Daniel 2:28 - Manobo Western Bukidnon OT

²⁸ Piru zuen Megbevayà diyà te langit he ebpezayag te menge nekeeles he ketutuanan. Mahal he Hadì, pinaaǥi te teǥeinep nu, ibpetuenan te Megbevayà kenikew ke hengkey is huziyan he egkehitavù. Guntaan, idseysey ku kenikew is nelewasan nu pinaaǥi te teǥeinep nu.

Daniel 2:28 ပူးပေါင်းရင်းမြစ်များ

Genesis 40:8

Ne midtavak dan te, “Geina te neketeǥeinep key, iyan, wazà ebpekeseysey ke hengkey is kehuluǥan duen te teǥeinep dey.” Ne migkaǥi zutun si Jose te, “Megbevayè dà is ebpekepezayag kenitew te kehuluǥan te menge teǥeinep. Keǥiya niw kun kediey is teǥeinep niw.”

Genesis 41:16

Ne midtavak si Jose te, “Kenà a iyan, Mahal he Hadì, kekenà, iyan dà is Megbevayà ebpekeveǥey te kehuluǥan te menge teǥeinep he meupiya para kenikew.”

Genesis 41:25

Ne migkaǥi zutun si Jose ziyà te hadì te, “Mahal he Hadì, sebsevaha zà is kehuluǥan duen te zezuwa he teǥeinep nu. Impezayag en kenikew te Megbevayà ke hengkey is ed-ul-ulahan din.

Genesis 49:1

Ne zutun mid-umew ni Jacob is menge anak din, ne ke sikandin te, “Pen-uvey kew kayi su wey ku sikiyu mekeǥiyi ke hengkey is egkeulaula keniyu keuzemà.

Salmo 115:3

Diyà te langit is Megbevayè dey ne ebeelan din ke hengkey is egkesuatan din.

Isaias 2:2

Diyà te huziyan he menge andew, sikan is buvungan he edhitindeǥan duen te valey te Nengazen egkehimu he lavew he impurtanti te langun he menge vuvungan. Ne ebpekeuma kayi he vuvungan is mahabet he menge etew he ebpemuun diyà te langun he menge nasyun.

Jeremias 10:7

Hentei man is kenà edtahud kenikew te hadì te menge nasyun? Utew ke man dait he edtehuzen. Wazà ebpekeiring kenikew zuen te langun he uluwanen diyà te nekedseselekawà he menge nasyun, ne kenà ebpekeiring kenikew is langun he menge hadì dan.

Jeremias 30:24

Ne kenà egkaawà is utew ku kegkepauk emun kenè ku pa egkeveelan is egkesuatan ku te ebaal. Ne ziyà te huziyan he menge andew egkesavut niw zed heini.”

Jeremias 48:47

Piru ziyà te huziyan he timpu, idlikù ku zed is meupiya he kebpekesavuk diyà te Moab. Iyan a, is Nengazen, is migkaǥi kayi.” Iyan heini menge lalag mehitenged te Moab.

Ezekiel 28:3

Egkeisip nu he edhuna ke pa he metau ki Daniel, ne wazà id-eles he kenè nu egketuenan.

Ezekiel 38:16

Edsurungen nu is menge etew ku he Israilihanen he henduen kew te ǥapun he ebpeketambun te tanà. Uya, ibpesurung ku kenikew Gog, is nasyun ku te huziyan he timpu. Ne pinaaǥi te ebpeveelan ku kenikew, igkepeehè ku ziyà te menge nasyun is kegkewaǥas ku. Ne egketuenan dan he iyan a Nengazen.’ ”

Ezekiel 38:8

Dutun te ebpekeuma he menge andew ebmenduan ku sikiyu te kedsurung te Israel, he nekeenew en puun te kegkezeeti zuen he midtiǥum is menge meǥinged duen diyà te menge vuvungan te Israel he nehimu he mekevulungbulung seled te neuǥet he timpu. Nekelikù en is menge meǥinged kayi puun te menge nasyun ne melinawen en is ked-ubpè dan.

Daniel 1:20

Dutun te langun he in-insà te hadì diyà te kandan, netuenan din he sepulù he takep is kedlavew te ketau zan te ketau te menge selemengkiru wey menge veyilan seled te tivuuk he ginhedian din.

Daniel 10:14

Ne ǥuntaan, kayi a su wey ku ikepesavut kenikew ke hengkey is egkehitavù te zuma nu he menge Israilihanen te huziyan he timpu, su is kenikew he naahà mehitenged te egkehitavù te huziyan he timpu.”

Daniel 2:18

Migkeǥiyan sikandan ni Daniel he mebpengemuyù dan su para mehizuwi sikandan te Megbevayà diyà te langit ne metueni zan is kehuluǥan duen te teǥeinep te hadì, su para kenà sikandan mehimetayi duma te zuma he uluwanen he menge etew ziyà te Babilonia.

Daniel 2:22

Ibpezayag din is mezalem wey ebpemekeeles. Diyà te kandin is kerayag, ne egketuenan din ke hengkey is diyà te merusirem.

Daniel 2:44

“Dutun te timpu te kedhadì kayi te menge pengulu, edtukud is Megbevayà diyà te langit te sevaha he ginhedian he kenà egkezeetan te minsan keenu. Ne kenà heini egkezaag te zuma he ginhedian, su edèdeetan din pa ganì is langun he ginhedian ne ebpedayun heini he ginhedian taman te taman.

Daniel 2:45

Iring duen te neehè nu he vatu he midtipak puun te vuntud (piru kenà etew is midtipak duen) he nekevekbek duen te ledawan he putew, brunsi, brik, pelata, wey vulawan. “Mahal he Hadì, mibpezayag is mekeǥeǥehem he Megbevayà diyà te kenikew ke hengkey is huziyan he egkehitavù. Ne iyan heeyan kes teǥeinep nu wey kehuluǥan din. Ne tutuu heini is langun he migkaǥi ku.”

Daniel 2:47

Migkaǥi sikandin diyà te ki Daniel te, “Tenged te kedtudtula nu zuen te teǥeinep ku wey kedseysaya nu te kehuluǥan din, ne tutuu iyan he is Megbevayà he ed-ezapen nu ne lavew he mekeǥeǥehem te langun he ebpen-ezapen te menge etew. Iyan sikandin ereg he egkilelaan he Egalen te menge hadì. Ne iyan dà sikandin ebpekepezayag te nekeeles he menge ketutuanan.”

Daniel 4:5

Piru zuen ku teǥeinep he ingkahandek ku wey ingkesemuki ku.

Hoseas 3:5

Piru ziyà te huziyan, he edtelinguma he menge andew, edlikù dan edangep diyà te Nengazen he Megbevayè dan wey ziyà te hadì dan he kevuwazan ni David. Ed-uvey zan diyà te Nengazen duma is kedtahud tenged te ketulanged din.

Amos 4:13

Is Megbevayà, iyan mibaal te menge vuvungan wey midlimbag te keramag, ne iyan daan sikandin edliwan te meselem te mezukilem. Impahayag din diyà te etew is menge pelanu zin, ne iyan sikandin ebayàbayà te tivuuk he kelibutan. Is ngazan din iyan is Nengazen he Megbevayà he Mekeǥeǥehem.

Numero 24:14

Guntaan, ed-ulì ad diyà te menge emurè ku te inged. Piru ebpetizeenan ku sikew he zaan ke hengkey is ebeelan kayi he menge etew ziyà te menge etew nu ziyà te huziyan he menge andew.”

Deuteronomio 31:19

“Umbe isurat nu heini he kanta ne ipenurù nu ziyà te menge Israilihanen. Ipekanta nu heini kandan su para mehimu heini he tistiǥus ku kuntra kandan.

Deuteronomio 4:30

Emun egkehitavù heini he kelised diyà te keniyu te huziyan he timpu, edlikù kew ziyà te Nengazen he Megbevayè niw ne ebpezumdumahan niw en human is menge lalag din keniyu.