Daniel 1:2 - Manobo Western Bukidnon OT

² Mibihag din si Hadì Jehoyakim su iyan heeyan egkesuatan te Nengazen he mehitavu. Mibpenguwa zin is duma he menge azen diyà te valey te Megbevayà ne mid-uwit din diyà te Babilonia. Ne intaǥù din haazà diyà te teleǥuey te ketiǥeyunan diyà te valey he ed-ezapan te kandin he ed-ezapen.

Daniel 1:2 ပူးပေါင်းရင်းမြစ်များ

Genesis 10:10

Iyan menge zekelà he inged diyà te ǥinhedian din is Babilonia, is Erec, wey is Acad, he menge inged diyà te tanà he sakup te Shinar.

Genesis 11:2

Ne zutun te kedhalinhalin te menge etew pehendiyà te zapit te edsilaan, neehè dan is meluag he menge suǥud diyà te Shinar, ne zutun dan med-ubpà.

2 Hadì 24:1

Dutun te timpu te kedhadì ni Jehoyakim, midsurung ni Hadì Nebucadnezar he hadì te Babilonia is Juda ne nehimu he sakup din si Jehoyakim seled te tetelu he tuig. Piru te huziyan he timpu nekidsukulà si Jehoyakim ki Nebucadnezar.

2 Cronica 36:5

Mibpenuiǥen si Jehoyakim te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Mezaat is ulaula zin diyà te etuvangan te Nengazen.

2 Cronica 36:7

Mid-uwit daan ni Nebucadnezar is duma he menge gelemiten diyà te valey te Nengazen ne intaǥù din diyà te turuǥan din.

Ezra 1:7

In-ulì ni Hadì Cyrus diyà te kandan is menge gelemiten diyà te valey te Nengazen he migkuwa ni hadì Nebucadnezar ziyà te Jerusalem ne mid-uwit din diyà te simbahan he ed-ezapan te menge ed-ezapen din.

Isaias 11:11

Dutun daan he timpu, ed-umanan egemita te Nengazen is gehem din te kebpeulì te nesamà he menge etew zin diyà te Asiria, Ehipto, Patros, Etiopia, Elam. Babilonia, Hamat, wey is diyà te menge pulu.

Isaias 42:24

Hentei is midtuǥut he ebpenekawan wey ed-eǥawan te menge azen is menge Israilihanen? Kenè be iyan is Nengazen he neselaan tew? Su wazè kiw medsunud te menge paaǥi zin wey wazè kiw medtuman te kesuǥuan din.

Jeremias 25:1

Heini he tudtul mehitenged te menge etew ziyà te Juda migkaǥi te Nengazen diyà te ki Jeremias hein ikeepat he tuig te kedhadì ni Jehoyakim diyà te Juda, te anak ni Josia. Ne iyan daan heini nehuna he tuig te kedhadì ni Nebucadnezar ziyà te Babilonia.

Jeremias 27:16

Ne migkeǥiyan ku is langun he menge memumuhat wey is langun he menge etew te, “Migkaǥi is Nengazen he kenè kew tuu te menge ebpeneuven he egkaǥi te kenè en egkeuǥet idlikù en puun te Babilonia is menge gelemiten diyà te valey te Nengazen. Tarù is egkeǥiyan dan diyà te keniyu.

Jeremias 28:3

Seled te zezuwa he tuig idlikù kayi he lugar is langun he ǥelemiten diyà te valey ku he mibpenguwa ni Hadì Nebucadnezar ne mid-uwit din diyà te Babilonia.

Jeremias 35:11

Piru hein midsurung ni Hadì Nebucadnezar he hadì te Babilonia heini is nasyun, nahandek key te menge sundaru te Babilonia wey Aram, umbe nekedisisyun key he edhengkayi key te Jerusalem umbe kayi key ǥuntaan med-ubpà.”

Jeremias 50:2

“Ipetueni nu ziyà te menge nasyun is tudtul! Ne ivayew is bendirà ne ipetueni te langun: ‘Egkezeetan is Babilonia! Egkerupet wey egkepeel-elezan is menge ed-ezapen kayi he si Bel wey si Marduk.’

Jeremias 51:44

Edsilutan ku si Bel is ed-ezapen diyà te Babilonia. Ibpeutè ku kandin is mibpen-eveleng din. Kenè en ebpekeuma is mahabet he menge etew he ebpuun diyà te menge nasyun he ed-azap kandin. Ne egkengetempag is berengbeng te Babilonia.

Daniel 5:13

Umbe, impetawag si Daniel. Ne hein nekeume en sikandin, migkaǥi haazà is hadì te, “Iyan ke ve si Daniel he sevaha zuen te menge vihag he Judio he mid-uwit kayi te amey ku puun te Juda?

Daniel 5:18

“Mahal he Hadì, ketau te Utew Lavew he Megbevayà is kegkehimu he hadì te amey nu he si Nebucadnezar. Nehimu sikandin he mekeǥeǥehem wey mibeǥayan te menge etew te zengeg.

Habakuk 1:16

Ne tenged te mahabet is nevihag dan, midalig dan is keugelingen dan tenged te kebpekegaga zan; iring sikandan te mengingisdà he mibeǥayan din te zengeg is bunuwit din etawa puket din pinaaǥi te kedtutung te veyewà he pemuhat para kayi he menge azen. Su pinaaǥi te vunuwit din etawa puket din ne midsepian sikandin ne egkekaan din is metaam he menge keenen he egkesuatan din te egkaan.

Zacarias 5:11

Midtavak sikandin te, “Ziyà te Babilonia he zutun ebengunen is simbahan he para kayi. Emun egkepasad en is simbahan, ne ibpelastar zutun heeyan is revan su para ed-ezapen.”

Deuteronomio 32:30

Ebmenmenuwen man te kedal-as te sevaha he etew is nengkelibu he menge Israilihanen? Ebmenmenuwen te zezuwa he etew he melupig dan is sepulù he libu ziyà te kandan? Eghimu zan dà haazà emun idtuǥut kandan te Nengazen he iyan endilungè dan he iring te vatu.

Zatù 2:14

Ne tenged te pauk te Nengazen te menge Israilihanen, mibey-anan din sikandan he surunga te menge tulisan he egkuwa te menge azen dan.

Zatù 3:8

Tenged kayi nepeukan sikandan te Nengazen, umbe mibey-anan din sikandan he mezaag ni Hadì Cushan Rishataim he hadì te Aram Naharaim. Nesakup din sikandan seled te walu he tuig.

Zatù 4:2

Umbe, impesakup en maan sikandan te Nengazen ki Hadì Jabin he Canaanhen, he midhadì diyà te inged he Hazor. Is pengulu te menge sundaru ni Jabin iyan si Sisera he meǥinged diyà te Haroshet Hagoyim.

1 Samuel 5:2

Ne ziyè dan itaǥù te valey he para te ed-ezapen dan he si Dagon ne zutun dan isavuk te zurug te ledawan din.