Daniel 4:17 - Manobo Western Bukidnon OT

¹⁷ Iyan heini hukum he migkaǥi te menge velinsuǥuen su para metueni te langun he is Utew Lavew he Megbevayà, duen din gehem diyà te menge ginhedian te menge etew. Ne egkehimu ke edhimuwen din sikandan he sakup te minsan hentei he egkesuatan din he mehimu he egalen, minsan pa ke haazà is etew iyan en kineminusan te langun he menge etew.

Daniel 4:17 ပူးပေါင်းရင်းမြစ်များ

1 Hadì 21:25

(Wazà etew he mibpeveyveyaan din is keugelingen din pinaaǥi te kebaal te mezaat diyà te etuvangan te Nengazen te iring kezaat te mibeelan ni Ahab, tenged te ked-iniyata kandin te esawa zin he si Jezebel.

2 Cronica 28:22

Emun duen kemereǥenan he ebpekeuma ziyà te ki Hadì Ahaz, ne ed-iseg pa is kedsupak din te Nengazen.

Salmo 103:19

Insavuk te Nengazen diyà te langit is pinuuwè din te kedhadì, ne edhedian din is langun.

Salmo 12:8

Su nekeelingkus kenami is lalung he menge etew ne edeliǥen pa te kezekelan is kelelalung dan.

Salmo 9:16

Impekilala te Nengazen ke hentei sikandin pinaaǥi te metazeng he kedhukum din, ne is lalung he menge etew, iyan nekezezaat kandan is mezaat he menge vaal zan.

Exodus 9:16

Iyan, intuǥut ku he meuyag-uyag ka para kayi he ketuyu-an: su wey nu maahà is gehem ku ne wey a mevantug kayi te tivuuk he kelibutan.

Isaias 6:3

Ne ebpekegkeǥiyà sikandan te: “Waǥas, waǥas, waǥas is Nengazen he Mekeǥeǥehem he is kebpekiduma zin nekeeneb te tivuuk he kelibutan.”

Isaias 6:8

Ne nezineg ku is laǥeng te Nengazen he migkaǥi te “Hentei vuwa is edsuǥuen ku? Hentei vuwa is edhipanew para kenami?” Midtavak a te, “Heini e zed! Iyan a suǥua.”

Ezekiel 25:17

Tenged te pauk ku ebelesan ku sikandan wey edsilutan. Ne emun egkevelesan ku en sikandan, egketuenan dan he iyan a Nengazen.”

Ezekiel 7:24

Ibpaaǥew ku is menge valey zan te utew lalung he menge etew he ebpuun diyà te zuma he menge nasyun. Edtepusen ku is kebpegalbu te lavew he menge etew ziyà te kandan, ne ebpesegdanen ku en he remeriki is menge simbahan dan.

Daniel 11:21

“Is hadì he ebpekeilis kandin ne sevaha he etew he telemayen, he kenà diyà ebpuun te pemilya he ebpuunan te egkengehimu he hadì. Kenà ebpeebuten te menge etew, he egkaaǥew zin is kedhadì dutun te ginhedian pinaaǥi te limbung.

Daniel 2:21

Iyan sikandin ebpedliliwà te egkengehitavù diyà te menge timpu. Iyan sikandin ebayàbayà ke hentei is egkahadì wey ke hentei is egkaawà te kedhadì. Iyan sikandin mibeǥey te ketau ziyà te uluwanen.

Daniel 4:2

“Egkesuatan ku te edtudtul ziyà te keniyu is menge singyal wey menge egkein-inuwan he menge vaal he mibeelan te Utew Lavew he Megbevayà kayi te kediey.

Daniel 4:25

Edsegseǥen ka pehendiyà te meziyù te menge etew ne ed-amur ka te leew he menge langgam. Ne egkeiring ka te vaka su ebpenabtab ka te sagbet wey layun ka egkahames te zehemug. Ne kegketapus te pitu he tuig, ne egkilelaan nu he is Utew Lavew he Megbevayà, duen din gehem diyà te menge ginhedian te menge etew ne egkehimu ke edhimuwen din sikandan he sakup te minsan hentei he egkesuatan din he mehimu he egalen dan.

Daniel 7:25

Ebpengaǥi sikandin te menge lalag he idsupak din te Utew Lavew he Megbevayà, ne ebpurungan din edlisliseza is menge etew he ǥaked te Megbevayà. Ebpeninguhà sikandin he mahalin is menge pista zan wey Kesuǥuan dan. Ne idtuǥut kandin he mesakup din is menge etew he ǥaked te Megbevayà seled te tetelu he tuig wey tengà.

1 Samuel 2:8

Ed-enawen din is menge pubri zutun te utew zan kegkeayuayu. Ibpepinuu zin sikandan duma te menge metikang is pid-etawan dan ne edhimuwen din he telehuzen. Iyan sikandin teǥiǥaked te pundasyun ne zutun din isavuk is kelibutan.