2 Cronica 7:3 - Manobo Western Bukidnon OT

³ Hein naahà te langun he menge Israilihanen haazà is hapuy he mibulus wey is mekeǥeǥehem he kebpekiduma te Nengazen dutun te divavew te valey te Nengazen, ne midluhud dan ne mid-azap dan is Nengazen he zuma is kebpeselamat. Migkaǥi sikandan te, “Meupiya is Nengazen; wazà pidtemanan te gaǥew zin.”

2 Cronica 7:3 ပူးပေါင်းရင်းမြစ်များ

1 Hadì 18:39

Ne hein naahà haazà te langun he menge etew zutun, midlangkeb dan is egkaǥi te, “Is Nengazen, iyan Megbevayà! Is Nengazen iyan Megbevayà!”

1 Cronica 16:34

Peselemati is Nengazen te keupiya zin; wazà pidtemanan te gaǥew zin.

1 Cronica 16:41

Duma zan daan dutun si Heman, si Jedutun, wey is duma he nepilì he egkanta, te kebpeselamati te Nengazen tenged te gaǥew zin he wazà pidtemanan.

1 Cronica 29:20

Ne migkeǥiyan ni David is tivuuk he keet-etawan te, “Deliǥa niw is Nengazen he Megbevayè niw.” Ne zutun midalig dan is Nengazen, he Megbevayà te menge kepuun dan. Midluhud dan wey midungul he tuus te kebeǥayi zan te zengeg te Nengazen wey te hadì.

2 Cronica 20:18

Ne midluhud si Jehoshafat wey is langun he tig-Juda wey tig-Jerusalem te ked-azap te Nengazen.

2 Cronica 20:21

Hein nekepasad sikandin ne mibpekisambag sikandin te menge etew. Ne zutun mibpilì sikandin te menge perekanta he iyan edhuna kandan he egkanta te kedalig te Nengazen tenged te egkein-inuwan he kegkewaǥas din. Iyan heini kanta zan: “Peselemati niw is Nengazen tenged te wazà pidtemanan te gaǥew zin.”

2 Cronica 29:28

Is langun he menge etew zutun, mid-azap dan is Nengazen dutun te egkanta is menge perekanta wey is menge perehiyup te trumpita taman te nepasad is kebpemuhat te menge pemuhat he edtutungen.

2 Cronica 29:29

Ne hein nepasad is kebpemuhat, ne midluhud si Hadì Hezekia wey is langun he menge zuma zin ne mid-azap dan is Nengazen.

2 Cronica 29:30

Midsuǥù ni Hadì Hezekia wey te menge upisyal zin is menge Levihanen te kedalig te Nengazen pinaaǥi te kegkentaha zan te menge kentahan he vineelan ni Hadì David wey ni Asaf he ebpeneuven. Ne melipayen sikandan he egkanta te menge kentahan he idalig dutun te midluhud sikandan is ed-azap te Megbevayà.

2 Cronica 5:13

Is menge perekanta, ne midalig dan wey mibpeselamat dan te Nengazen he eduyuǥan te trumpita, simbal, wey zuma pa he menge gelemiten. Iyan heini kanta zan: “Meupiya is Nengazen; wazà pidtemanan te gaǥew zin.” Ne zutun nepenù te ǥapun haazà is baley te Nengazen.

Ezra 3:11

Dutun midalig dan wey mibpeselematan is Nengazen; migkanta zan he edhenduen te, “Meupiya iyan is Nengazen, su is kebmahala zin te Israel ne wazà pidtemanan.” Ne ingkulahì te mezaǥing te langun he menge etew zutun is kedeliǥa zan te Nengazen su ǥeina te nepasad en is pundasyun duen te valey te Nengazen.

Salmo 100:5

Su meupiya is Nengazen; wazà pidtemanan te ǥaǥew zin, ne ebpedayun is kebmetinumanen din te taman te taman.

Salmo 103:17

Piru wazà ketepusan te kebmahala te Nengazen te menge etew he edtahud kandin, menge edtuman te kebpekid-uyun din, wey menge edtanudtanud te kedtuman te menge suǥù din. Ne is kebpurungi zin kandan ebpedayun pehendiyà en te menge kevuwazan dan.

Salmo 106:1

Deliǥa is Nengazen! Peselemati sikandin su meupiya sikandin; wazà pidtemanan te ǥaǥew zin.

Salmo 107:1

Peselemati is Nengazen, su meupiya sikandin; wazà pidtemanan te ǥaǥew zin.

Salmo 118:1

Peselemati is Nengazen su meupiya sikandin; Wazà pidtemanan te ǥaǥew zin.

Salmo 95:6

Kuwa kew en, edluhud kiw te ked-ezapa te Nengazen he midlimbag kenitew.

Exodus 4:31

ne midtuu sikandan. Ne hein netuenan dan he igkeseeng sikandan te Nengazen wey naahà te Nengazen is kemeresayan dan, midluhud sikandan te ked-azap kandin.

Isaias 63:7

Edtudtulen ku is gaǥew te Nengazen. Edeliǥen ku sikandin tenged te langun he mibeelan din kenitew. Mezakel is meupiya he mibeelan din diyà te kenitew te menge etew ziyà te Israel tenged te zekelà he hizu zin wey kebmahala zin kenitew.

Jeremias 33:11

is kedlipey wey keguǥusà. Egkezineg is kebpeeyuwà te beuǥu, wey is kedlipey te ebpemen-uwit te menge pemuhat diyà te valey te Nengazen he para te kebpeselamat. Egkaǥi zan te, ‘Ebpeselamat kiw te Nengazen he Mekeǥeǥehem, su meupiya sikandin. Wazà pidtemanan te ǥaǥew zin.’ Edlipey is menge etew su idlikù ku is meupiya he kebpekesavuk dan kayi he tanà iring te kebpekesavuk dan dengan. Iyan a, is Nengazen, is migkaǥi kayi.”

Numero 14:5

Ne si Moises wey si Aaron midluhud diyà te etuvangan te tivuuk he keet-etawan te Israel he netiǥum dutun.

Numero 16:22

Piru midluhud si Moises wey si Aaron he ke sikandan te, “He Megbevayà he ebpuunan te untung te langun he menge etew, edelehiǥen nu ve te pauk nu is langun he etew kayi te sevaha zè man is nekesalà?”