2 Samuel 13:29 - Manobo Western Bukidnon OT

²⁹ Ne zutun midhimetayan te menge sakup ni Absalom si Amnon su insuǥù din. Ne nen-untud is duma he menge anak he maama ni David te menge kudè dan ne nemelaǥuy zan.

2 Samuel 13:29 ပူးပေါင်းရင်းမြစ်များ

Genesis 36:24

Is menge anak ni Zibeon iyan si Aya wey si Ana. Iyan si Ana sikan is neketuredu te serebseb diyà te sibsivayan hein ebantey sikandin te menge asnu te amey zin.

2 Samuel 12:10

Umbe, tenged te mibeelan nu, puun guntaan layun duen tebek wey ebpehimetayà diyà te pemilya nu, tenged te midsupak a kenikew ne migkuwa nu is esawa ni Uria.’

2 Samuel 13:30

Hein ed-ulì dan en diyà te Jerusalem, duen neketudtul ki David he mibpenhimetayan ni Absalom is langun he menge anak din he maama ne wazà nesamà.

2 Samuel 14:6

ne zuen dezuwa he anak ku he maama. Sevaha zutun he andew midtebek sikandan is dezuwa ziyà te pemuleey, ne tenged te wazà edsambag kandan dutun, ne nepatey is sevaha.

2 Samuel 18:9

Timpu te tebek, nesinuǥung te menge sakup ni David si Absalom, ne mibpelaǥuy sikandin he ed-untud te kudà. Ne nenursuriyuk diyà te dizalem te merapung he menge subpang te kayu he ulayan, ne nekesanggat is ulu zin dutun te kayu. Ne midlaus en is kudè din mebpelelaǥuy, ne netaǥak en sikandin is nevivitey zutun te kayu.

1 Hadì 1:33

ne migkaǥi haazà is hadì diyà te kandan te, “Ipeuntud niw sikan is anak ku he si Solomon duen te kudè ku, ne zumaha niw sikandin diyà te Gihon ragkes is menge upisyal ku.

1 Hadì 1:38

Umbe, migenat si Zadok he memumuhat, si Natan he ebpeneuven, si Benaya he anak ni Jehoyada, wey is menge tigbantey ni David he menge Kiritnen wey menge Pilitnen. Impeuntud dan si Solomon diyà te kudà ni Hadì David ne miduma zan diyà te Gihon.

Erubasa 29:12

Emun ebpemineg is pengulu te tarù he menge tudtul, ne egkehimu he lalung is langun he menge upisyal zin.

Leviticus 19:19

Tumana niw is menge sulunuzen he ibpesunud ku. Kenè niw pepeniwelayi is sevaha he uyaǥen te selakew en he kelasi te uyaǥen. Kenè kew pemula te zezuwa he kelasi te venì diyà te sevaha zà he pemuleey. Kenè kew sul-ub te sevaha he visti he zezuwa he kelasi te manggad.

Micas 7:3

Nelayam sikandan te kebaal te mezaat. Is menge pengulu wey menge meghuhukum ne edawat te sipsip. Ne ebpezumdumahan dan dà is egkesuatan te menge nekilala wey gehemanen he menge etew. Nesevaha sikandan te kebulegkù te hustu he kukuman.