2 Cronica 7:9 - Manobo Western Bukidnon OT

⁹ Hein ikewalu en he andew, mibeelan dan is ketepusan he keburunburun, su midsilibra zan is kebpehinunguza zuen te pemuhatà wey te tivuuk he valey te Nengazen seled te pitu he andew, wey te kedsilibra te Pista te Kebaal te menge Lawig seled daan te pitu he andew.

2 Cronica 7:9 ပူးပေါင်းရင်းမြစ်များ

1 Hadì 8:2

Midhendiyè dan is langun te ki Hadì Solomon hein Pista te Kebaal te menge Lawig, hein bulan te Etanim, he iyan kes ikepitu he vulan.

1 Hadì 8:65

Midsilibra si Solomon wey is langun he menge Israilihanen is Pista te Kebaal te menge Lawig seled te pitu he andew. Utew mezakel he menge etew is nevurun he ebpuun te Lebo Hamat he zapit te zizaya pehendiyà te zal-ug te Ehipto he zapit te zivavà. Haazà is kedsilibra zan diyà te etuvangan te Nengazen he Megbevayè dan 14 he andew pudu, pitu he andew is para te kebpehinunguza zuen te valey te Nengazen, ne pitu zaan he andew is kedsilibra he para zuen te Pista te Kebaal te menge Lawig.

2 Cronica 30:23

Ne zutun midisisyun is langun he menge etew he ed-uman dan pa edsilibra seled te pitu he andew. Ne mibeelan dan haazà duma is utew kegkelipey.

2 Cronica 7:10

Sunud dutun he andew, he iyan ike-23 he andew te ikepitu he vulan, impeulì ni Solomon is menge etew. Mid-ulì dan he melipayen utew tenged te langun he meupiya he mibeelan te Nengazen ki David wey ki Solomon, wey te menge etew zin he menge Israilihanen.

Nehemias 8:18

Andew-andew ne mibasa ni Ezra kes Libru te Kesuǥuan te Megbevayè diyà te etuvangan te menge etew, puun te nehuna he andew zutun te pista taman en te ketepusan he andew. Midsilibra zan haazà is pista taman te pitu he andew, ne te ikewalu he andew ne midtiǥum dan para te ked-azap te Nengazen, sumalà is diyà te Kesuǥuan.

Exodus 29:37

Ul-ulaha nu heini kada andew zutun te pitu he andew. Ne egkepurung egkehimu he segradu haazà is pemuhatà, ne ereg he idsivey para te Nengazen is ebpekezegkit dutun.

Joel 1:14

Keǥiyi niw is menge edumala te Juda wey is langun he meǥinged kayi, he medtiǥum dan is langun diyà te valey te Nengazen he Megbevayè niw ne mebpuasa zan. Mebuyù dan te tavang diyà te Nengazen.

Leviticus 23:36

Seled te pitu he andew ebpemuhat kew ziyà te Nengazen te pemuhat pinaaǥi te hapuy. Ne ikewalu he andew kenè kew en maan terebahu, kekenà, tiǥum kew en maan te ked-azap te Nengazen, ne pemuhata niw sikandin. Ketepusan heini he andew te kedtiǥum niw.

Numero 7:10

Is menge pengulu, mid-uwit daan te kandan he menge halad he para te kebpehinunguza zuen te pemuhatà emun ibpehinungud en heini.

Deuteronomio 16:8

Kaan kew te supas he wazè din tapey seled te heenem he andew. Ne te ikepitu he andew, kenè kew terebahu, kekenà, tiǥum kew te ked-azap te Nengazen he Megbevayè niw.