Daniel 9:24 - Manobo Western Bukidnon OT

²⁴ “Midtelaan en te Megbevayà is 490 he tuig he para zuen te segradu he inged wey te menge zuma nu, su zutun he timpu egkeengked is kebpekidsukulè dan te Megbevayà, ne egkevelukasan sikandan te kegkeuripena kandan te salà, ne ebpeketezengen sikandan te Megbevayà te ketazeng he ebpedayun taman te taman, su para metuman sikan is nelewasan wey kes netagnà, wey para ikeuman ikepehinungud diyà te Megbevayà is baley zin.

Daniel 9:24 ပူးပေါင်းရင်းမြစ်များ

2 Cronica 29:24

Ne midlapà dutun te menge memumuhat haazà is menge kambing ne in-itis dan is lengesa ziyà te pemuhatà he pemuhat he para idlumpiyu su wey mepalis is salà te langun he menge Israilihanen. Su insuǥù te hadì is kebpemuhat te menge pemuhat he edtutungen wey menge pemuhat he para idlumpiyu he para te langun he menge Israilihanen.

Salmo 2:6

Ke sikandin te, “Diyà te Zion, kes segradu he vuvungan ku, insavuk ku is mibpilì ku he hadì.”

Salmo 45:7

Igkesuat nu is metazeng, iyan, igkeepes nu mulà is mezaat. Umbe, mibpilì ka te Megbevayà he Megbevayè nu, ne imbeǥey zin kenikew is kelipey he lavew pa te kelipey te menge zuma nu.

Isaias 42:4

Kenà sikandin egkeewaan te perateng wey kezasig taman te pinaaǥi kandin kenè en egkeengkezan te edtuman is hustu he kukuman kayi te kelibutan. Minsan is menge etew ziyà te meziyù he menge lugar ebperateng te menge penurù din.”

Isaias 51:6

Ahaa niw is langit wey is kelibutan. Egkahanew is langit iring te evel, ne ebmerunut is kelibutan iring te manggad, ne ebpematey is menge meǥinged kayi iring te menge dezeisey he menge keranapranap. Piru is kelibriyanan he ibeǥey ku, ebpedayun te wazà pidtemanan. Is kezeeǥan duma is ketazeng, egkaangken niw taman te taman.

Isaias 51:8

Su iring dan dà te manggad he egketketen te dezeisey he menge keranapranap. Piru is ibeǥey ku he kezeeǥan duma is ketazeng wey kelibriyanan ebpedayun te wazà pidtemanan.”

Isaias 56:1

Iyan heini egkeǥiyen te Nengazen: “Ipeehè niw is hustu he kukuman wey veeli niw is metazeng, su kenè en egkeuǥet edlibriyen ku en sikiyu wey egkeehè niw is ketazeng ku.

Isaias 61:1

Is Mulin-ulin te Nengazen he MEGBEVAYÀ ne kayi te kediey. Su mibpilì e zin he ibpewali te meupiya he tudtulanen diyà te menge pubri. Midsuǥù e zin te kedlipey te egkengeseeng wey kebpenudtul ziyà te menge vihag wey menge pirisu he ebpekeǥawas dan en.

Penhulùhulù 4:22

Sikiyu is menge meǥinged diyà te Zion, egketapus en is kedsiluti keniyu. Hapit kew en ibpeulì te Nengazen puun te kegkevihag. Piru sikiyu is menge etew ziyà te Edom edsilutan kew te Nengazen tenged te menge salè niw ne ibpahayag din is kelelalung niw.

Ezekiel 28:12

“Sikew is etew, kanta ka te kentahan te kedlelawi te hadì te Tyre. Keǥiyi nu sikandin he iyan a, is Nengazen he MEGBEVAYÀ migkaǥi te: Dengan petug-iringan ka te wazè din kurang. Metau ka wey utew mekempet.

Ezekiel 4:5

Is senga andew ebpesavut te senge-tuig. Umbe seled te 390 he andew is kedtianga nu te menge salè dan.

Ezekiel 4:6

Ne kegkepasad dutun, tengkilid ka zapit te kewanan nu ne tianga nu zaan is salà te menge etew te Juda seled te 40 he andew; is senga andew ebpesavut gihapun te senge-tuig.

Leviticus 25:8

Dutun te kada ike-49 he tuig, te ikesepulù he andew te ikepitu he vulan he iyan kes Andew te Kebelukas te menge etew tenged te menge salè dan, ipezaǥing niw is menge vudyung diyà te tivuuk he lugar niw.

Leviticus 8:15

Midlapà ni Moises haazà is baka ne migkuwa sikandin te lengesa kayi. Intiyuk din is tezù din duen te lengesa, ne mibpelisan din sikan is menge sungeysungey te menge suyuk te pemuhatà he iyan kedlumpiyuwi kayi. Ne in-itis dutun is nesamà he lengesa diyà te zizalem duen te pemuhatà. Iyan heini paaǥi te kebpehinunguza zin duen te pemuhatà diyà te Nengazen, su para mehimu heini he ereg he ebpekelibri te mekesesalà.

Zacarias 4:14

Umbe, migkaǥi sikandin te, “Iyan kehuluǥan keniyan is dezuwa he etew he mibpilì para mekepenilbi te Nengazen he ebayàbayà te tivuuk he kelibutan.”

Numero 14:34

Ne geina te 40 he andew is kebpeniizi te menge meniniid duen te tanà, ne ebpekaantus kew zaan te 40 he tuig tenged te menge salè niw, wey niw metueni ke hengkey is ebeelan ku ke egkepeukan ku is ebpekigkuntada kedì.