2 Samuel 6:21 - Manobo Western Bukidnon OT

²¹ Migkeǥiyan ni David si Mical te, “Mibeelan ku haazà diyà te etuvangan te Nengazen he iyan mibpilì kedì he ilis te amey nu wey te minsan hentei he ziyà te pemilya zin. Mibpilì e zin he iyan edumala te keet-etawan din he menge Israilihanen. Umbe wazà ebpekevelavag te kedsilibra ku ziyà te etuvangan te Nengazen,

2 Samuel 6:21 ပူးပေါင်းရင်းမြစ်များ

2 Samuel 5:2

Puun pa zengan, minsan te iyan pa si Saul hadì dey, ne iyan ke pa nengulu te menge Israilihanen te kebpekidtebek. Ne migkeǥiyan ka te Nengazen te, ‘Elimahi nu is menge etew ku he Israilihanen te iring te ked-elima te ebantey te menge kerehidu. Iyan ka egkehimu he pengulu zan.’ ”

2 Samuel 6:14

Midsayew si David diyà te etuvangan te Nengazen pinaaǥi te tivuuk he zesen din, he migkukumbalà te ipud he linu.

2 Samuel 6:16

Hein idseled dan en haazà is Kavan te Nengazen dutun te Inged ni David, mibpantew si Mical he anak ni Saul ziyà te bintanà. Ne neehè din si Hadì David is edlinglingketew en is edsayew ziyà te etuvangan te Nengazen, ne neepes si Mical te mibeelan ni David.

2 Samuel 6:22

ne subra pa is ebeelan ku he mekeeled-eled. Igkeeled nu is ebeelan ku, piru ebentuǥen a mulà te menge vahi he egkeǥiyen nu he menge suluǥuen.”

2 Samuel 6:5

Midsilibra si David wey is langun he etew te Israel ziyà te etuvangan te Nengazen te tivuuk dan he zesen. Nemenganta zan wey midtukar te menge alpa, lira, tamburin, kastanitas, wey simbal.

2 Samuel 7:8

“Keǥiyi nu pa si David he iyan a, is Nengazen he Mekeǥeǥehem, egkaǥi te, ‘Mibantey ke zà dengan te menge kerehidu, piru mibpilì ku sikew he edumala te menge etew ku he Israilihanen.

1 Cronica 15:29

Hein idseled dan en haazà is Kavan te Kebpekid-uyun te Nengazen dutun te Inged ni David, mibpantew si Mical he anak ni Saul ziyà te bintanà. Ne neehè din si Hadì David is edsayew te kegkelipey zin, ne neepesan din.

1 Samuel 13:14

Piru kenè en heeyan egkehitavù, su zuen en naahà te Nengazen he etew he ebpemineg kandin, wey iyan edhimuwen din he ebpengulu te keet-etawan din tenged te wazè nu tumana is suǥù din.”

1 Samuel 15:28

Migkeǥiyan ni Samuel te, “Iring kayi is egkeulaula kenikew: egkuwaan guntaan te heini he andew te Nengazen diyà te kenikew is ginhedian te Israel ne ibeǥey zin te iring nu zed he Israilihanen he meupiya pa kenà sikew.

1 Samuel 16:1

Neuma is timpu zutun, ne migkeǥiyan te Nengazen si Samuel te, “Sengemenu ves keluǥayad is kedlalew nu ki Saul? Id-awè ku en sikandin he hadì te Israel. Guntaan penua nu te lana heeyan is teleǥuey nu he sungey, ne hendiyè ka te ki Jesse he tig-Betlehem, su mibpilì ku is sevaha zutun te menge anak din he iyan egkehimu he hadì.”

1 Samuel 16:12

Umbe, mibpevayaan ni Jesse si David, ne impehendutun. Metaid he meriǥàriǥà is kedlulundis din, wey meupiya he ed-ahaan is mata zin. Migkeǥiyan te Nengazen si Samuel te, “Lenahi nu en is ulu zin su iyan en sikandin nepilì ku.”