Daniel 2:11 - Manobo Western Bukidnon OT

¹¹ Utew mereǥen is ebpeveelan nu kenami, Mahal he Hadì. Menge ed-ezapen dà is ebpekehimu keniyan, piru wazè man sikandan med-amur te menge etew.”

Daniel 2:11 ပူးပေါင်းရင်းမြစ်များ

Genesis 41:39

Ne migkeǥiyan din si Jose te, “Geina te iyan ka kes mibpezayaǥan te Megbevayà te langun kayi, nesavut dey he wazà duma pa he etew he metau wey zuen din kedsavut he iring kenikew.

Genesis 41:8

Ne hein nepawà, utew neliveg haazà is hadì tenged dutun te menge teǥeinep din, ne impetawag din is langun he menge selemengkiru wey uluwanen he menge etew ziyà te ǥinhedian din he Ehipto. Ne midtudtulan din sikandan te menge teǥeinep din, piru wazà minsan hentei kandan he ebpekeseysey zutun te hadì ke hengkey is kehuluǥan dutun.

1 Hadì 8:27

“Piru, sikew, Megbevayà, tutuu ve iyan he ebpekeubpè ka kayi te tanà? Minsan is langit ne kenè ka ganì ed-ereg minsan diyà te pinekemetikang he vahin kayi, kayi ke pe be vuwa med-ereg te valey he midtukud ku?

2 Cronica 6:18

“Piru, sikew, Megbevayà, tutuu ve iyan he ebpekeubpè ka kayi te tanà duma te menge etew? Minsan is langit ne kenè ka ganì ed-ereg minsan diyà te pinekemetikang he vahin kayi, kayi ke pe be vuwa med-ereg te valey he midtukud ku?

Salmo 132:14

“Iyan heini ubpeey ku taman te taman; kayi a ed-ubpà su kayi a egkesuat.

Salmo 68:18

Hein mibpeketikang sikandin, mahabet he menge vihag is mid-uwit din, ne midawat din is menge gasa he ebpuun diyà te menge etew, minsan is ebpuun diyà te mesinupaken kandin. Ne kayi te kenitew ed-ubpà is Nengazen he Megbevayà.

Exodus 29:45

Edlumun a keniyu te menge kevuwazan ni Israel ne egkehimu a he Megbevayè niw.

Exodus 8:19

Ne migkaǥi sikan is menge selemengkiru ziyà te hadì te, “Baal heini te Megbevayà!” Piru mezesen gihapun is gehinawa zuen te hadì, ne wazà sikandin mebpezumazuma ki Moises wey ki Aaron, su iyan heini migkaǥi te Nengazen.

Isaias 47:12

Sigi, ipelaus nu en is kegkeselemengkiru nu wey lamat he ebeelan nu puun te vatè ke pa. Kela ke mebmezeeǥen ka, etawa egkahandek is menge kuntada nu.

Isaias 57:15

Iyan daan heini egkeǥiyen te Utew Lavew he Megbevayà, kes Waǥas he Megbevayà he wazà pidtemanan te untung din: “Diyà a ed-ubpà te metikang wey segradu he lugar, piru ed-ubpa a zaan duma te menge etew he kenà ebpelavew wey mid-iniyug te mezaat he ulaula su wey ku sikandan melig-eni.

Isaias 8:18

Heini e zed wey is menge anak ku he imbeǥey te Nengazen kedì. Menge tuus key para te Israel he ebpuun diyà te Nengazen he Mekeǥeǥehem. Ed-ubpà sikandin diyà te Buvungan he Zion.

Daniel 4:4

“Emun bahin te kebpekesavuk ku kayi te turuǥan, ne meupiya wey meuswaǥen a.

Daniel 5:11

su zuen sevaha he etew kayi te ginhedian nu he ziyà te kandin is mulin-ulin te waǥas he menge ed-ezapen. Te timpu te kedhadì te amey nu he si Hadì Nebucadnezar, impaahà kayi he etew is ketau zin he iring te ketau te menge ed-ezapen. Midhimu sikandin te amey nu he pengulu te menge selemengkiru, menge veyilan, menge menenagnà, wey menge mengingingkuris.

Joel 3:21

Ibpenimales ku is kebpenhimetayi te menge etew ku; edsilutan ku is mibaal kayi ziyà te kandan. Iyan a, is Nengazen, ed-ubpà diyà te Zion.”

Numero 35:34

Umbe, kenè niw remeriki is tanà he ed-ubpaan niw. Su siak mismu is Nengazen, mibpekid-amur a keniyu te menge Israilihanen.”