te zizaya te kebpekidtebek te ginhedian diyà te zivavà taman te egkehimu zan. Piru ebpekidsevaha zèpa sikandin te hadì diyà te zivavà pinaaǥi te kebpeesewaa zin te anak din he vahi zuen te hadì su wey zin mezèdeeti is ginhedian diyà te zivavà pinaaǥi zuen te anak din. Piru kenà egkesuat haazà is bahi ke egkekuntada zin is ginhedian diyà te zivavà ne kenè sikandin edlavan te amey zin.

Daniel 11:22

Mahabet he menge sundaru he menge kuntada zin is ebpendezeetan din, wey ebpenhimetayan din ragkes en is lavew he memumuhat.

Daniel 11:36

“Ebeelan duen te hadì diyà te zizaya is minsan hengkey he egkesuatan din te ebaal. Ed-isipen din he iyan sikandin lavew te langun he ebpen-ezapen, ne edsumpeliten din is Megbevayà he iyan lavew te langun he ebpen-ezapen. Ebmelempusen sikandin taman dà te timpu te kebpezayaǥa te Megbevayà te pauk din, ne egkeulaula heini su kinahanglan he egkengehitavù is imbanglis te Megbevayà is kegkeul-ulaha zuen.

Daniel 9:27

Haazà is hadì, edhimu te melig-en he kesebutan diyà te mahabet he menge etew he egketapus te pitu he tuig. Piru kedlavey te tetelu he tuig wey tengà, ebpeengkezan din is kebpemuhat ne idsavuk din diyà te valey te Nengazen is utew mezaat he vutang he egkehimu he hinungdan te kebey-ani zutun te valey te Nengazen. Ne kenà heini egkaawà dutun taman te kemulu pa haazà is hadì su iyan heini imbanglis te Megbevayà.”

Hoseas 1:9

Migkaǥi is Nengazen diyà te ki Hoseas te, “Ngezani nu heeyan is batà te Lo Ami, he ke và dà egkegiya, ‘Kenà menge Etew ku,’ su is menge etew te Israel, ne kenè ku menge etew ne kenè e zan Megbevayà.

Amos 8:8

Tenged kayi ibpelinug ku ziyà te tanè niw ne ebpemekesineǥew kew. Egkepurung egkeyunggat is tanè niw, he iring te kedlapey wey kegkemezahi te Wahig he Nilo ziyà te Ehipto.

Amos 9:5

Emun egkeviten te Nengazen he MEGBEVAYÀ he Mekeǥeǥehem is tanà, egkehuyung heini ne is langun he menge meǥinged kayi ne ebpemekesineǥew. Is kegkehuyung kayi iring te kedlapey wey kegkemezahi te Wahig he Nilo ziyà te Ehipto.

Nahum 1:8

Iring sikandin te meseleg he zalem su ed-eminen din edezeeti is menge kuntada zin. Edel-asen din is menge kuntada zin taman te egkengepatey zin sikandan.