2 Samuel 16:21 - Manobo Western Bukidnon OT

²¹ Midtavak si Ahitofel te, “Hulizi nu is menge esawa te amey nu he intaǥak din he para ed-atur te turuǥan. Ne egketuenan te langun he menge Israilihanen he midhimu nu he mepauk is amey nu, ne tenged kayi utew ebpekevurut is menge sakup nu.”

2 Samuel 16:21 ပူးပေါင်းရင်းမြစ်များ

Genesis 34:30

Ne migkeǥiyan ni Jacob si Simeon wey si Levi te, “Mibeǥayan a keniyu te utew zekelà he samuk. Edumutan kiw en te menge Canaanhen wey menge Pirisihanen he menge meǥinged kayi te tanà. Mezakel zan, kenè kiw, ne emun ebpetebtevangè dan ne edsurungen kiw zan, egkaamin kiw zan te edhimatey.”

Genesis 35:22

Ne zutun te timpu he kemulu pa ed-ubpà ensi Jacob dutun, midhulizan ni Reuben is esawa te amey zin he si Bilha. Hein netuenan haazà ni Jacob, utew sikandin nepauk. Duen 12 he menge anak ni Jacob.

Genesis 6:4

Ne zutun he timpu hein neked-esawa is menge anak te Megbevayà wey is menge vahi he anak te etew, pinaaǥi zutun duen in-anak dini te tanà he menge etew he egngezanan te Nefilim. Ne haazà is menge Nefilim, ne utew menge ǥemhanan he etew ne utew zan nengevantug dengan.

2 Samuel 10:6

Neisip-isip dutun te menge Amunihanen he egkepeukan dan ni David. Umbe midsuhulan dan is 20,000 he Aramihanen he menge sundaru he tig-Bet Rehob wey tig-Zoba, 1,000 he sundaru he ebpuun te hadì te Maaca, wey 12,000 he sundaru he ebpuun te Tob.

2 Samuel 12:11

“Iyan pa heini egkeǥiyen te Nengazen: ‘Duen ebpuun te pemilya nu he edsukul kenikew. Ibeǥey ku is menge esawa nu ziyà te etew he kenè nu selakew, ne ebpekidhulid sikandin kandan minsan duen ebpekaahà.

2 Samuel 13:5

Migkaǥi si Jonadab te, “Hizeǥè ka, wey ka mebpezezaru. Ne emun edlauy kenikew is amey nu ne keǥiyi nu sikandin he tuǥuti zin si Tamar he medhendiyà te kenikew, he iyan ebpekaan kenikew. Keǥiyi nu sikandin he egkesuatan nu he egkeehè nu si Tamar he iyan ed-andam te keenen nu zutun te uvey nu he iyan edsungit kenikew.”

2 Samuel 15:16

Midhipanew si David duma is langun he nesakup te pemilya zin, piru intaǥak din is sepulù he esawa zin he kenà menge dungganen para ed-etiman duen te turuǥan.

2 Samuel 16:20

Migkeǥiyan ni Absalom si Ahitofel te, “Keǥiya nu kun kedì ke hengkey is ebeelan ta.”

2 Samuel 17:7

Migkeǥiyan ni Hushai si Absalom te, “Guntaan kenà meupiya heini is menge sambag ni Ahitofel.

2 Samuel 2:7

Ne ǥuntaan, pekelig-en kew wey pekevurut kew minsan te minatey en si Saul he egalen niw. Iyan a mibpilì te menge tig-Juda he iyan hadì dan.”

2 Samuel 20:3

Hein nekelikù si David diyà te turuǥan din diyà te Jerusalem, ne impaangey zin kes sepulù he esawa zin he intaǥak din he para ed-etiman duen te turuǥan, ne zuen ibpevantey zin kandan. Ne mibeǥayen din sikandan te kinahanglan dan, piru wazè din en hulizi sikandan. Ne zutun en sikandan med-ubpà he henduen be te menge valu taman te kebpatey zan.

1 Hadì 11:25

Ne nehimu si Rezon he hadì diyà te Aram ne migkuntada zin is Israel. Nehimu sikandin he kuntada te Israel zutun te uuyag pa si Solomon. Mid-umanan din pa is kegubut he ebeelan ni Hadad diyà te Israel.

1 Hadì 2:17

Midtavak si Adonia te, “Betbetai nu hengyui si Hadì Solomon he ipeesawa zin kedì si Abishag he tig-Shunem. Su netuenan ku he kenè ke zin eberawen.”

1 Hadì 2:22

Migkaǥi si Hadì Solomon te, “Maan is edhengyuen nu he ipeesawa si Abishag ki Adonia? Kela ke edhengyuen nu zaan he iveǥey ku ziyà te kandin is ginhedian ku, su kakey ku sikandin ne edlavan kandin si Abiatar he memumuhat wey si Joab he anak ni Zeruya!”

Leviticus 20:11

Emun ebpekidhilavet is maama te sevaha te menge esawa te amey zin, mibpeel-elezan din is amey zin. Ne sikandan is dezuwa zutun te vahi kinahanglan he edhimetayan. Iyan dà sikandan egkevasul zutun te kemetayen dan.

Zacarias 8:13

Sikiyu is menge etew te Juda wey Israel, midrewakan kew te menge etew ziyà te zuma he menge nasyun. Piru edlibriyen ku sikiyu ne egkehimu kew he tuvad diyà te kandan. Umbe kenè kew mahandek, kekenà, pekelig-en kew.”

1 Samuel 13:4

Nezineg te menge Israilihanen he utew nengepauk is menge Filistihanen te kedsurunga ni Saul te kampu zan. Umbe midtiǥum ni Samuel is menge Israilihanen diyà te Gilgal duma ki Saul.

1 Samuel 27:12

Dekelà is kedsarig ni Akish ki David, neisip din is, “Edumutan en guntaan si David te menge zuma zin he Israilihanen, umbe ǥuntaan, suluǥuen kud sikandin taman te taman.”