Amos 9:9 - Manobo Western Bukidnon OT

⁹ Benar iyan, emun iyan a ebmandù, ne ed-eyaǥen ku sikiyu is menge etew te Israel duma te menge etew ziyà te langun he menge nasyun, iring te ked-ayag te trigu. Iring te kenà edlahus diyà te eyagan is nekesahug he menge vatu, ne kenà daan ebpekeliyu te silut is menge lalung keniyu, kekenà,

Amos 9:9 ပူးပေါင်းရင်းမြစ်များ

Isaias 27:12

Emun egkeume en haazà, edtiǥumen te Nengazen is menge Israilihanen puun te Wahig he Eufrates taman te zal-ug te Ehipto he iring te kedtiǥum te ginunas he trigu.

Isaias 28:28

Is trigu he ebeelan he supas, melemu egkerupet. Umbe kenè din heini edsiguduwan te egunas. Kerumata is igunas din kayi, piru ebpekeventayan din he kenà heini egkengerupet.

Isaias 30:28

Is gehinawa zin iring te zalem he teǥelieg. Edezeetan din is menge nasyun he henduen be te ebpesiriyen din iring te trigu. Iring sikandan te uyaǥen he mibusalan wey miguyud.

Jeremias 31:36

Mintras kemulu pa is langit wey is kelibutan, ne ebpedayun daan is sevaha he nasyun is Israel te wazà pidtemanan.

Jeremias 46:28

Umbe, kenè kew en egkahandek, is menge kevuwazan te suluǥuen ku he si Jacob, su zuma a keniyu. Ebpurungan ku edezeeti is langun he menge nasyun he zutun ku sikiyu ipeyapat, piru kenè ku mulà sikiyu ebpurungan edezeeti. Ebmensuwen ku sikiyu, sumalà is ereg keniyu. Kenà egkehimu he kenè ku sikiyu edsilutan. Iyan a, is Nengazen, is migkaǥi kayi.”

Jeremias 49:36

Edsurungen is Elam te menge kuntada he ebpemuun diyà te heepat he menge lugar kayi te kelibutan, ne ibpeyapat ku is menge meǥinged dutun diyà te minsan hendei. Ne ebihaǥen sikandan diyà te langun he menge nasyun kayi te kelibutan.

Ezekiel 20:38

Idtapid ku puun keniyu is menge midsupak kedì. Minsan ibpeǥawas ku sikandan puun te nasyun he mibihag kandan, piru kenè dan gihapun ebpekeseled diyà te tanà he Israel. Ne zutun egketuenan niw he iyan a Nengazen.’ ”

Ezekiel 36:19

Impeyapat ku sikandan diyà te zuma he menge nasyun. Mibeelan ku ziyà te kandan is ereg he ibales te menge vetasan dan wey menge ulaula zan.

Ezekiel 39:28

Ne egketuenan dan he iyan a Nengazen he Megbevayè dan. Su minsan impevihag ku sikandan pehendiyà te menge nasyun, piru ed-umanan ku sikandan edtiǥuma ziyà te keugelingen dan he tanà ne wazà minsan sevaha he egkesamà.

Ezekiel 5:10

Egkeenen te menge ǥinikanan is menge anak dan, ne egkeenen te menge anak is menge ǥinikanan dan. Edsilutan ku iyan sikiyu, ne is egkesamà keniyu ibpeyapat ku kayi te tivuuk he kelibutan.

Ezekiel 5:12

Ebehinen ku sikiyu te tetelu he vahin. Is egkehuna he vahin ebpematey keniyan te inged pinaaǥi te vitil wey menge zaru. Is ikezuwa he vahin ebpematey pinaaǥi te ispada ziyà te ǥawas keniyan te inged. Ne is iketelu he vahin ibpeyapat ku kayi te tivuuk he kelibutan ne ibpelaus ku is kedlisliseza ku kandan.

Leviticus 26:33

Ebpeeǥiyan ku sikiyu te tebek he edezaat te tanè niw ragkes en is menge inged kayi, ne ibpeyapat ku sikiyu ziyà te zuma he menge nasyun, ne egkehimu he mekevulungbulung is tanè niw.

Deuteronomio 28:64

“Ibpeyapat kew te Nengazen diyà te langun he menge nasyun kayi te kelibutan, puun te kinekilizan pehendiyà te kinekilizan. Ne zutun he menge nasyun ed-azap kew te zuma he menge ed-ezapen he vineelan he ebpuun te kayu wey vatu, he wazà hanew niw zuen wey te menge kepuun niw.