Daniel 7:10 - Manobo Western Bukidnon OT

¹⁰ Puun diyà te etuvangan din duen hapuy he edtudà. Edliblibuwen is kahabet te menge velinsuǥuen he ebpenilbi kandin. Andam en sikandin he edhukum, umbe, mibekar en is menge libru he ebpesikazan din te kedhukum din.

Daniel 7:10 ပူးပေါင်းရင်းမြစ်များ

1 Hadì 22:19

Migkaǥi pa si Micaya te, “Pemineǥa nu is lalag te Nengazen! Neehè ku is Nengazen he ebpimpinuu ziyà te pinuuwè din te kedhadì, ne zuen menge ilengiten he menge linimbag he ebpemenhitindeg diyà te egkekewanan wey egkeǥivang din.

2 Cronica 18:18

Migkaǥi pa si Micaya te, “Pemineǥa nu is lalag te Nengazen! Neehè ku is Nengazen he ebpimpinuu ziyà te pinuuwè din te kedhadì, ne zuen menge ilengiten he menge linimbag he ebpemenhitindeg diyà te egkekewanan wey egkeǥivang din.

Job 25:3

Egkevilang be is menge sundaru zin? Duen be lugar he wazà meteyawi te kerayag din?

Salmo 103:21

Deliǥa niw is Nengazen, sikiyu is langun he ilengiten he menge linimbag he ebpenilbi kandin wey edtuman te egkesuatan din.

Salmo 18:8

Migawas is evel puun te izung nu, ne ziyà te vèbè nu migawas is mekahandekhandek he hapuy wey egkeregreg he menge vaǥa.

Salmo 50:3

Ne ebpekeuma is Megbevayà he ebpetuus, su ziyà te egkehunaan din duen egkeregreg he hapuy, ne ziyà te ebpekeliǥuy kandin ne zuen bagyu.

Salmo 68:17

Nekeuma is Nengazen diyà te valey zin he ebpuun diyà te Sinai duma te linibu he menge kerwahi zin.

Isaias 30:27

Pemineg kew! Edhendini is Nengazen he ebpuun diyà te meziyù he utew egkepauk, ne neliǥuy sikandin te evel. Is menge lalag din he egkezumahan te pauk he henduen be te edriyubriyub he hapuy.

Isaias 30:33

Neuǥet en he naandam is lugar he zutun ebinsuli is hadì te Asiria. Meluag wey mezalem heini he lugar, ne zutun dekelà is hapuy wey kayu he tavun. Is gehinawa te Nengazen he iring te edriyubriyub he esupri ne iyan ebpekeregreg duen te tavun.

Daniel 12:1

Ne migkaǥi pa sikan is henduen be te etew te, “Dutun he timpu, ebpeseǥazan ni Micael te menge etew is silut su insuǥù heini kandin te Megbevayà. Si Micael iyan sikan is lavew he pengulu he edlavan te menge zuma nu he menge Israilihanen. Utew mereǥen is kebpekesavuk te menge etew zutun he timpu, ne heeyan he kemeresayan wazè pa keenu mehitavù puun te kegkepuun kegketukud te menge nasyun. Piru edlibriyen puun keniyan te kemeresayan is menge zuma nu he menge Israilihanen he nekesurat is menge ngazan dan diyà te libru he midlistahan te menge etew he zuen dan untung he wazà pidtemanan.

Daniel 7:22

Ne nekeuma sikan is uuyag puun pa te puunà, he iyan kes Utew Lavew he Megbevayà, ne midhukum sikandin pebur te menge etew he ǥaked din. Ne neuma is timpu te kedhadì te menge ǥaked te Megbevayà.

Daniel 7:26

Piru emun egketapus en haazà, edhukuman sikandin, ne id-awa diyà te kandin is gehem din, ne wazè en kurang te kedèdeeti kandin.

Zacarias 14:5

Ne ebpemelaǥuy kew he ebayà kayi he suǥud, su taman man te Azel is egkeuma kayi. Ebpemelaǥuy kew iring te mibeelan te menge kepuun niw hein midlinug dutun te timpu ni Hadì Uzia he hadì te Juda. Ne ebpekeuma is Nengazen he Megbevayè ku duma te langun he menge velinsuǥuen din.

Deuteronomio 33:2

Migkaǥi sikandin te, “Nekeuma is Nengazen puun te Sinai; midsilà sikandin diyà te kenitew puun te Buntud he Seir he iring te kedsilà ta andew. Midsiǥa sikandin puun te Buntud he Paran. Nekeuma sikandin duma te linibu he menge velinsuǥuen, ne is kewanan he velad din ebitbit te edriyubriyub he hapuy.