2 Samuel 24:13 - Manobo Western Bukidnon OT

¹³ Ne midhendiyà si Gad te ki David ne migkeǥiyan din sikandin te, “Hendei kayi is egkesuatan nu: Tetelu he tuig he vitil diyan te nasyun nu, tetelu he vulan is kebpelpelaǥuy niw su edleyasen kew te kuntada niw, wey ke tetelu he andew is sunudsunud he zuen ebpematey kayi te nasyun nu? Is-isipa nu purungi heeyan, ne keǥiya nu kedì ke hengkey is idtavak ku te Nengazen he iyan midsuǥù kedì.”

2 Samuel 24:13 ပူးပေါင်းရင်းမြစ်များ

2 Samuel 21:1

Dutun te kedhadì ni David, duen nehitavù he vitil seled te tetelu he tuig. Ne zutun nekidlalag si David diyà te Nengazen. Migkaǥi is Nengazen te, “Neulaula is bitil tenged te kebpenhimetayi ni Saul wey te pemilya zin te menge Gibyunhen.”

2 Samuel 24:12

“Hendiyè ka te ki David ne ipepilì nu sikandin ke hendei zapit kayi te tetelu is egkesuatan din he idsilut ku kandin.”

2 Hadì 8:1

Dutun te nehuna he timpu migkeǥiyan ni Elisha sikan is bahi he mibanhew ni Elisha is anak din te, “Dumaha nu is pemilya nu ne ziyè kew upbà te selakew en he lugar, su migkaǥi is Nengazen te egkehitavù is pitu he tuig he vitil kayi te Israel.”

1 Cronica 21:12

Tetelu he tuig he vitil, tetelu he vulan he kedèdeeti keniyu te menge kuntada niw, etawa tetelu he andew he pigada he ebpuun te Nengazen pinaaǥi te kedsuruy te velinsuǥuen te Nengazen he ebpendezaat diyà te tivuuk he tanà te Israel. Pilì ka wey keǥiya nu kedì ke hengkey is idtavak ku te Nengazen he midsuǥù kedì.”

Exodus 7:25

Ne hein pitu en he andew puun duen te kebpeveluya te Nengazen te Wahig he Nilo he lengesa pinaaǥi ki Aaron,

Ezekiel 14:13

“Sikew is etew, emun ebpekesalà kayi te kediey is menge etew ziyà te sevaha he nasyun pinaaǥi te kedluivi zan kediey, edsilutan ku sikandan, ne id-awè ku is ebpuunan te keenen dan. Ebpeeǥiyan ku sikandan te vitil su wey zan mebpematey duma te menge uyaǥen dan.

Leviticus 26:20

Egkehimu he wazà pulus te menge kedhaǥù niw, su is menge tanè niw, kenà ebeǥey te sebpet ne is menge kayu niw ne kenà ebpemeǥas.

Leviticus 26:25

Ibpesurung ku sikiyu te menge kuntada niw he iyan silut niw tenged te kedsupak niw te kebpekid-uyun ku keniyu. Minsan med-eles kew pa ziyà te inged niw ebpeeǥiyan ku ǥihapun sikiyu te menge kemeresayan, ne tenged dutun egkepeǥes kew he ebpezizalem te gehem te menge kuntada niw.

Deuteronomio 28:22

Uya, ibpaantus kew te Nengazen te ibpatey he menge zaru, dateng, levag, wey meinit he keramag, gulavung, wey erat te pinemula taman te egkengahanew kew.

Deuteronomio 28:25

“Baal te Nengazen is kegkezeeǥa keniyu te menge kuntada niw. Edrapungrapung kew is edlusud kandan, piru ebpekedsusuwey kew is ebpemelaǥuy kandan. Ebpendemis keniyu is langun he ginhedian kayi te kelibutan.

Deuteronomio 28:27

Ibpaantus kew te Nengazen te levag he iring te impaaǥi zin diyà te menge Ehiptohanen, wey menge tumur, mezeǥes, wey keriskis he kenà egkeulian.

Deuteronomio 28:35

Ebpetuvuan kew te Nengazen te levag puun te paa niw pehendiyà te ulu niw he kenà egkeulian.

Deuteronomio 28:52

Edsurungen dan is langun he menge inged niw he ibeǥey keniyu te Nengazen he Megbevayè niw taman te egkelempag is metikang wey melig-en he menge verengbeng he iyan edseriǥan niw.

1 Samuel 25:17

Guntaan is-isipa nu ke hengkey is meupiya he ebeelan nu, su ebpekeveǥey heini te kezeetan diyà te esawa nu pehendiyè en te tivuuk he pemilya. Utew mezaat is betasan din, ne wazè din ebpemineǥen he etew.”