Amos 2:4 - Manobo Western Bukidnon OT

⁴ Iyan heini migkaǥi te Nengazen mehitenged te Juda: “Tenged te kedtulung kebaal te salà te menge tig-Juda, edsilutan ku sikandan. Su inselikwey zan is menge kesuǥuan ku wey wazè dan tumana is menge sulunuzen. Neketazin kandan is kebpenilbi zan te zuma he menge ed-ezapen he midsilbiyan daan te menge kepuun dan.

Amos 2:4 ပူးပေါင်းရင်းမြစ်များ

2 Hadì 17:19

Minsan ganì is tribu ni Juda wazè man medtuman te menge suǥù te Nengazen he Megbevayè dan. Mid-iringan dan is vaal he impenurù kandan te menge tig-Israel.

2 Cronica 25:14

Hein midlikù si Amazia he ebpuun te kebpenhimetayi zin te menge Edomanhen, mibpen-uwit din is menge ed-ezapen te menge Edomanhen. Midhimu zin heini he menge ed-ezapen din, mid-azap din, wey mibpemuhat din te menge pemuhat.

2 Cronica 30:7

Kenè niw iringi is menge kepuun niw wey menge kezuzumahi niw he kenà mepezumdumahan te Nengazen he Megbevayè dan, ne tenged kayi midhimu te Nengazen he utew mezaat is silut din iring te neehè niw ziyà te kandan.

Nehemias 1:7

Mezaat is menge vaal zey ziyà te kenikew. Wazè dey tumana is menge suǥù nu wey menge sulunuzen he imbeǥey nu kenami pinaaǥi ki Moises he suluǥuen nu.

Nehemias 9:26

“Piru minsan pa te iyan haazà, midsupak dan wey nekidsukulà kenikew. Mid-iniyuǥan dan is Kesuǥuan nu. Mibpenhimetayan dan is menge ebpeneuven nu he ed-umew kandan te kedlikù diyà te kenikew. Utew subra is kedsumpelita zan kenikew!

Isaias 28:15

Su ibpehambug niw is kegkaǥi niw te, “Nekidsebutè key te kemetayen he kenè key zin kevuta, wey nekid-uyun key te iveyaan he kenè key zin ipehendiyà. Umbe kenè key egkekeizan minsan ebpekeuma is bangkit he iring te zalem, su midsarig key te menge ketetarù wey mid-endilung key ziyà te menge limbung.”

Isaias 44:20

Iring dà sikandin te migkaan te avu. Is nerusireman he isip din iyan midtazin kandin, ne kenè din egkelibri is keugelingen din. Kenè din egkezawat he haazà is ed-ezapen he migewezan din ne kenà tutuu he megbevayà.

Jeremias 16:11

Keǥiyi nu sikandan he iyan heini tavak ku: Iyan imbeeli ku kayi is geine te inselikwey a te menge kepuun niw. Nenilbi zan wey mid-azap te zuma he menge ed-ezapen. Inselikwey e zan ne wazè dan tumana is menge kesuǥuan ku.

Jeremias 16:12

Ne sikiyu edhuna kew pa he lalung kenà te menge kepuun niw. Wazè kew mebpezumazuma kedì, kekenà, iyan niw mibpezumdumahan is kenà mepezumdumahan he mezaat he gehinawa niw.

Jeremias 17:27

Iyan, emun kenè kew edsunud kediey su kenè niw ed-isipen he segradu he andew is Andew te Kedhimeley, kekenà, ed-uwit kew te menge velegyè niw ziyà te menge pultahan te Jerusalem dutun he andew, ebinsulan ku is menge pultahan te Jerusalem ragkes is melig-en he menge vahin kayi he inged, ne wazà ebpekeevuk kayi he hapuy.’ ”

Jeremias 6:19

Pemineg ka, is kelibutan! Ebpeuwitan ku te kezeetan heini he menge etew he idsilut ku kandan tenged te mezaat he menge planu zan. Su wazè dan pemineǥa is menge lalag ku wey inselikwey zan is kesuǥuan ku.

Jeremias 8:2

Ne ebpekepeyapat heini ziyà te tanà he egkesilaan te andew, bulan wey menge vituen he mibmahal zan, midsunud dan, midengepan dan, wey mid-azap dan. Kenè en edtiǥumen is menge tulan dan wey ikeleveng, kekenà, ebpekepeyapat dà heini ziyà te tanà he henduen be te menge tai.

Jeremias 8:9

Egkepeel-elezan is migkilala zan is keugelingen dan he uluwanen sikandan. Utew sikandan egkengahandek su ebihaǥen man sikandan, tenged te kedselikwaya zan te menge lalag ku. Tutuu ve he metau sikandan?

Jeremias 9:14

Iyan dan nasì midsunud is kemesinupaken te ǥehinawa zan. Mid-azap dan is duma he menge ed-ezapen sumalà te impenurù kandan te menge kepuun dan.

Ezekiel 13:22

“Naawà is kezasig te menge metazeng tenged te menge tarù niw, ne minsan siak wazà a mebeǥey kandan te seeng. Ne midasig niw is menge lalung he kenè dan ewai is kelelalung dan pinaaǥi te kedsaad niw kandan he egkelibri sikandan te kemetayen.

Ezekiel 20:13

“ ‘Piru midsupak gihapun kediey is menge etew te Israel te ziyè dan te sibsivayan. Wazè dan tumana is menge suǥù ku wey menge sulunuzen, he iyan pezem ibpekepedayun te kegkeuyag-uyag dan is kedtumana zan kayi. Wazè dan daan isipa he segradu is Andew te Kedhimeley he impetuman ku kandan. Umbe migkaǥi a te ibpeǥezaman ku kandan is pauk ku su para mepurung sikandan mezeeti ziyà te sibsivayan.

Ezekiel 20:16

Impenangdù ku heini ziyà te kandan su geina te wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Impelavi zan is ked-azap te zuma he menge ed-ezapen dan.

Ezekiel 20:18

Dutun te sibsivayan migkeǥiyan ku is menge anak dan te, “Kenè niw iringi is menge sulunuzen wey menge mibeelan te menge ginikanan niw, ne kenè niw remeriki is keugelingen niw pinaaǥi te ked-azap te zuma he menge ed-ezapen.

Ezekiel 20:24

su wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Iyan dan hinuun impelavi is ked-azap te menge ed-ezapen te menge kepuun dan.

Ezekiel 20:30

“Ne ǥuntaan, keǥiyi nu is menge etew te Israel te siak, is Nengazen he MEGBEVAYÀ, migkaǥi a te, ‘Edremerikan niw ve zaan is keugelingen niw iring te mibeelan te menge kepuun niw, wey ed-azap kew ve zaan te utew mezaat he menge ed-ezapen?

Ezekiel 22:28

Is menge ebpeneuven diyà te kandan edtembunan dan is menge salè dan pinaaǥi te uvag kebpekelawas dan wey menge tagnè dan he vinèbeelan dan dà. Egkeǥiyen dan he iyan kun haazà migkaǥi te Nengazen he MEGBEVAYÀ minsan pa te iyan tutuu is wazà haazà keǥiya te Nengazen.

Ezekiel 22:8

Mibey-anan nu is segradu he menge azen ku ne wazè nu isipa he segradu is Andew te Kedhimeley he ibpetuman ku.

Hoseas 12:2

Migkaǥi si Hoseas te, “Duen riklamu te Nengazen diyà te tig-Juda he menge kevuwazan ni Jacob. Edsilutan din sikandan te sumalà te menge vetasan dan; ebelesan din sikandan te sumalà te menge vaal zan.

Hoseas 12:3

Hein diyè pa sikan is kepuun dan he si Jacob te ǥetek te iney zin, egkesuat en sikandin he ebpekidlavew te sereping din. Ne hein midekelè en sikandin, mibpekibuteng sikandin te Megbevayà

Hoseas 6:11

Minsan sikiyu is menge tig-Juda netelaan en is kedsiluti keniyu. “Egkesuat a pezem he idlikù ku is meupiya he kebpekesavuk te menge etew ku.

Amos 1:3

Iyan heini migkaǥi te Nengazen mehitenged te Siria: “Tenged te kedtulung kebaal te salà te menge tig-Damascus, edsilutan ku sikandan. Su midsurung dan is menge tig-Gilead he henduen be te midlepiǥis dan te putew.

Amos 3:2

Diyà te langun he menge nasyun kayi te tivuuk he kelibutan iyan kew zà mibpilì ku he mehimu he menge etew ku. Umbe edsilutan ku sikiyu tenged te langun he menge salè niw.”

Micas 6:12

Mesipala is menge sepian keniyu, ne menge teruen kew.

Habakuk 2:18

“ ‘Hengkey is pulus te zuma he menge ed-ezapen? Kayu zè man heeyan etawa mital he mibeelan te etew, ne kenè man heeyan ebpekekaǥi mehitenged te tutuu. Ne maan is midtuuwan heeyan te menge etew he mibaal zuen? Kenà ganì heeyan ebpekekaǥi.

Zatù 10:6

Mid-uman en maan mebaal is menge Israilihanen te mezaat he igkepauk te Nengazen. Mid-iniyuǥan dan is Nengazen su iyan dan mid-azap is menge ledawan te ed-ezapen he si Baal wey si Ashtoret, wey is menge ed-ezapen diyà te Aram, Sidon, Moab, Ammon, wey Filistia.