Daniel 8:17 - Manobo Western Bukidnon OT

¹⁷ Ne hein mid-uvey kayi te kedì si Gabriel, midluhud a tenged te kegkahandek ku. Piru migkaǥi sikandin te, “Sikew is etew, kinahanglan he egkesavut nu sikan is nelewasan nu, he mehitenged te huziyan he timpu.”

Daniel 8:17 ပူးပေါင်းရင်းမြစ်များ

Genesis 17:3

Ne zutun midlangkeb si Abram diyà te tanà ne migkaǥi en maan kandin is Megbevayà te,

Ezekiel 1:28

Is kerayag diyà te peliǥuy zin iring te velugtu emun edtikdew is uzan. Iring dutun is mekeǥeǥehem he kebpekiduma te Nengazen. Ne te kegkahaa ku zutun midlangkeb a ne zuen nezineg ku he nekidlalag kedì.

Ezekiel 2:1

Migkaǥi is laǥeng kayi te kedì te, “Sikew is etew, hitindeg ka su zuen ku egkeǥiyen kenikew.”

Ezekiel 44:4

Ne miduma a zuen te etew ziyà te egkesinaruwan duen te valey te Nengazen. Ne ziyè key mebayà te veyeey he zapit te zizaya. Ne zutun neehè ku is mekeǥeǥehem he kebpekiduma te Nengazen he nekeeneb dutun te valey zin, ne segugunà a midlangkeb.

Ezekiel 6:2

“Sikew is etew, sinaru ka ziyà te menge vuvungan te Israel ne rewaki nu heini:

Daniel 10:11

Ke sikandin te, “Daniel, mibmahal ka te Megbevayà. Hitindeg ka ne purung ka pemineg te egkeǥiyen ku ziyà te kenikew, su midsuǥù a te Megbevayà kayi te kenikew.” Ne kegkekeǥiya zin dutun ne midhitindeg a is egkerkeren.

Daniel 10:16

Ne, heini is henduen be te etew, migkevit din is bivig ku ne human a mekekaǥi. Migkeǥiyan ku haazà is edhithitindeg diyà te etuvangan ku te, “Datù, selakew is keǥezamgezam ku wey edluyahan a tenged duen te nelewasan ku.

Daniel 11:27

“Ne kegkepasad dutun ne uvag ebpepurungà heini is dezuwa he hadì piru pudu zan teruen, pudu zan ed-isip te paaǥi te kedlimbungi te sevaha kandan. Piru wazà edlampus kandan dutun te ebpekedsuvar he tuyù dan. Ne ebpedayun is kebpekidtebek dan su wazè pa meuma is netelaan te Nengazen he timpu te ketepusan.

Daniel 11:40

“Emun egkeume en is ketepusan, ebpekidtebek is hadì diyà te zivavà te hadì diyà te zizaya. Piru edtebeken sikandin duen te hadì diyà te zizaya duma is ebpemen-untud te kerwahi wey pereuntud te kudà wey te mahabet he menge varku. Heini sikandin, iring te zalem he edsurung te menge nasyun, ne ebpendezeetan din sikandan.

Daniel 12:13

“Ne sikew Daniel, leusa nu is menge vaal nu. Ebpatey ka piru ebenhawen ka te ketepusan he menge andew su para mezawat nu is bales te menge vaal nu he inteǥana para kenikew.”

Daniel 12:4

Piru sikew, Daniel, isira nu zà dèpa heini is libru, wey kenè nu en dèpa tudtula is menge lalag kayi taman te egkeuma is ketepusan. Dutun te kenè pa heini ibpahayag ne mezakel is egkesuat he mesavut dan is egkengehitavù.”

Daniel 2:46

Ne segugunà midluhud si Hadì Nebucadnezar te kebeǥey te zengeg ki Daniel. Ne kegkepasad dutun ne mibmandar sikandin te kebpemuhat wey kedtutung te veyewà diyà te etuvangan ni Daniel.

Daniel 7:16

Umbe, mid-uvey a ziyà te sevaha te ebpemenhitindeg dutun ne mid-insaan ku ke hengkey is kehuluǥan duen te neehè ku.

Daniel 8:15

Ne zutun te kedtengtengi ku zuen te mibpelewasan kedì wey ked-isip-isip ku ke hengkey is kehuluǥan din, netekewtekew a te zuen midhitindeg diyà te etuvangan ku he henduen be te etew.

Daniel 8:19

Ke sikandin te, “Egkeǥiyan ku sikew ke hengkey is egkehitavù te huziyan he timpu emun edsilut en is Megbevayà tenged te pauk din. Iyan ibpaalung te neehè nu, is egkehitavù te huziyan he timpu.

Daniel 8:27

Ne kegkepasad kayi, siak si Daniel, midluyahan a wey nezeruwan a te nepipira he andew. Ne kegkeulii kedì, midlikuan ku te edterebahu is insarig kedì te hadì. Piru kemulu a egkeliveǥi zuen te nelewasan ku. Mereǥen heini he edsevutan.

Daniel 9:23

Su kebpuun nu zà ked-ampù ne zuen en impahayag te Megbevayà, ne midhendini a su egkeǥiyen ku kenikew haazà, su utew ka mibmahal te Megbevayà. Umbe pemineǥa nu wey sevuta nu is idseysey ku ziyà te kenikew:

Daniel 9:27

Haazà is hadì, edhimu te melig-en he kesebutan diyà te mahabet he menge etew he egketapus te pitu he tuig. Piru kedlavey te tetelu he tuig wey tengà, ebpeengkezan din is kebpemuhat ne idsavuk din diyà te valey te Nengazen is utew mezaat he vutang he egkehimu he hinungdan te kebey-ani zutun te valey te Nengazen. Ne kenà heini egkaawà dutun taman te kemulu pa haazà is hadì su iyan heini imbanglis te Megbevayà.”

Habakuk 2:3

Isurat nu zà heini zep-a su wazè pa meuma is midtelaan he timpu te kegkeul-ulaha kayi. Ne kenà ebperis is kegkeul-ulaha kayi te kena egkeuǥet. Emun henduen be te malù egkeuǥet ne teǥazi nu, su siguradu he egkehitavù heini he kenà egkeuǥet.