Daniel 12:4 - Manobo Western Bukidnon OT

⁴ Piru sikew, Daniel, isira nu zà dèpa heini is libru, wey kenè nu en dèpa tudtula is menge lalag kayi taman te egkeuma is ketepusan. Dutun te kenè pa heini ibpahayag ne mezakel is egkesuat he mesavut dan is egkengehitavù.”

Daniel 12:4 ပူးပေါင်းရင်းမြစ်များ

Isaias 11:9

Wazè en ebpesipala etawa ebpendezaat te segradu he vuvungan ku. Su is menge linimbag kayi te kelibutan egkepurung egketeǥui te keuluwanen mehitenged te Nengazen, iring te kegkepenua te zaǥat te wahig.

Isaias 29:11

Su ziyà te keniyu, heini is langun he impezayag keniyu iring te libru he siradu. Ne emun ibpevasa heini te etew he metau he ebasa, ne ke sikandin te, “Kenè ku heeyan ebesahan su siradu.”

Isaias 30:26

Is kerayag te vulan egkehimu he iring te kerayag te andew, ne is kerayag te andew ne kepipitu egketakep, iring kerayag te kerayag te pitu he andew he impedtempuwà. Egkeulaula heini zutun te timpu te kebewii te Nengazen te menge palì he nehimu tenged te kedletiguwa zin keniyu te menge etew zin.

Isaias 32:3

Ebpen-ehè en wey ebpemineg en is menge etew te Megbevayà.

Isaias 8:16

Sikiyu is menge edsunud kedì, kenè niw lipati is menge penurù ku.

Jeremias 5:1

Migkaǥi is Nengazen te, “Sikiyu is menge meǥinged diyà te Jerusalem, hendiyè kew te menge zalan! Ne ehàa niw is menge pelasa! Emun duen egketuredu niw he minsan sevaha zà he metazeng wey egkeseriǥan he etew, ebpeseyluwen ku is menge meǥinged te inged niw.

Daniel 10:1

Dutun te iketelu he tuig te kedhadì ni Cyrus diyà te Persia, duen impetuenan ki Daniel te migngezanan daan ki Belteshazar. Tutuu is impetuenan kandin, ne mehitenged heini te zekelà he tebek ne impelewasan heini kandin wey zin mesavut.

Daniel 10:14

Ne ǥuntaan, kayi a su wey ku ikepesavut kenikew ke hengkey is egkehitavù te zuma nu he menge Israilihanen te huziyan he timpu, su is kenikew he naahà mehitenged te egkehitavù te huziyan he timpu.”

Daniel 10:21

Midhengkayi a su wey ku ikeseysey ziyà te kenikew is ingkesurat diyà te Libru he Midsuratan te Tutuu. Dutun te kebpekidtebek ku, ne wazà duma he nekeuǥup kedì, kekenà, iyan dà si Micael he pengulu te Israel.

Daniel 11:33

“Is menge etew he nekesavut te tutuu, ebpenuruen dan is mahabet he menge etew, piru ebpesipelahan sikandan seled te egkepipira he andew. Is duma kandan ebpenhimetayan pinaaǥi te ispada etawa hapuy, ne is duma pa ebihaǥen etawa ed-eǥawen is menge azen dan.

Daniel 11:40

“Emun egkeume en is ketepusan, ebpekidtebek is hadì diyà te zivavà te hadì diyà te zizaya. Piru edtebeken sikandin duen te hadì diyà te zizaya duma is ebpemen-untud te kerwahi wey pereuntud te kudà wey te mahabet he menge varku. Heini sikandin, iring te zalem he edsurung te menge nasyun, ne ebpendezeetan din sikandan.

Daniel 12:13

“Ne sikew Daniel, leusa nu is menge vaal nu. Ebpatey ka piru ebenhawen ka te ketepusan he menge andew su para mezawat nu is bales te menge vaal nu he inteǥana para kenikew.”

Daniel 12:5

Hein nekepasad sikandin he egkaǥi, duen ku pa naahà he dezuwa he etew he ebpemenhithitindeg diyà te pesikilizà duen te wahig.

Daniel 12:9

Ne midtavak sikandin te, “Daniel, taǥad ke zà, su is tavak te insè nu ne id-eles pa heini ne kenà ereg he edtudtulen taman te kegkeuma te ketepusan.

Daniel 8:17

Ne hein mid-uvey kayi te kedì si Gabriel, midluhud a tenged te kegkahandek ku. Piru migkaǥi sikandin te, “Sikew is etew, kinahanglan he egkesavut nu sikan is nelewasan nu, he mehitenged te huziyan he timpu.”

Daniel 8:19

Ke sikandin te, “Egkeǥiyan ku sikew ke hengkey is egkehitavù te huziyan he timpu emun edsilut en is Megbevayà tenged te pauk din. Iyan ibpaalung te neehè nu, is egkehitavù te huziyan he timpu.

Daniel 8:26

“Daniel, tutuu is migkaǥi ku kenikew he mehitenged te kebpeengkezi te meselem wey mahapun he kebpemuhat. Piru kenè nu en dèpa tudtula heini su egkeuǥet pa egkehitavù.”