2 Samuel 16:23 - Manobo Western Bukidnon OT

²³ Dutun he timpu mibpemineg si Absalom te menge sambag ni Ahitofel, iring ded daan dutun is mibeelan ni David hein aney. Su is menge sambag ni Ahitofel in-iring daan te ziyà ebpuun te Megbevayà.

2 Samuel 16:23 ပူးပေါင်းရင်းမြစ်များ

2 Samuel 15:12

Dutun te kemula pa ebpemuhat si Absalom te menge pemuhat, impetawag din si Ahitofel he ziyà te inged he Gilo. Heini si Ahitofel ne zutun heini he meǥinged, wey sevaha sikandin te menge megsesambag ni David. Hein neuǥet ne midmezakel en is midsunud ki Absalom, umbe mibmelig-en utew is pelanu zin te kebpekidsukulà ki David.

2 Samuel 15:31

Duen mibpenudtul ki David he si Ahitofel ne sevaha te nekidsevaha ki Absalom. Ne zutun mid-ampù si David, “Nengazen, himuwa nu he wazà pulus te sambag ni Ahitofel.”

2 Samuel 17:1

Migkeǥiyan ni Ahitofel si Absalom te, “Tuǥuti a kenikew te kebpilì te 12,000 he etew he ibpepengehè ta ki David guntaan he kezukilemi.

2 Samuel 17:14

Migkaǥi si Absalom wey is langun he menge sineriǥan te Israel te, “Meupiya pa is sambag ni Hushai he Arkanhen kenà is ki Ahitofel.” Meupiya is sambag ni Ahitofel, piru ketau te Nengazen he kenà ebpemineǥen heini ni Absalom, su wey mezaat is egkepengkusan din.

2 Samuel 17:23

Hein netuenan ni Ahitofel he wazà pezumdumahi is menge sambag din, ne mid-untuzan din is asnu zin ne mid-ulì diyà te inged din. Nemilinbilin sikandin te pemilya zin ne midhiket sikandin pinaaǥi te kebitey. Diyè ded ileveng sikandin te midlevengan te amey zin.

Job 28:28

Ne migkaǥi sikandin diyà te menge etew te, ‘Egkehimu he zuen niw ketau wey kedsavut emun edtehuzen niw is Nengazen wey edlikey kew te mezaat he ulaula.’ ”

Job 5:12

Edezeetan din is menge pelanu te limbungan he menge etew, su para kenà sikandan mebmezeeǥen.

Salmo 19:7

Is kesuǥuan te Nengazen wazè din sayep. Ne ebpekezasig heini kenita. Egkeseriǥan is menge penurù te Nengazen ne ebpekeveǥey heini te ketau te kenà metau.

Salmo 28:2

Pemineǥa nu is hangyù ku te tavang diyà te kenikew, zutun te ziyà a medsinaru te segradu he valey nu he imbayew ku is menge velad ku.

Megwewali 10:1

Is minatey he langew ebpekemahu te pehemut, ne is deisey he tinulebung ebpekezezaat te ketau wey zengeg.

Jeremias 4:22

Migkaǥi is Nengazen te, “Tulebung is menge etew ku; wazè e zan mekilala. Iring sikandan te engey he menge vatà he kenà ebpekesavut. Utew zan metau he ebaal te mezaat, ne kenè dan mulà egketau he ebaal te meupiya.”

Jeremias 8:9

Egkepeel-elezan is migkilala zan is keugelingen dan he uluwanen sikandan. Utew sikandan egkengahandek su ebihaǥen man sikandan, tenged te kedselikwaya zan te menge lalag ku. Tutuu ve he metau sikandan?

Numero 27:21

Pinaaǥi ki Eleazar egketuenan din is egkesuatan ku pinaaǥi te kegamit ni Eleazar te beveraan he Urim diyà te etuvangan ku. Pinaaǥi kayi egkeǥiyahan ni Eleazar si Josue wey is langun he menge Israilihanen te ereg he ebeelan dan.”

1 Samuel 30:8

Ne mibpenginginsà si David te Nengazen te, “Egkehimu ve he edtelukunan dey is midsurung kenami? Egkezaag dey vuwa sikandan?” Midtavak is Nengazen te, “Uya, telukuni niw sikandan su egkezaag niw, ne egkelibri niw is menge vinihag.”