Daniel 11:45 - Manobo Western Bukidnon OT

⁴⁵ Ebangun sikandin te tulda zin te hadì diyà te mid-elangan te zaǥat wey te mekempet wey segradu he vuvungan. Piru te huziyan he timpu egkepatey sikandin he wazà ebpeketavang kandin.”

Daniel 11:45 ပူးပေါင်းရင်းမြစ်များ

Salmo 48:2

Mekempet is ketikang kayi he vuvungan ne ebpekeveǥey te kelipey te tivuuk he kelibutan. Heini is segradu he Buvungan he Zion iyan inged te Mekeǥeǥehem he Hadì.

Isaias 10:12

Piru iyan heini migkaǥi te Nengazen he egkehitavù emun egkepasad din en is ebeelan din he ebpekesuǥat te Buvungan he Zion wey ziyà te Jerusalem: “Edsilutan ku is hadì te Asiria tenged te kegkemepelevawen din wey kegkegelbuwen!

Isaias 11:9

Wazè en ebpesipala etawa ebpendezaat te segradu he vuvungan ku. Su is menge linimbag kayi te kelibutan egkepurung egketeǥui te keuluwanen mehitenged te Nengazen, iring te kegkepenua te zaǥat te wahig.

Isaias 14:13

Migkaǥi ka ziyà te ǥehinawa nu te, ‘Ebpemenahik a ziyà te langit, ne idsavuk ku is pinuuwè ku te kedhadì diyà te zivavew te menge vituen te Megbevayà. Ebpinuu a ziyà te zivavew te vuntud he ziyà te zizaya he zutun edtiǥuman is menge ed-ezapen.

Isaias 2:2

Diyà te huziyan he menge andew, sikan is buvungan he edhitindeǥan duen te valey te Nengazen egkehimu he lavew he impurtanti te langun he menge vuvungan. Ne ebpekeuma kayi he vuvungan is mahabet he menge etew he ebpemuun diyà te langun he menge nasyun.

Isaias 27:13

Dutun he timpu ibpezaǥing is mezaǥing he vudyung. Ne ebpemenlikù diyà te Jerusalem is menge Israilihanen he nekaantus te kegkevihaǥa kandan diyà te Asiria wey Ehipto. Ne ed-ezapen dan is Nengazen, diyà te segradu he vuvungan diyà te Jerusalem.

Isaias 65:25

Ebpetuǥenà te kegkaan is dumezaas he menge asu wey menge kerehidu. Is menge erimaung ebpenabtab te reǥami iring te menge vaka. Ne is menge uled kenè en ebpemengaǥat. Wazè en ebpesipala etawa edezaat te segradu he vuvungan ku. Iyan a, is Nengazen, is migkaǥi kayi.”

Isaias 66:20

Ne id-ulì dan is langun he menge zuma niw he Israilihanen puun keniyan he menge nasyun; ne ed-untud dan te menge kudà, menge mula wey menge kemilyu, wey menge kerwahi wey kerumata. Edumahan dutun te menge menunudtulà sikandan diyà te segradu he vuvungan ku ziyà te Jerusalem su iring sikandan te pemuhat kayi te kediey. Iring heini te ebeelan te menge Israilihanen he ed-uwit diyà te valey ku te menge pemuhat he para gasa he intaǥù diyà te lumpiyu he teleǥuey.

Ezekiel 39:2

Eguyuzen ku sikew puun te meziyù diyà te zizaya pehendiyà te menge vuvungan te Israel.

Daniel 11:16

Umbe, ebeelan en duen te hadì diyà te zizaya is minsan hengkey he egkesuatan din te ebaal, ne wazè en ebpekezawey kandin. Edsekupen din is menge meǥinged diyà te mekempet he tanè he Israel ne ebpepurung sikandan ebpezizalem te ǥehem din.

Daniel 11:41

Ragkes te edsurungen din is menge etew ziyà te mekempet he tanà he Israel, ne mahabet he menge etew is egkepatey. Piru kenè din egkezaag is Edom, is Moab, wey is menge pengulu te menge Amunihanen.

Daniel 11:44

Piru zuen menge tudtul he ebpuun diyà te edsilaan wey te zizaya he ebpekepekulbà kandin. Umbe egkezumahan te zekelà he pauk is kebpekidtebek din, ne mahabet he menge etew is ebpenhimetayan din.

Daniel 2:35

Ne nelaus en mevekbek haazà is tivuuk he ledawan he putew, brik, brunsi, pelata, wey vulawan. Ne neiring heini te ukap te ginunas he ibpenlayap te keramag diyà te minsan hendei. Piru haazà is batu he nekevekbek duen te paa te ledawan, midekelà ne nehimu he vuntud he nekeeneb te tivuuk he kelibutan.

Daniel 7:26

Piru emun egketapus en haazà, edhukuman sikandin, ne id-awa diyà te kandin is gehem din, ne wazè en kurang te kedèdeeti kandin.

Daniel 8:25

Tenged te ebilidad din egkehimu sikandin he melempusen te kebpenlimbung din. Ebpegalbu sikandin, ne mahabet he menge etew is ebpenhimetayan din he kenè din en ebpetizeenan. Edsukulan din minsan is Pengulu te menge pengulu. Piru ziyà te huziyan he timpu edezeetan sikandin, kenà pinaaǥi te ǥehem te etew, kekenà, pinaaǥi te gehem te Megbevayà.

Daniel 9:16

Umbe, Nengazen, tenged dà te kenikew he keupiya, edhangyù a ziyà te kenikew he iawè nu en is pauk nu te menge meǥinged diyà te Jerusalem te inged nu he segradu he vuvungan. Tenged te menge salè dey wey menge salà te menge kepuun dey, mibpeel-elezan key wey is menge tig-Jerusalem te menge etew he nekeelingkus kenami.

Daniel 9:20

Mibpedayun a is ebpengemuyù wey edtug-an te menge salè ku wey menge salà te menge zuma ku he menge Israilihanen. Midhengyuan ku is Nengazen he Megbevayè ku para te segradu he vuvungan din.

Joel 2:20

Ibpaawè ku is menge edsurung keniyu he ebpuun diyà te zizaya, ne edsegseǥen ku sikandan pehendiyà te disirtu. Is nehuna he grupu zan ne edsegseǥen ku pehendiyà te Daǥat he Minatey ne is egkehuziyan he grupu zan ne edsegseǥen ku pehendiyà te Zaǥat he Mediteraneo. Ne egkengemahù sikandan.” Utew egkein-inuwi is menge mibeelan te Nengazen.

Micas 4:2

Ke sikandan te, “Hendini kew en, su edtekezeg kiw ziyà te vuntud te Nengazen, diyà te valey te Megbevayà ni Jacob. Su ebpenuruen kiw zin te menge paaǥi zin su wey tew metuman heini.” Umbe, ed-ulì is menge etew he ebpuun diyà te Zion, he iyan is inged he Jerusalem, ne ed-uwiten dan is kesuǥuan te Nengazen.

Zacarias 14:8

Dutun he andew edtudà is utew meupiya he wahig puun te Jerusalem. Is ketengà kayi edtudà pehendiyà te Daǥat he Minatey ne is ketengà ne ebpehendiyà te Daǥat he Mediteraneo. Ebpedayun is kedtudà kayi ke ǥulavung wey tipenguzan.

Numero 34:5

ne ebulegkù pehendiyà te zal-ug te Ehipto, ne edunggù diyà te Zaǥat he Mediteraneo.