Daniel 2:45 - Manobo Western Bukidnon OT

⁴⁵ Iring duen te neehè nu he vatu he midtipak puun te vuntud (piru kenà etew is midtipak duen) he nekevekbek duen te ledawan he putew, brunsi, brik, pelata, wey vulawan. “Mahal he Hadì, mibpezayag is mekeǥeǥehem he Megbevayà diyà te kenikew ke hengkey is huziyan he egkehitavù. Ne iyan heeyan kes teǥeinep nu wey kehuluǥan din. Ne tutuu heini is langun he migkaǥi ku.”

Daniel 2:45 ပူးပေါင်းရင်းမြစ်များ

Genesis 41:26

Su haazà is pitu he vaka he memelambù wey kes pitu he memetiugkey he menge parey ne sevaha zà is kehuluǥan din he iyan is pitu he tuig.

Genesis 41:28

Ne haazà he egkehitavù ne iyan en kes migkaǥi ku kenikew, Mahal he Hadì, he impezayag en kenikew te Megbevayà ke hengkey is ed-ul-ulahan din.

Genesis 41:32

Kezezuwa ipeteǥeinep te Megbevayà kenikew, Mahal he Hadì, su ibpesavut din he siguradu he ed-ul-ulahan din haazà wey meǥaan en utew is kegkeul-ulaha zuen.

2 Samuel 7:22

“Nengazen he MEGBEVAYÀ, utew ka iyan gemhanan! Wazà iyan ebpekerepeng kenikew wey wazè en minsan hentei pa he Megbevayà gawas kenikew. Wazè dey nezineg he megbevayà he iring kenikew.

1 Cronica 16:25

Su mekeǥeǥehem is Nengazen, ne ereg sikandin he edeliǥen. Dait sikandin he edtehuzen lavew te langun he zuma he menge ed-ezapen,

Nehemias 4:14

Ne zutun te kemulu ku pa ed-is-isipa is kebpekesavuk dey, impetawag ku is menge pengulu, menge upisyal, wey menge meǥinged, ne migkeǥiyan ku te, “Kenè kew mahandek te menge kuntada tew. Edtentenuzan tew zà is mekeǥeǥehem wey egkein-inuwan he Nengazen. Ebpekidtebek kiw su para melibri tew is menge kezuzumahi tew, menge anak tew, menge esawa tew, wey menge valey tew.”

Nehemias 9:32

“Sikew is Megbevayè dey, mekeǥeǥehem ka wey utew egkein-inuwi. Edtumanen nu is paaǥi nu te kebpekid-uyun wey ibpeehè nu is gaǥew nu. Ne ǥuntaan, kenè nu isipa he kenè key kenikew edtevangan kayi te kemereǥenan dey. Nekebmereǥen key is langun he menge etew nu, ragkes is menge hadì dey, is menge pengulu zey, is menge memumuhat dey, is menge ebpeneuven kayi te kenami, wey is menge kepuun dey, nekebmereǥen puun pa te timpu te kedlisliseza kenami te hadì te Asiria ne taman en guntaan.

Job 36:26

Mekeǥeǥehem is Megbevayà, ne kenè tew egketegkad is kegkemeǥeǥehem din, ne kenè tew egkekaǥi ke sengemenu en is keǥurang din.

Salmo 135:5

Netuenan ku he mekeǥeǥehem is Nengazen, he lavew te langun he zuma he menge ed-ezapen.

Salmo 145:3

Mekeǥeǥehem ka he Nengazen, umbe ereg ka he edeliǥen. Kenà egketegkad is kegkemekeǥeǥehem nu.

Salmo 2:9

Dumelaha nu sikandan, he wazè ebpekesukul te kedumala nu. Iring sikandan te ziniyun he ǥelemiten he edrupeten nu.’ ”

Salmo 48:1

Mekeǥeǥehem is Nengazen he Megbevayè tew, ne ereg sikandin he edeliǥen is diyà te inged din he iyan is Jerusalem he ziyà te segradu he vuvungan din.

Salmo 96:4

Su mekeǥeǥehem is Nengazen, ne ereg sikandin he edeliǥen. Dait sikandin he edtehuzen lavew te langun he zuma he menge ed-ezapen.

Isaias 28:16

Umbe, iyan heini egkeǥiyen te Nengazen he MEGBEVAYÀ: “Pemineg kew! Idsavuk ku ziyà te Zion is batu he pundasyun; batu he egkeseriǥan, melig-en wey mevali. Is midtuu kandin ne kenà meǥègaanen te menge ebeelan dan.

Daniel 2:24

Ne zutun midlikù si Daniel ziyà te ki Arioc he iyan kes midseriǥan duen te hadì te kebpenhimatey te uluwanen he menge etew ziyà te Babilonia. Migkaǥi si Daniel ziyà te kandin te, “Kenè nu zep-a penhimetayi is uluwanen he menge etew, kekenà, dumahi a zep-a kenikew ziyà te hadì su idseysey ku ziyà te kandin is kehuluǥan duen te teǥeinep din.”

Daniel 2:28

Piru zuen Megbevayà diyà te langit he ebpezayag te menge nekeeles he ketutuanan. Mahal he Hadì, pinaaǥi te teǥeinep nu, ibpetuenan te Megbevayà kenikew ke hengkey is huziyan he egkehitavù. Guntaan, idseysey ku kenikew is nelewasan nu pinaaǥi te teǥeinep nu.

Daniel 2:29

“Mahal he Hadì, sikan is teǥeinep nu, mehitenged heini te huziyan he egkehitavù, ne ibpetuenan heeyan kenikew te Megbevayà he ebpezayag te menge nekeeles he ketutuanan.

Daniel 2:44

“Dutun te timpu te kedhadì kayi te menge pengulu, edtukud is Megbevayà diyà te langit te sevaha he ginhedian he kenà egkezeetan te minsan keenu. Ne kenà heini egkezaag te zuma he ginhedian, su edèdeetan din pa ganì is langun he ginhedian ne ebpedayun heini he ginhedian taman te taman.

Daniel 8:25

Tenged te ebilidad din egkehimu sikandin he melempusen te kebpenlimbung din. Ebpegalbu sikandin, ne mahabet he menge etew is ebpenhimetayan din he kenè din en ebpetizeenan. Edsukulan din minsan is Pengulu te menge pengulu. Piru ziyà te huziyan he timpu edezeetan sikandin, kenà pinaaǥi te ǥehem te etew, kekenà, pinaaǥi te gehem te Megbevayà.

Haggai 2:22

Edèdeetan ku is menge ginhedian ne id-awè ku is gehem dan. Eberiudsungen ku is menge kerwahi zan wey is ebpemen-untud kayi. Ebpemematey is menge kudà ne ed-uuney ebpehimhimetayà is menge pereuntud kayi.

Zacarias 12:3

Dutun he andew edhimuwen ku is Jerusalem he iring te meveǥat he vatu. Ne is minsan hengkey he nasyun he ebitbit kayi ne egkesazir. Is langun he menge nasyun kayi te kelibutan edsevaha te kedsurung diyà te Jerusalem.

Malakias 1:11

Ebentuǥen a ziyà te menge nasyun puun te kedsilà te andew pehendiyà te kedsanlep kayi. Ebpemuhaten a te veyewà wey lunsey he menge pemuhat diyà te langun he lugar, su ebentuǥen a ziyà te menge nasyun. Iyan a, is Nengazen he Mekeǥeǥehem, is migkaǥi kayi.

Deuteronomio 10:17

Su is Nengazen he Megbevayè niw, Megbevayà te menge megbevayà wey Nengazen te menge nengazen. Mekeǥeǥehem wey egkein-inuwan sikandin he Megbevayà. Wazè din ibpelavi ne kenà sikandin egkeuwit te suhul.